කාලෙකට පස්සෙ එළියට ආපු කටකාර නෑනා

කටකාර චරිත මවමින් හැඩකාර ලෙසට රඟන ඇය මේ දවස්වල ‘නෑනලා’ට කොටුවෙලා. කිසිම සද්ද බද්ධයක් නැතුව හිටිය නිර්ධා උයන්හේවා කාලෙකට පස්සේ ඔන්න නැවැත හැඩවැඩ දාන්න ඇවිත්. ඉතින් ඇයගෙන්ම අපට අහන්න හිතුණා මෙච්චරකල් කොහේද හිටියේ කියලා.
කාලෙකට පස්සේ නිර්ධාව අපට දැකගන්න පුළුවන් නේද?
ඔව්. සෑහෙන කාලෙකින් ටෙලිනාට්‍යයකට මම සම්බන්ධ වුණේ නැහැ. ඉතින් මේ දවස්වල මම ‘නෑනලා’ එක්ක තමයි කාලය ගතකරන්නේ.
‘නෑනලා’ එක්ක මේ ගෙවන කාලය කොයි වගේද?
හරිම සුන්දරයි. නෑනලා හත්දෙනෙක් එක්ක තමයි මම කාලය ගතකරන්නේ. හරිම වෙනස් අත්දැකීමක් මට. ඉතින් ඒ සුන්දරව ගෙවන කාලයේ සුන්දරත්වය රස විඳින්න මගේ ආදරණීය ප්‍රේක්‍ෂකයන්ට මම ආරාධනා කරනවා රාත්‍රි 8.30ට ජාතික රූපවාහිනියේ ‘නෑනලා’ සමඟ එකතු වෙන්න කියලා.
ඇත්තට ඔබ මෙච්චර කාලයක් නිහඬව හිටියේ ඇයි?
අනේ කිසිම ප්‍රශ්නයක් නිසා නෙවේ මට ඩෙංගු රෝගය වැලඳුණා. ඒ විතරක් නෙවේ නිව්මෝනියාවත් හැදුණා. ඉතින් අසනීප තත්ත්වය නිසා මට විවේක ගන්න සිද්ධ වුණා. ඔය අතර නිර්මාණවලින් ආරාධනා ලැබුණා. නමුත් මුදල් ප්‍රශ්න නිසා මම ප්‍රතික්‍ෂේප කළා.
එහෙම නිර්මාණ ප්‍රතික්‍ෂේප කිරීම නිසා ඔබේ ආදරණීය ප්‍රේක්‍ෂකයන්ට කරන්නේ අසාධාරණයක් නේද?
මොනවා කරන්නද. අපේ වටිනාකමට වටිනාකමක් නැතිනම් නිකරුණේ වැඩ කරලා වැඩක් නැහැ. කාලයක් තිබුණා මම වියදම් කරගෙන කලාවට තිබුණු ආශාව නිසා සම්බන්ධ වුණු අවස්ථා. නමුත් හැමදාම ඒක කරන්න බැහැ. නිර්මාණ නැතිනම් කාලා, බීලා ගෙදරට වෙලා ඉන්න එක සැපයි.
ඒ කියන්නේ ඔබේ වටිනාකමට අසාධාරණකම් වුණු අවස්ථාත් තිබෙනවා?
සියයට අනූවක්ම සිදුවන්නේ ඒක තමයි. අපෙන් වැඩ අරගෙන මාරු වෙන්න තමයි සමහර නිෂ්පාදකවරුන් අපිට ණය වෙලා මැරිලත් තියෙනවා. එවැනි නිර්මාණ විකාශය වෙන්න එපා කියලා මම සුබපතනවා. අපෙන් හම්බකරගෙන අපට සලකන්න බැරි නම් වැඩක් නැහැ.
ඔබ කාලයක් එකම චරිත තුළ කොටුවීමක් නිසා නිර්මාණ ප්‍රතික්‍ෂේප කරන අවස්ථා තිබුණා නේද? දැනුත් එහෙම කරනවාද?
කටකාර චරිතවලට තමයි මාව කොටු වුණේ. ඒ නිසා මම එවැනි චරිත ප්‍රතික්‍ෂේප කරපු අවස්ථා තිබුණා. නමුත් දැන් එහෙම කරන්නේ නැහැ. චරිත ඉල්ලගෙන මම කිසිම කෙනෙක් හොයාගෙන පස්සෙන් යන්නේ නැහැ. මගේ වටිනාකමක් දැනුණොත් මට ආරාධනා කරයි.
ප්‍රවීණ ටෙලිනාට්‍ය නාලන් මෙන්ඩිස් සමඟ ඔබ දුර ගමනක් ආව නේද?
ඇත්තටම ඔව්. චන්ද්‍රරත්න මාපිටිගම තමයි මාව මේ ක්‍ෂේත්‍රයට ගෙනාවේ. නමුත් නාලන් අයියා තමයි මාව තැනකට ගෙනාවේ. ඒ ආපු ගමන තමයි මම ‘නෑනලා’ සමඟ නතර වුණේ. සත්පුර වැසියෝ, සූරිය දරුවෝ, සෙනෙහෙ-වන්තයෝ ඔහුගේ නිර්මාණ රැසක මම වැඩකළා. මම ඒ කරපු හැම චරිතයක්ම ජනප්‍රිය වුණා.
ඔබ ඒ ලබපු ජනප්‍රියත්වය ඇගැයීමකට ලක්වුණාද?
‘රයිගම්’ ටෙලි සම්මාන උළෙලේ ‘හොඳම නැඟී එන’ නිළියට නිර්දේශ වීමත් සතුටක් සම්මානයට වඩා.
දවසින් දවස කාලයත් එක්ක ඔබේ කලවයසත් ගෙවී යනවා. තවම විවාහ වීමට අදහසක් නැතිද?
විවාහ වෙන්න බලාපොරොත්තුවක් තිබෙනවා. ආදරය කියන දේ මිල කරන්න බැහැ. ඉතින් සුදුසු කෙනෙක් හිමි වුණුදාට මම විවාහ වෙනවා. මේ දවස්වල හොයමින් ඉන්නේ. නිකම් ෆෝන් එකෙන් මැසේජ් ගහලා කැමැතියි කිවුවට වැඩක් නැහැ. කෙළින් කතා කරන්න එන්න ඕනෑ.
වසන්ත විතාරණගේ