සෙලාන් බැංකුව ඇමරිකානු අධ්‍යාපන කේන්ද්‍රය තුළ මර්චන්ට් පෝටල් සේවා ආරම්භ කරයි

සෙලාන් බැංකුව, ඩිජිටල් ගනුදෙනු සිදුකිරීම සඳහා පවතින වඩාත් ආරක්ෂිතම සහ පහසුම පළමු පරිපූර්ණ බහුකාර්ය ඩිජිටල් ගෙවුම් පහසුකමවන සෙලාන් මර්චන්ට් පෝටල් සේවාව ඇමරිකානු අධ්‍යාපන කේන්ද්‍රයට (ANC) හඳුන්වා දී ඇත.

ANC ආයතනයේ එක්සත් ජනපදය සහ ඕස්ටේ්‍රලියානු සාමාන්‍ය සහ පශ්චාද් උපාධි වැඩසටහන් සඳහා එම ආයතනයේ ප්‍රධාන පරිශ්‍රයට ද, අවසන් වසර සිසුන්ගේ SQA සහ UWL වැඩසටහන් සඳහා එම ආයතනයේ මහනුවර සහ මායා මාවතේ ශාඛාවලටද සෙලාන් බැංකුව එම සේවාව පිරිනැමීමට කටයුතු යොදා ඇත. මුළුමනින්ම පාරිභෝගිකයාගේ අවශ්‍යතාව මත සකස් කෙරුණු ගෙවුම් විසඳුමක්වන සෙලාන් මර්චන්ට් පෝටල් සේවාව හරහා ANC වෙබ් අඩවියෙන් ඩිජිටල් මාධ්‍යය ඔස්සේ පහසුවෙන් ගෙවීම් සිදු කළ හැකිය. අලෙවිකරුවන් හට සිය ගෙවීම් පරික්ෂා කිරීමටත්, පාරිභෝගිකයන් හට තමන් සිදු කළ ගෙවීම් පරික්ෂාකර ගැනීමටත් මෙම සේවාව මඟින් හැකි වීම නිසා පාරිභෝගිකයන් හට වඩාත් උසස් පාරිභෝගික අත්දැකීමක් හිමිකර දීමට අලෙවිකරුවන් හට හැකිවේ.

ගෙවීම් ආරම්භ කිරීම සහ සන්නිවේදනය ඩිජිටල්කරණය කර තිබීමද මෙම පහසුකමේ තවත් සුවිශේෂී අංගයක්වන අතර පරිශීලකයාට භාවිතය පහසුවන ලෙස එය නිර්මාණය කර ඇති බැවින් විවිධ සන්නිවේදන ක්‍රම හරහා ගෙවුම් සබැඳි (Links) බෙදාහැරීමට සහ පාරිභෝගිකයන්ට සිහිකැඳවීම් සිදු කිරීමටද හැකියාව ලැබී ඇත.