⬤ තමුසෙ දැනගන්නවා තමුසෙ හැප්පුනේ ස්නේක් කෙනෙක් එක්ක…
⬤ නාඩගම්කාරයෝ එකේ ස්නේක් හොරෙන්ම කසාද බඳී…
කුඩා අවධියෙන්ම වේදිකාවෙන් රාජ්ය සම්මාන හිමිකර ගත් ඔහු පසුකාලීනව ජයලත් මනෝරත්නගේ ‘තලමල පිපිලා’ වේදිකා නාට්යයේ ‘හේතු’ ලෙසට පත්විය. එතැනින් නතර නොවී පසුකාලීනව සෝමරත්න දිසානායක අධ්යක්ෂණය කළ ‘සිරි රජ සිරි’ චිත්රපටයේ ප්රධාන භූමිකාව නිරූපණය කිරීමට මේ කොළුගැටයාට වාසනාව හිමිවිය. ඒ චරිතය තුළින් ඔහු චීන අන්තර්ජාතික චිත්රපට උළෙලේ හොඳම ළමා නළුවා ලෙසට තේරී පත්වුණේ ශ්රී ලංකාවට ගෞරවයක්ද එකතු කරමින්.
විවිධ පැතිකඩ හරහා තම හැකියාවන් මුළු ලෝකයටම දායාද කළ ඔහු කෝකිල පවන් ජයසූරියයි. ඔහු මේ දවස්වල ජනප්රිය චරිතයක් බවට පත්වෙලා. ඉතින් ඒ කරුණු කාරණා කතා කරන අතරතුර ඔහුගේ යුගදිවියේද රසබර කතා ගැන අපට පැවැසීමට ඔහු අමතක කළේ නැහැ.
🔴 කෝකිල සද්ද බද්ධ නැතිව විවාහ වුණා නේද?
එහෙම ලොකු පිරිසකට කිව්වේ නැහැ. කියන්නත් බැහැනේ. ඒ නිසා පවුලේ අය විතරක් සම්බන්ධ කරගෙන විවාහ මංගල්යයේ කටයුතු චාමෙට කළා.
🔴 ඉස්සෝ වඩයක් කළ ආදරයක් ගිය දුර?
ඇයව මට මුලින්ම හමුවන්නේ දමයන්ති ෆොන්සේකා අධ්යක්ෂණය කළ ‘ඉරගල නැකැත’ ටෙලිනාට්ය තුළින්. ඇයත් මම සමඟ මෙහි රඟපෑවා. එතැනින් ගොඩනැඟුණු මිතුදම අවසානයේ ඉස්සෝ වඩේ කාලා අපි ආදරය කරන්න පටන් ගත්තා.
🔴 ඔබව ඉතින් මේ දවස්වල ජනප්රියතම ටෙලිනාට්ය දෙකක දකිනවා. එය ගැන කිව්වොත්?
දනුෂ්ක රත්නායක අධ්යක්ෂණය කරන ‘දාම්’ ටෙලිනාට්යයේ ‘බක්ති’ගේ චරිතය නිරූපණය කරනවා. ජයප්රකාශ් සිවගුරුනාදන්ගේ ‘නාඩගම්කාරයෝ’ ටෙලිනාට්යයේ ‘මාලන්’ චරිතය නිරූපණය කරනවා.
🔴 ‘දාම්’ ටෙලිනාට්යයේ ‘බක්ති’ ගැන පැවැසුවොත්?
‘බක්ති’ කියන්නේ හොඳ කල්යාණ මිත්රයෙක්. බක්තිගේ මිතුරා කෙවින්. ඔහු මුහුණ දීලා සිටින අරගල, බාධක ප්රශ්නවලට හයියක් වෙන්නේ බක්ති. ‘බක්ති’ මිතුරා වෙනුවෙන් පන වුණත් දෙන චරිතයක්.
🔴 ‘නාඩගම්කාරයෝ’ ටෙලිනාට්යයේ මාලන් ඔබට දැනුණු විදිය?
මාලන් කියන්නේ නිරූපණ ශිල්පියෙක්. කොළඹින් ගමට ඇවිත් රඟන වෙනස්ම චරිතයක්. මේ ටෙලිනාට්යයේ තවත් විශේෂත්වයක් තමයි ගිරිරාජ් කෞශල්ය. ඒ වගේම ප්රසන්නජිත් අබේසූරිය සමඟ මම අවුරුදු 14කට පස්සේ තමයි රඟපාන්නේ. මේක ජනප්රිය වෙන්නවත්, ප්රසිද්ධ වෙන්නවත් කරපු චරිත නෙවේ.
