රන්ජන් අයියාට හිතේ ලොකු බයක් තිබුණා

මේ දවස්වල කලා ක්‍ෂේත්‍රයේ විවාහ කටයුතු ගජරාමෙට පැවැත්වෙනවා. ඒ අතර දරු සුරතල් බලමින් උපන් දින සැමරුම් ගෙවෙන මේ කාල වකවානුවේ නව පරපුරේ දක්‍ෂ රංගන ශිල්පිනියක් වූ නෙතු ප්‍රියංගිකාද දරු සුරතල් බලන බව අපට ආරංචි වුණා. ඒ නිසා ඇයගේ ජීවිතයට එකතු වුණු ඒ සොඳුරු අත්දැකීම අප සමඟ කතා කළේ මේ විදියට.
නෙතුගේ ජීවිතයට අලුත්ම අත්දැකීමක් එකතු වුණා දැන් ජීවිතය ලස්සන ඇති නේද?
දුකේදීත්, සැපේදීත් අපි සතුටින් ජීවිතයට මුහුණ දුන්නා. හැම දෙයක්ම සුන්දර විදියට ගලාගෙන යන විට තමයි අපේ ජීවිතයට පුංචි කලාකාරිනියක් එකතු වුණේ. ගිය වසරේ තමයි අපි විවාහ වුණේ. මේ වසරේ වෙන කොට මම දැන් දරුවෙක් ඉන්න අම්මා කෙනෙක්.
ඉතින් ඒ රෝස පැටික්කි මුලින්ම දකිද්දී නෙතුට මොන වගේ හැඟීමක්ද දැනුණේ?
මගේ ජීවිතය සුන්දරව සතුටින් තමයි කාලය ගෙවුණේ. නමුත් දරුව දැක්කට පස්සේ වගකීම් රැසක් එක්ක ඉදිරි දිවි පෙවත ගෙවන්න ඕන සිතුවිල්ල මට තදින්ම දැනුණා. ජීවිතය කියන දේ තදින්ම මට දැනුණේ දුව දැක්කට පස්සේ. අපි දෙන්නාගේම ජීවිතයම දැන් ඉතින් දුව තමයි. ජීවිත කාලය ගෙවන කොට කාලයෙන් කාලෙට අපි වෙනස් විය යුතුයි.
ඒ කියන්නෙ ඔබ කලා ක්‍ෂේත්‍රයෙන් දිගුකාලීන සමුගැන්මක්ද මේ?
කලාවට මම හදවතින්ම ආදරෙයි. එහෙත් එහෙමයි කියලා මට වගකීම් නොපිරිහෙළා හරින්න බැහැ. මම දැන් අම්මා කෙනෙක් නිසා දුව වෙනුවෙන් කාලය යොමු කරනවා. ඒ නිසා මේ කාලයේ කලාවට සම්බන්ධ වෙනවා කියලා කියන්න මට බැහැ. මේ සමුගැන්ම තාවකාලික සමුගැන්මක් පමණයි.
දෙදෙනාගෙම එකම බලාපොරොත්තුව තිබුණේ දුවෙක්ටද?
මගෙ නම් ලොකු ආශාවක් තිබුණේ පුතෙක්ට. ඒත් මහත්තයාගේ බලාපොරොත්තුව තමයි ඉෂ්ට වුණේ. ඉතින් දැන් අපි දෙන්නාගේ ජීවිතය මේ පුංචි කැකුළි තමයි.
ඉතින් ඒ රෝස පැටික්කිට දැන් ලස්සන නමකුත් දාල ඇති නේද?
ඔව්. අපි දෙන්නාම කතා කරලා තමයි ලස්සන නමක් දැම්මේ. ඉලේෂ ශානි ගිහාරා කියලා.
කලා ක්‍ෂේත්‍රයට දවසින් දවස තරු බිහිවෙන තරගකාරී වකවානුවක නිර්මාණකරුවන්ට නෙතුව අමතක වෙයිද?
ඇත්තටම, එය වැදගත් ප්‍රශ්නයක්. මම තෝරා බේරා ගැනීමක් ඇතිව හොඳ නිර්මාණවලට සම්බන්ධ වුණා. ඒ මතකය තවමත් හැමෝගෙම හදවත්වල තිබෙනවා. ඒ නිසානේ ඔයාත් මට කතා කළේ. ඉතින් මම හිතන්නේ නැහැ මාව අමතක වෙයි කියලා. හැම දෙයක්ම හොඳ විදියට ඉදිරියට මේ ජීවන ගඟ ගලයි.
නෙතු නෙතුපියන් දිගහැරියේ ‘සිංහාවලෝකන’ චිත්‍රපටය හරහා. නමුත් ප්‍රේක්‍ෂකයන් අතරට ඔබ රැගෙන ගියේ ‘ජීවිතය ලස්සනයි’ චිත්‍රපටය හරහා නේද?
මම මේ ක්‍ෂේත්‍රයට පිවිසියේ සිරස කුමරිය හරහා. ඉන්පසු ‘සමනලී’ ටෙලිනාට්‍යයේ ප්‍රධාන චරිතයක් රඟපෑවා. ‘සිංහාවලෝකනය’ චිත්‍රපටය තමයි මගේ පළමු චිත්‍රපටය. එහෙත් මාව ගොඩදෙනෙක් අතරට ගියේ ජීවිතය ලස්සනට චිත්‍රපටය හරහා තමයි. ඉන්පසු මට නිර්මාණ රැසකින් ආරාධනා ගලාගෙන එන්නට පටන් ගත්තා. ඉදිරියේදී මම සම්බන්ධ වුණු ටෙලිනාට්‍ය අටක් විතර තිබෙනවා විකාශය වීමට.
‘ජීවිතය ලස්සනයි’ චිත්‍රපටයේ රංජන් සමඟ තමයි ඔබගේ රංග කුසලතාව ඉස්මතු කිරීමට අවකාශය උදාවුණේ නේද. ඉතින්?
රංජන් අයියා සුන්දර නිහතමානී කලාකරුවෙක්. ඇත්තටම මගේ හිතෙත් ලොකු බයක් තිබුණා. ඔහු සමඟ රඟපාන්න තියෙනවා කිව්වාම මොකද අපි මේ ක්‍ෂේත්‍රයට අලුත් නිසා. එහෙත් අයියා අපට දුන්න සහාය වචනවලින් කියන්න බැහැ.
පසුකාලීනව රංජන්ට ඇතිවුණු ප්‍රශ්න නිසා ඔහු සමඟ කතාකළේ නැතිද?
එය ඉතින් මට අදාළ දෙයක් නෙවෙයි. නමුත් අපේ සහෝදරත්වය අදටත් තිබෙනවා.
පසුගිය කාලේ එක්තරා නිර්මාණයක ඔබට සුවිශේෂී ඉඩකඩක් ලැබුණා නේද?
මට හිතෙන්නේ එය මට ලැබුණේ වාසනාවකට. අවුරුදු හැත්තෑ පහක විතර මහලු චරිතයක් තමයි මට නිරූපණ කිරීමට තිබුණේ. ඒ නිර්මාණයේ මම චරිත තුනක් නිරූපණ කළා. එය මට අභියෝගයක්. සමහරු කැමැති නැහැ තරුණ කාලේ වැඩිහිටි චරිත නිරූපණය කිරීමට. නමුත් එය මට විශේෂ අත්දැකීමක් වුණා.
වසන්ත විතාරණගේ