මහජන බැංකුවට ජාත්‍යන්තර සම්මාන ද්විත්වයක්

වර්ල්ඩ් ෆයිනෑන්ස් ඩිජිටල් සම්මාන 2020 උළෙලේදී මහජන බැංකුව ‘ශ්‍රී ලංකාවේ විශිෂ්ටතම ඩිජිටල් බැංකුව’ මහජන බැංකුවේ ජංගම බැංකුකරණ යෙදුම වන People’s Wave App “ශ්‍රී ලංකාවේ විශිෂ්ටතම ජංගම බැංකුකරණ යෙදුම” ලෙස සම්මානයට පාත්‍රවිය. මෙම සම්මාන ඇගයීම තුළින් මහජන බැංකුවේ ඉදිරි ගමනේ සාර්ථකත්වය පිළිබිඹු කරනවාක් මෙන්ම ශ්‍රී ලංකාවේ වඩාත්ම ඩිජිටල්කරණය වූ බැංකුව ලෙස සිය ස්ථාවරත්වය තව තවත් තහවුරු විණි.

ජාත්‍යන්තර වෙළෙඳාම්, ගෝලීය ආර්ථිකය සහ මූල්‍ය ක්ෂේත්‍රය පිළිබඳව ගෞරවයට පාත්‍ර වූ සඟරාවක් ලෙස World Finance ලොව පුරා ප්‍රචලිත වී ඇත. ගෝලීය මූල්‍ය ක්ෂේත්‍රයේ ඉහළ පිළිගැනීමක් තිබෙන සම්මාන උළෙලක් ලෙස The World Finance විසින් සංවිධානය කරන වර්ල්ඩ් ෆයිනෑන්ස් ඩිජිටල් සම්මාන හැඳින්විය හැකිය. එහිදී මහජන බැංකුව 2020 වසර සඳහා සම්මාන ද්විත්වයක්ම හිමිකර ගැනීම විශේෂත්වයකි.

ශ්‍රී ලංකාවේ ඩිජිටල් බැංකුකරණ ක්ෂේත්‍රය පසුගිය 2020 වසරේදී වඩාත් තරගකාරීව ඉදිරියට පැමිණියේය. විශේෂයෙන්ම කොවිඩ්-19 වසංගතයේ බලපෑමත් සමඟ වඩාත් ආරක්ෂිත ඩිජිටල් බැංකුකරණ විසඳුම්වල අවශ්‍යතාව දැඩි ලෙස ඉහළ ගියේය. මෙම සම්මාන සහ මීට ප්‍රථම Asiamoney Best Bank Awards 2020 සම්මාන උළෙලේ දී ලබාගත් “Best Digital Bank” සම්මාන ආදී පිළිගැනීම්වලින් ශ්‍රී ලංකාවේ ඩිජිටල් බැංකුකරණ ක්ෂේත්‍රය තාක්ෂණයෙන් පරිපූර්ණ ඉදිරිගාමී ක්‍ෂේත්‍රයක් කිරීමේ පෙර ගමන්කරුවා වෙමින් මහජන බැංකුව සිදුකරන කාර්යභාරය මනාව පිළිබිඹු වේ.