බාලගිරි හරියටම එන්නෙ කවදද

බිලිඳු වයසේ දරුවන්ට නොයෙකුත් ලෙඩ රෝග ඇතිවීම සාමාන්‍ය දෙයකි. එම රෝග විවිධ ග්‍රහ අපල හේතුවෙන් අදාළ දශා කාලය පනිනතුරු ඇතිවන අතර ඇතැම් රෝග බාලරිෂ්ඨ යෝග හේතුවෙන්ද ඇතිවේ. මෙසේ යෙදෙන රෝගවලින් ඇතැම් රෝගවලට ඖෂධ ඇති අතර, ඇතැම් රෝගවලට ඖෂධ නැත. බිලිඳුන්ට වැලඳෙන බාලගිරි දෝෂය ඖෂධවලින් සුවපත් කළ නොහැකි රෝගයකි.

මෙම බාලගිරි දෝෂය අද සමාජයේ මෙන්ම ආදී සමාජයේදීද ළදරුවන්ට පැවැති රෝගයකි. වෛද්‍යවරයකුට ළදරුවා පෙන්වූ විට ලෙඩක් නැතැයි පැවසුවද බිලිඳා නොනවත්වා ඇඬීම සිදුකරයි. එමෙන්ම රාත්‍රි නින්දෙන් තිගැස්සී අවදි වීම මෙන්ම මොරගසා ඇඬීම සිදුකරයි. එම ඇඬීම එක දිගට රෑ පුරාවට සිදුකරයි. මෙම බාලගිරි දෝෂය බිලිඳා ඉපදුණුදා සිට අවුරුදු 12ක් පමණ වනතුරු පවතී. බිලිඳාට අවුරුදු 12ක් පමණ වනතුරු බාලගිරි නම් යක්ෂණියන් දොළොස්දෙනෙක් එක් එක් අවුරුද්දට වෙන වෙනම බලපෑම් ඇති කරන බවත් පුරාණ පොතපතේ සඳහන් වේ.

බිලිඳු උපතේ සිට පළමු අවුරුද්ද වනතුරු නන්දනී නම් වූ බාලගිරි යක්ෂණිය දරුවාට බලපෑම් එල්ල කරයි. පළමු අවුරුද්දේ සිට දෙවැනි අවුරුද්ද වනතුරු සුනන්දා නම් බාලගිරි යක්ෂණිය දරුවාට බලපෑම් කරදර ඇති කරයි. දෙවැනි අවුරුද්දේ සිට තුන්වැනි අවුරුද්ද දක්වා පුතනා නම් වූ බාලගිරි යක්ෂණියගේ ඇල්ම බැල්ම වැටේ. තුන්වැනි අවුරුද්දේ සිට හතර වැනි අවුරුද්ද දක්වා මුනයිතා නම් බාලගිරි යක්ෂණියගේ බලපෑම දරුවාට එල්ල වේ. හතර වැනි අවුරුද්දේ සිට පස්වැනි අවුරුද්ද දක්වා කාලය පුරාවට කටපුණ්‍යා නම් බාලගිරි යක්ෂණියගේ බලපෑම ඇතිවේ. පස්වැනි අවුරුද්දේ සිට හය වැනි අවුරුද්ද දක්වා කාලය පුරාවට ශකුණිකා නම් බාලගිරි යක්ෂණියගේ බලපෑම ඇතිවේ. හයවැනි අවුරුද්දේ සිට හත්වැනි අවුරුද්ද දක්වා කාලය තුළ ශුෂ්කා රේවතී නම් බාලගිරි යක්ෂණිය බැල්ම හෙළයි.

