HNB ඇෂුවරන්ස් ඔබට ගැළපෙන, සුවිශේෂී සෞඛ්‍ය රක්ෂණය, SupremeHealth Max හඳුන්වා දෙයි.

HNB ඇෂුවරන්ස් PLC (HNBA) තම ජීවිත රක්ෂණ සැලසුම් සමග ලබාගත හැකි සුවිශේෂී අමතර ප්‍රතිලාභයක් වන SupremeHealth Max මෑතකදී එළිදක්වන ලදී. මෙම නවතම ප්‍රතිලාභය සමග සේවාලාභීන් හට දේශීයව මෙන්ම ලොව පුරාද ඉහළ තලයේ වෛද්‍ය ප්‍රතිකාර සහ සැත්කම් පහසුකම් සලසා ගත හැක.

HNBA සහ එහි පූර්ණ අනුබද්ධිත HNB General Insurance limited (HNBGI) හි ප්‍රධාන විධායක නිලධාරී වන ප්‍රසන්ත ප්‍රනාන්දු මහතා මේ පිළිබඳව පැවසුවේ “සමාගමක් ලෙස අප අපගේ සේවාලාභී අවශ්‍යතාවයන් මනාව අවබෝධ කරගනිමින් ඔවුන්ගේ ආවේණික රැකවරණ අවශ්‍යතාවයන් සැමවිට සලසා දීමට කටයුතු කරයි. එම අභිලාෂය තවදුරටත් ඉෂ්ට කරමින් අප හඳුන්වාදී තිබෙන මෙම නවතම අමතර ප්‍රතිලාභය අපගේ සේවාලාභියාටත් ඔවුන්ගේ මුළු පවුලටත් පූර්ණ රැකවරණයක් සලසා දෙයි. මෙහි අන්තර්ගත ප්‍රතිලාභ අතර අපගේ සේවාලාභීන්ට තමාගේ වෛද්‍ය අවශ්‍යතාවට සරිලන ලෙස දේශීයව මෙන්ම ලොව පුරා වෛද්‍ය පහසුකම් ද සලසා ගැනීමට අවස්ථාව සැලසීම ප්‍රමුඛස්ථානයක් ගනී. අප ජීවත් වන්නා වූ කාල වකවානුවේ, බොහෝ පිරිස් අක්‍රීය ජීවන රටාවකට නැඹුරු වී ඇත. මේ හේතුවෙන් ඔවුන් බහුල වශයෙන් බෝ නොවන රෝග සහ වෙනත් රෝගාබාධයන්ට ගොදුරු වීමේ ප්‍රවණතාවක් පෙන්නුම් කෙරේ. සමාජ වගකීම හඳුනන්නා වූ රක්ෂණ සේවා සම්පාදකයකු ලෙස අප සැම විටම ක්‍රියාකාරී ජීවන රටාවක් ගත කිරීමට ශ්‍රී ලාංකිකයන් දිරි ගැන්වීමට උත්සුක වේ. ඒ නමුත් අනපේක්ෂිත රෝගී තත්ත්ව හමුවේ අසරණ නොවී සිතේ සමාදානයෙන් දිවි ගෙවීමට අවශ්‍ය මූල්‍ය සවිය සලසා දෙන්නා වූ මෙවැනි සැලසුමක් ශ්‍රී ලාංකිකයන්ට අත්‍යවශ්‍ය බව අපගේ විශ්වාසයයි. මෙම නව ප්‍රතිලාභය සැකසීම සඳහා වෙහෙස වී කටයුතු කරන ලද අප ආයතනයේ අභ්‍යන්තර කණ්ඩායමට මාගේ කෘතඥතාවය පළ කරමි.