විසේකාර කෙල්ලන් අතරට එකතු වුණු ඇය චනුෂි දෙව්මිණි. දවසින් දවස විවිධ නිර්මාණ අතරට එකතු වන රුවැත්තියන් අතර මේ දිනවල ඔබට චනුෂි සමීප වෙන්නේ ‘විසේකාරී’ ටෙලි සිතුවමේ නෙත්මිණි චරිතය හරහා. ඇය පුංචි තිරයට අලුත් වුණාට වේදිකාවෙන් කලා ලොවට ආපු ජනප්රිය රංගන ශිල්පිනියක්. ඉතින් චනුෂිගේ කලා දිවියේ වගතුග මේ විදියට අපි කතාබහ කළා.Sri Lanka Latest News
චනුෂි මේ දිනවල ‘විසේකාරී’ සමග ගෙවන ජීවිතය කොහොමද?
හොඳටම හොඳයි. පාරක බැහැලා යන්න බැරි තරමට මගතොටදී හමුවෙන අය නෙත්මිණි ලෙස මාව දැනහඳුනාගෙන කතාබහ කරනවා. සතුටුයි මගේ පළමු ටෙලි අත්දැකීම මේ විදියට අත්විඳින්න ලැබීම ගැන.
චරිතය දුර ගිය තරමට අවසානයේ කොල්ලෙක් කරේ තියාගෙන යන්නත් වුණා නේද?
ඒ අවස්ථාව නම් කවදාවත් අමතක වෙන්නේ නැති තරම්. ජීවිතේ පළමු වතාවට මං කොල්ලෙක් කරට ගත්තේ. ආදරය කරන කොල්ලා මට වඩා කොටයි. ඔහුව රැග් එකෙන් බේරගන්න මට කරේ තියාගෙන යන්න වුණා. මගේ චරිතයට හොඳ පාට්නර් කෙනෙක් තමයි සංගීත් චරිතය රඟපාන දිනුෂ ප්රතිභා. මගේ චරිතයට උපරිම සාධාරණයක් කරන කෙනෙක් ඔහු. මතක සිදුවීම් රැසක් සමග ‘විසේකාරී’ සමග සතුටින් රූගත කිරීම්වලට එකතු වෙනවා.
වේදිකාවේ මේ දිනවල ඔබගේ පෙරළිය කොහොමද?
හොඳින් කරගෙන යනවා. වේදිකාව කියන්නේ මගේ ජීවිතයෙන් එක් කොටසක්. ඒ තරමට මම වේදිකාවට මාරම ආදරෙයි. මොකද මම වේදිකාවෙන් ආපු කලා ශිල්පිනියක් නිසා. මේ දිනවල රවීන්ද්ර ආරියරත්නගේ ‘මිනිහා තමයි මිනිහා’ වේදිකා නාට්යය සමග රට පුරා යනවා. අඛිල සපුමාල්ගේ මගපෙන්වීම යටතේ තමයි මම වේදිකාවට ගොඩවුණේ.
වේදිකාවෙන් පුංචි තිරයට එන අයට හොඳ පිළිගැනීමක් තියෙනවා කියන්නේ ඇත්තද?
අනිවාර්යයෙන්ම එකපාරට ටෙලිනාට්යයකට සම්බන්ධ වෙනවාට වඩා මට වුණත් ලොකු වෙනසක් දැනුණා. මේ වනවිට මම වේදිකා නාට්ය දහයක විතර රඟපාලා තියෙනවා. ඉතින් ඒ නිර්මාණ හරහා මට ජනප්රිය ශිල්පීන් රැසක් හඳුනා ගන්න ලැබුණා. ඒ විතරක් නෙවෙයි ක්ෂේත්රයේ වැඩ කරන ගොඩ දෙනෙක් හඳුනාගත්ත නිසා මට ඉතා පහසුවෙන් සියලු දෙනාගේ සහාය ඇතිව මට පැවරෙන චරිතයට බයක් සැකක් නැතුව කරගන්න ලොකු පහසුවක් දැනුණා.
ටෙලිනාට්යයක සහ වේදිකාවේ ඔබේ රංගන කුසලතාවට ලැබෙන ප්රේක්ෂක ප්රතිචාරවල වෙනස කොහොමද?
ප්රේක්ෂක පිරිසක් ඉදිරියේ හරියට රංගනයක නිරත වෙලා ඔවුන්ගෙන් ඒ මොහොතෙම ප්රතිචාරයක් ලබනකොට මාරම සතුටක් දැනෙනවා. ටෙලිනාට්යයක චරිතයක් නිරූපණය කරලා හැබැයි ලැබෙන ප්රේක්ෂක ප්රතිචාර වැඩියි. මොකද ඒ හරහා ගොඩක් ප්රේක්ෂකයන් අතරට යන්න පුළුවන්. ඔවුන්ගේ ආදරය දිනාගන්න පුළුවන්. ඒ කොහොම වුණත් රංගන ශිල්පිනියක් වශයෙන් මගේ උපරිම සහාය ඉදිරියටත් මම දෙනවා.
‘මේක ආදර කතාවක්’ තුළින් ඔබේ ගමන තවත් සුන්දර වුණා?
2025 රාජ්ය නාට්ය උළෙලේ කෙටි නාට්ය අංශයෙන් රවින්දු සම්පත් වික්රමසේකර රචනා කළ ගයාන් සඳකැලුම් අධ්යක්ෂණය කළ ‘මේක ආදර කතාවක්’ නාට්යයේ ‘සරා’ ප්රධාන චරිතය රඟපෑවේ මම. ඒ වෙනුවෙන් රංග කුසලතාවක් මට ලැබුණා. වේදිකාවේ ලබාගත්ත පළමු ඇගයීම මට මගේ ඉදිරි ගමනට ලොකු ආශීර්වාදයක් වුණා.
ඒ ආදර කතාව ඒ විදියට නිමාවෙන කොට ඔබේ සැඟවුණු ආදර කතාව කොහොමද?
එහෙම ආදර කතාවක් මට දැන් නැහැ. ආදරය කරලා නැහැ කිව්වොත් ඒක බොරුවක්. හැබැයි මම තවම පෙම්වතියක් නෙවෙයි.
පවුලේ එකම දරුවා විදියට යන ගමන රැකගන්නේ කොහොමද?
මට ගෙදරින් කිසිම බලපෑමක් නැහැ. මම යන හැම තැනම මගේ අම්මා මා ළඟින්ම ඉන්න එක මට ලොකු ශක්තියක්. මම නිතරම හිතන්නේ මම ගෙදරින් එළියට බහින්නේ වැඩකට කියලා. අරමුණ අවසන් කරලා ගෙදර එනවා. මඩ ගහන පිරිසක් ඉන්නවා. හැබැයි තමන් ලස්සනට හරියට ගමන යනවා නම් එච්චරයි.
වසන්ත විතාරණගේ