🔴 කොළඹින් ගමට ඇවිල්ලා රඟන්න ගිහින් අපූරු සිද්ධීන්වලට මුහුණපාන්න සිද්ධ වුණා නේද?
ගමේ රඟපාන්න ගිහින් ගුටි කන්න සිද්ධ වුණේ කෙසෙල් කැන් තුනකින්. ඒ අත්දැකීම අමතක වෙන්නෙ නැහැ ඉතින්.
🔴 රංගනයේ මුල්ම අඩිතාලම වේදිකාව නේද?
මගේ පාසල පිළියන්දල මධ්ය මහා විiාලය. පාසලේ ඉඳලම මම වේදිකාවේ රඟපෑවා. පසුකාලීනව ‘හපන් පැදුරට’ සම්බන්ධ වුණා. ඒ කෝකිලා මිස් හරහා. ඉන්පසුව ජයලත් මනෝරත්නයන්ගේ ‘තලමල පිපිලා’ වේදිකා නාට්යයේ ‘හේතු’ගේ චරිතයත් එක්ක වසර කිහිපයක්ම එක දිගටම සම්බන්ධ වෙලා ගමින් ගමට ගිහින් වේදිකාවේ රඟපෑවා. එයින් මට විශාල අත්දැකීමක් ලබාගන්නට පුළුවන් වුණා.
🔴 ඔබ නළුවෙක් විදියට දැනහඳුන ගත්තේ?
මාව ගොඩදෙනෙක් හඳුන ගත්තේ සෝමරත්න දිසානායක අධ්යක්ෂණය කළ රේණුකා බාලසූරිය නිෂ්පාදනය කළ ‘සිරි රජ සිරි’ චිත්රපටය හරහා තමයි. මම ඒ චිත්රපටයට අයැදුම්පතක් දාලා තමයි සම්බන්ධ වුණේ. චීනයේ පවතින දහවැනි අන්තර්ජාතික ළමා චිත්රපට උළෙලේ හොඳම ළමා නළුවාට සම්මාන පවා හිමිකර ගැනීමට මට වාසනාව උදාවුණේ ‘සිරි රජ සිරි’ චිත්රපටය නිසයි.
🔴 එයින් පසු සෝමරත්න දිසානායකගේ නිර්මාණ සඳහා ඔබට ආරාධනා ලැබුණේ නැද්ද?
මට හිතෙන්නේ ඉන්පසු එතුමා කරපු නිර්මාණවල මට ගැළපෙන චරිතයක් තියෙන්නට නැතුව ඇති. හැබැයි එහෙම තිබුණා නම් මාව නොගෙන ඉන්නෙත් නැහැ. මගේ හිතේ ලොකු ආශාවක් තියෙනවා එතුමාගේ චිත්රපටයකට නැවැත සම්බන්ධ වෙලා වැඩ කරන්නට.
🔴 මේ දවස්වල ඔබ රංගනයෙන් වගේම හඬකැවීම් ශිල්පියෙක් ලෙසටත් කටයුතු කරනවා?
‘මේ ආදරය’ ටෙලිනාට්යයේ ආදි චරිතයට මම හඬකවනවා. ඒ වගේම ‘චූටි දූ’ ටෙලිනාට්යයේ චෙමාල්ගේ චරිතයට හඬ දෙනවා. මම හඬ කැවීම් කරපු නිර්මාණ කිහිපයක්ම පසුගිය දවස්වල අවසන් වුණා.
🔴 සකුන්තලා තුළින් ඔබේ වේදිකා ගමනට අභියෝගයක් වන්නට ඇති?
එය ගැන කිය යුතුමයි. අකිල සපුමාල්ගේ ‘සකුන්තලා’ වේදිකා නාට්යයේ මම චරිත හයක් නිරූපණය කරනවා. මේ විදියට කවදාවත් රඟපාලා නැහැ. එය මට අභියෝගයක්. ඒ වගේම හඬවල් හයකින් මම මේ චරිත හයට ජීවය දෙනවා.
වසන්ත විතාරණගේ
