ඔබත් ගණ දෙවියන් යාළු කරගන්න

මේ දිනවල නිතර නිතර ඇසෙන කතාවක් තමයි ගණ දෙවියන් යාළු කරගැනීම කියන කතාව. ඇත්තටම එහෙම ගණ දෙවියන්ව කාට හරි ඕන විදියට යාළු කරගන්න පුළුවන්ද කියලා හරියටම හොයලා බලන එක වැදගත් කියලා අපට හිතුණා. මොකද ගණ දෙවියන් ප්‍රසිද්ධියක් උසුලන්නේ අධ්‍යාපනය වගේම, නුවණටයි. එනිසා මේ මාතෘකාවේදී අධ්‍යාපනය ලබන වයසේ සිටින පිරිස තරමක් කලබල වෙනවා. එහෙම නැත්නම් ගණ දෙවියන් යාළු කරගත්තොත් සේරම හරි කියලා හිතන්න පෙලඹෙනවා. අද වෙද්දි ගණ දෙවියන් යාළුකර ගැනීම සම්බන්ධයෙන් වැඩමුළු පවා පැවැත්වෙනවා. හැබැයි එහෙම වැඩමුළුවල කියන ආකාරයට ඕන ඕන විදියට ගණ දෙවියන් ඔබත් එක්ක යළු වෙයිද කියන එකයි ප්‍රශ්නය.්

ඔබ යම්කිසි අයුරකින් පුද පූජා කටයුතු සඳහා නිවෙසට දේව ප්‍රතිමාවක් තෝරා ගන්නවා නම් ඒ සඳහා සුදුසු ප්‍රතිමාවක් තෝරාගත යුතු වෙනවා. ඒ කියන්නේ සෑම දේව ප්‍රතිමාවක්ම නිවෙසට ගැළපෙන්නෙ නැති නිසයි. මොකද දේව ප්‍රතිමා විවිධ අංග ලක්‍ෂණ අනුවයි නිර්මාණය කර තිබෙන්නේ. ඒ ඒ අංග ලක්‍ෂණ අනුව එම ප්‍රතිමාවලින් යෙදෙන පලවිපාකත් වෙනස් වෙනවා. එනිසා ගණ දෙවියන් සම්බන්ධවත් මේ කාරණාව පොදුයි. එහිදී ගණ දෙවි ප්‍රතිමාවේ හොඬවැල පිහිටා ඇති ආකාරය ඉතාමත් වැදගත්. ඒ නිසා දෙවියන් ගැන හරියට නොදන්නා අයගෙන් ලද උපදෙස් මත දෙවියන් යාළුකර ගන්නට යැයි සිතා ප්‍රතිමා මිලට ගැනීම සුදුසු නොවේ.

ඊළඟට වැදගත්ම කාරණය තමයි ගණදෙවි පූජාවේ වගේම අනෙකුත් දේව පූජාවන්ට තබන පූජා වට්ටිය. මෙයට අතිවිශේෂ තැනක් හිමි වෙනවා. අපිට ආවාට ගියාට පූජා වට්ටි හදාගන්න බැහැ. එහෙම කළාම නියමාකාර ප්‍රතිඵල ලැබෙන්නේ නැහැ. ගණ දෙවියන්ට තබන පූජා වට්ටිය වුණත් හදාගත යුත්තේ පංච තත්ත්වයන් නිරූපණය කෙරෙන දේවල්වලින් බවයි දෙවියන් පිළිබඳව දන්නා බොහෝ දෙනකුගේ මතය වෙන්නේ. එනම් ආපෝ, තේජෝ, වායෝ, පඨවි, ආකාශ් යන තත්ත්වයන් සංකේතවත් කරන ද්‍රව්‍යයන්ය. එයින් අපේ ශරීරයේ පවතින තත්ත්වයන් සමනය කරගෙන සාර්ථකත්වයට පත්විය හැකි බවට විශ්වාසයක් වෙයි.

