රඟපෑම ගැන කිසිම අවබෝධයක් තිබ්බෙ නෑ…
සංගීතයට මම කොටුවෙලා නෑ…
කෙළිලොල් බවත්, සුන්දර පෙනුමත් ඇයව බොහෝදුර රැගෙන ගොසින්ය. හිරු අවුරුදු කුමරිය තරගාවලියේ දෙවැනි ස්ථානය හිමිකර ගනිමින් රංගන ක්ෂේත්රයේ දොරටු විවර කරගත් ඇය අද වන විට රටම හඳුනන යොවුන් පරපුරේ ජනප්රිය රංගන ශිල්පිනියකි. ‘සංගීතේ’ අසෙනිගේ චරිතය නිරූපණය කරන ඇය ගීත්මා බණ්ඩාරයි. ඒ හුරුබුහුටි යොවුන් කලාකාරිනිය ‘හාට්’ හැඩ කිරීමට අපගේ ඇරැයුමට කතා කළේ මේ විදියටයි.
ගීත්මා කොහොමද මේ දිනවල වැඩකටයුතු?
මේ දවස්වල නම් ආරක්ෂාකාරීව ‘සංගීතේ’ ටෙලිනාට්යයේ රූගත කිරීම් දිගටම කෙරීගෙන යනවා. ඒ වගේම වෙළෙඳ දැන්වීම් කීපයකත් රූගත කිරීම් සිදුවුණා. ඉතින් ඒවත් එක්ක කාලය ගෙවෙනවා.
ඔබ කලාවට ආ ගමන ගැන කතා කළොත්?
මම හිරු අවුරුදු කුමරිය තරගයෙන් දෙවැනි ස්ථානය හිමිකර ගන්නවා. ඇත්තටම එතැනින් තමයි මට රඟපාන්න අවස්ථාව ලැබුණෙ. මුලින්ම මට හිතාගන්න බැරිවුණා. මොකද මම පාසල් වේදිකාවේ රඟපාලා තිබුණට රංගනය පිළිබඳ කිසිම අවබෝධයක් මට තිබුණෙ නැහැ. ඉතින් මට එය ලොකු අත්දැකීමක් සහ ලොකු අභියෝගයක් වුණා. නමුත් මම හිතනවා එයට සාර්ථකව මුහුණ දුන්නා කියලා.
ගීත්මා කියන්නෙ කෙටි කාලයකින් ක්ෂේත්රයට පිවිසිලා බොහෝ ජනප්රිය වුණු චරිතයක්. ඒ ජනප්රියතාව ගැන මොකද හිතෙන්නෙ?
මං හිතනවා එය වාසනාවකට ලැබුණු දෙයක් කියලා. මොකද ක්ෂේත්රයට එන්න බලාගෙන ගොඩක් අය ඉන්නවා සහ ක්ෂේත්රයේ ගොඩක් අය රැඳිලා ඉන්නවා. හැමෝටම ජනප්රියතාව කියන දේ ලැබෙන්නෙ නැහැ. ඇත්තම කිව්වොත් ප්රේක්ෂකයන්ගෙ ආදරය ලබාගන්නවා කියන්නෙ ලොකු වාසනාවක්.
ඔබ සංගීතේ ටෙලිනාට්යයට කොටුවෙලා වගේ නේද? අලුත් නිර්මාණවලට සම්බන්ධ වෙන්න අදහසක් නැද්ද?
නැහැ. කිසිම
කොටුවීමක් නැහැ. දීර්ඝ ටෙලිනාට්යයක් නිසා කාර්යබහුලයි. නමුත් මම සතුටින් වැඩ කරගෙන යනවා. ඒ වගේම වෙනත් නිර්මාණයන්ට සම්බන්ධ වෙන්න හැකියාව තියෙනවා. බොහෝ විට මම දීර්ඝ ටෙලිනාට්යවලට ඉදිරියට සම්බන්ධ වෙන එකක් නැහැ. දීර්ඝ නොවන හොඳ
කෙටි නිර්මාණ සඳහා සම්බන්ධ වෙන්න බලාපොරොත්තු වෙනවා. ඉතින් ඒ වගේම අපි සංගීතේ කණ්ඩායම ඇතුළෙ හරි නිදහසේ සතුටින් කාලය ගත කරන නිසා එහෙම කොටුවුණු හැඟමක් නැහැ.
ඔබේ ජනප්රියතාවත් එක්ක තවත් සමහරු ඔබට අකුල්හෙළනවා ඇති නේද?
මම දැනුවත්ව කවුරුත් මට ක්ෂේත්රයේ එහෙම කරන්නෙ නැහැ. සමහරුන්ගෙ හිත්වල තියෙනවද දන්නෙ නැහැ. නමුත් මම හිතන්නෙ නෑ මට එය අදාළයි කියලා. මම නිහඬව මගේ ගමනක් හෙමින් හෙමින් යනවා.
නිර්මාණ භාරගන්නෙ තෝරලා බේරලාද?
මෙහෙමයි. නිර්මාණ භාරගනිද්දි තෝරා බේරා ගැනීමක් අනිවාර්යයෙන් කරන්න ඕන. ලැබෙන හැම නිර්මාණයක්ම භාර ගන්න බැහැ. මගේ පෞද්ගලික කැමැත්ත සහ පිටපත බලලා තමයි හොඳ නිර්මාණයකට සම්බන්ධ වෙනව නම් සමබන්ධ වෙන්නෙ.
ගීත්මාගේ අධ්යාපන කටයුතු ගැන කතා කළොත්?
අධ්යාපනය නම් මේ වෙනකොට මට ටිකක් මඟහැරිලා තියෙනවා. සංගීතේ ටෙලිනාට්යයත් සමඟ කාර්යබහුල වීම නිසා මේ අවුරුද්දෙ උසස් අධ්යාපනයට යොමුවෙන්න හැකියාවක් කොහොමටවත් ලැබුණෙ නැහැ. හැබැයි ලබන අවුරුද්දෙ ඉඳන් අලුතින් ඒ හැම දෙයක්ම පටන්ගන්න තමයි බලාපොරොත්තු වෙන්නෙ.
ගීත්මාට එකදිගට ආදර ඇරයුම් ගලාගෙන එනව ඇති නේද?
ඔව්. මගේ ජනප්රියතාවත් එක්ක ආදර ඇරයුම් නම් ගොඩක් ලැබෙනවා. ඉතින් ඒ දේ තරුණ වයසෙ හැම කෙනෙක්ටම පොදු දෙයක්නෙ. හැබැයි ඉතින් හොඳ කෙනෙක් තවම මට මුණගැසුණෙ නැහැ. මගේ හිතේ ඉන්න කෙනා තවම හම්බුණේ නැහැ.
ජෙහානි සිල්වා