හත්වැනි අවුරුද්දේ සිට අටවැනි අවුරුද්ද දක්වා කාලය තුළ අර්ධකා නම් බාලගිරි යක්ෂණිය බැල්ම හෙළයි. අටවැනි අවුරුද්දේ සිට නවවැනි අවුරුද්ද දක්වා කාලය පුරාවට ශුසුනිකා නම් වූ බාලගිරි යක්ෂණිය බැල්ම හෙළයි. නවවැනි අවුරුද්දේ සිට දහවැනි අවුරුද්ද තෙක් කාලය පුරාවට නෙර්ශාය නම් බාලගිරි යක්ෂණිය බැල්ම හෙළයි. දහවැනි අවුරුද්දේ සිට එකොළොස්වැනි අවුරුද්ද තෙක් පිලිරිච්ඡිකා නම් බාලගිරි යක්ෂණිය බැල්ම හෙළන අතර එකොළොස්වැනි අවුරුද්දේ සිට දොළහ වනතුරු කාලය පුරාවට කාමුකා නම් වූ බාලගිරි යක්ෂණිය දරුවාට ඇල්ම බැල්ම මෙන්ම බලපෑම්ද එල්ල කරයි.

මෙසේ දරුවකුට අවුරුදු 12 වනතුරුම බාලගිරි දෝෂයෙන් පීඩා විඳින්නේ දරුවන්ගෙන් කිහිපදෙනකු පමණි. බහුතරයක් ළදරුවන් උපන්දා සිට අවුරුදු දෙක තුනක් පමණක් මෙම බාලගිරි දෝෂයෙන් පීඩා විඳියි. ඇතැම් ළදරුවන්ට කිසිදින බාලගිරි දෝෂය ඇති නොවේ. එසේ වන්නේ එම ළදරුවාගේ ආත්මයේ ඇති ප්‍රබලතාව නිසාවෙනි. එම බාලගිරි යක්ෂණියට ප්‍රබල බලයක් හිමි ළදරුවාට ඇල්ම බැල්ම දැමිය නොහැකිය.

ඒ නිසා එවැනි පින්වත්, බලවත් දරුවන් නොනවත්වා ඇඬීම මෙන්ම රාත්‍රියට තිගැස්සී ඇහැරීමද සිදු නොකරයි. බාලගිරි දෝෂය බලපාන දරුවන්ට විවිධ කෙම් ක්‍රම මගින් එම දෝෂය මඟහරවා ගැනීමට පුරාණයේ සිට අද දක්වාම මව්පියන් උත්සාහ ගනිති. ඒ අතර නිවසේ ප්‍රධාන දොර උළුවස්සේ ‘බාලගිරි අද නොවේ හෙට’ යනුවෙන් ලියා තැබීම, ජලනන්දන පිරිතෙන් ජීවම් කළ යන්ත්‍රයක් දරුවාගේ කරට දැමීම. ජලනන්දන පිරිතෙන් 108 වරක් මතුරා සුවඳකුඩු උදේ, සවස දුම් ඇල්ලීම, මේ සඳහා සාමාන්‍ය සාම්බ්‍රානි භාවිතා කරන අතර ඇතැමුන් අගිල්, සුවඳකොට්ටම්, දේවදාර, සුදු හඳුන් හා නාමල් රේණුද කුඩුකර දුම් ඇල්ලීම සිදුකරයි. මීට අමතරව සෙනසුරාදා දිනයක හිමිදිරි පාන්දර කපුටන් හැඬීමට පෙර ඔළිඳ මුලක් උදුරාගෙන විත් බිලිඳාගේ අතේ ගැට ගැසීමෙන්ද බාලගිරි දෝෂය දුරුවන බවද මතයයි.

ඔබේ දරුවාගේ රෝගයක් නොමැතිව නිතර හඬයි නම් සිහිනෙන් තිගැස්සී ඇහැරෙයි නම් ඉහත සඳහන් මෙම ක්‍රම කරනවාත් සමඟම දරුවාගේ ජන්ම පත්‍රයද පරීක්ෂා කර බලා එහි ඇති අපල උපද්‍රවවලටද නිසි වතාවක් කිරීමටද සිත තබාගන්න.
ජ්‍යොතිෂවේදිනී මංජුලා පුෂ්පරාංගනී