එහිදී ආපෝ තත්ත්වය සංකේතවත් කිරීමට පැන් බඳුනක් හෝ ආහාර තැබිය හැකිය. තේජෝ තත්ත්වය සංකේතවත් කිරීමට පහනක් දැල්වීම සුබය. වායෝ තත්ත්වය සඳහා සුවඳ ධූපයට හැකියාව පවතී. ඔබ පුදන මල්වලින් ආකාශ් තත්ත්වය සංකේතවත් කරන අතර, පඨවි තත්ත්වය සඳහා සඳුන් කැබැල්ලක් ගලගා තැබීමද සෑහේ. එහෙත් අද වෙද්දි මේ තත්ත්වය වෙළෙඳ අංශයේ ධන උපයන මාර්ගයක් බවට පත්ව ඇත. එය මනාවට පැහැදිලි වන්නේ ප්‍රසිද්ධ දේවාල අසල ඇති පූජා වට්ටි කඩවලිනි. පූජා වට්ටියට පෙර කියූ දේවල් තැබීමෙන් ඔවුන්ට ලොකු ලාභයක් ලැබිය නොහැකි බැවින් වෙළෙඳුන් විසින් පූජා වට්ටිය ධන උපායන මාර්ගයක් බවට පත්කරගෙන තිබේ. එහි මිල තීරණය කරන්නේද ඔවුන්මය.

පූජා වට්ටිය ගන්නට එන අයගේ සිතට විශාල පූජා වට්ටියක් තැබීමේ ඇති ගුණය ව්‍යාජ ලෙස මවා පාමින් කෙසේ හෝ රුපියල් දෙතුන් දහසකට විකුණනු ලබන්නේ රුපියල් දෙතුන් සියයක පලතුරුය. එහෙම බලද්දී දෙවියන්ගේ පිහිට පතාගෙන යන බොහෝමයක් නිසා ගොඩ යන්නේ මේ පලතුරු කඩකාරයන්ය. එනිසා පිටත ශෝභනයට හසු නොවී යථාර්ථයට අනුව පුද පූජා පවත්වා නිසි ලෙස දේව පිහිට ලබා ගැනීමට හැකි බව වටහා ගැනීම කාගේත් වගකීමකි.

දෙවියන් යාළුකර ගැනීම යනු දෙවියන් තම තත්ත්වයට ගෙන තවත් හිතවතකු බවට පත්කර ගැනීමකැයි ඇතැම් අය සිතන බවකුත් පෙනී යයි. ඇතැම් වැඩසටහන්වලට ගොස් ආපසු එන්නන් සිනාසී ගෙන එන්නේ ගණ දෙවියන් දැන් තම මිතුරකු බවයි. හවසට ප්ලේන්ටියක් දෙකට බෙදාගෙන බී මචං ලෙවල් එකෙන් කතා කර විභාගයට පෙර පොඩි සංතෝෂමක් ලබා දී වැඬේ කරගන්නට හැකි බව ඔවුන් සිතයි. එසේම තමාගේ වැඬේ වගේම ඇතැම් අය මිතුරන්ටද තම නිවෙසට එන්නට කියා ගණ දෙවියන්ගෙන් ඒ අයගේ වැඩටද උදව් අරගෙන දීමට පෙලඹෙයි. එහෙම බලද්දී ඒ අය වැඩ කරන්නේ ගණ දෙවියන් තමන්ගේ සාක්කුවේ සිටින්නකු ලෙසට සලකමිනි.

මෙය මහා මුළාවකි. දෙවියන්ට අගෞරව කිරීමකි. දෙවියන් නොසලකා හැරීමකි. වඩාත් හොඳින් කල්පනාවෙන් තේරුම් ගතයුතු දෙයක් වෙයි. එනම් ගණ දෙවියන් යාළුකර ගත හැක්කේ දෙවියන්ට ගරු කිරීමෙනි. දෙවියන්ට නම්‍යශීලී වීමෙනි. දෙවියන් කෙරේ භක්තිමත් වීමෙනි. එනිසා ඔබට ගණ දෙවියන්ගෙන් යමක් කරගත යුතු නම් දෙවියන් යාළු කර ගතයුතු නම් පෙර සඳහන් කළ අයුරින් පුද පූජා කරන්න. ගෞරව කරන්න. ඉන්පසු ඔබගේ අවශ්‍යතාවය ඉතා කල්පනාකාරීව මෙනෙහි කර සහනය පතන්න. එවිට දෙවියන් ඔබ කෙරේ අනුකම්පාවෙන් ඔබට පිහිට වෙනු ඇත. ඔබ සමඟ මිතුරු වෙනු ඇත.
ජ්‍යොතිෂවේදී ජයශ්‍රී නන්දකුමාර