රුපියල් බිලියන 11 ක් රටට ඉතිරි කළ සියැට් කැලණි පෙරමුණට

විදේශ විනිමය ඉතිරිකර ගැනීමටත් දේශීය කර්මාන්ත නඟාසිටුවීමට රජය දරන ප්‍රයත්නවලට ප්‍රතිචාරයක් ලෙස මෙරට ට්‍රක්රථ සහ බස්රථ ටයර් අවශ්‍යතාවය සම්පූර්ණයෙන්ම නිපදවීම සඳහා සමාගමේ සියලුම නිෂ්පාදන කර්මාන්තශාලාවල ධාරිතාවය උපරිමයෙන් භාවිතා කරමින් ආනයන ආදේශනය තුළින් විදේශ විනිමය ඉතිරි කර දීමට සියැට් කැලණි හෝල්ඩින්ග්ස් සමාගම ඉදිරිපත් වී ඇත.

මෙරට ටයර් අවශ්‍යතාවයෙන් දැනටමත් අඩකට ආසන්න ප්‍රමාණයක් නිෂ්පාදනය කරන සියැට් සමාගම රජය විසින් තාවකාලිකව පනවා ඇති ආනයන සීමා හමුවේ මෙරට මගී බස්රථ සහ භාණ්ඩ ප්‍රවාහන අංශවල ටයර් අවශ්‍යතාවය සියයට 100ක්ම සමාගමට දේශීයව නිෂ්පාදනය කළ හැකි බව ප්‍රකාශ කරයි.
මේ ආකාරයෙන් පිටරටින් ගෙන්වන ටයර් මෙරට නිපදවීම මගින් වසරකට රුපියල් බිලියන 11ක විදේශ විනිමයක් ඉතිරි කරගත හැකිබව සමාගම සඳහන් කරයි.

‘දේශීය කර්මාන්තයක කාර්ය භාරය වන්නේ මූලික වශයෙන් දේශීය අවශ්‍යතාවය සපුරා අතිරික්තය අපනයනය කිරීමයි. මෙම කාර්ය භාරය සියැට් කැලණි සමාගම වසර ගණනාවක් පුරා සාර්ථකව සිදුකර තිබෙනවා’ යනුවෙන් මේ පිළිබඳව අදහස් දක්වමින් සමාගමේ කළමනාකාර අධ්‍යක්ෂ, රවී ඩඞ්ලානි මහතා පැවසීය.