CLC 2019/20 මුල්‍ය වර්ෂය තුළ ස්ථාවර ප්‍රගතියක් අත්කර ගනියි

අභියෝගාත්මක ආර්ථික තත්ත්වයක් හමුවේ වුවද 29%ක සියලු බදු පසු ලාභයේ ඉහළ වර්ධනයක් පෙන්නුම් කරමින් 2019/20 මූල්‍ය වර්ෂය තුළ දැවැන්ත කාර්යසාධනයක් වාර්තා කිරීමට කොමර්ෂල් ලීසිං ඇන්ඩ් ෆිනෑන්ස් පී.එල්.සී. සමත් විය.

තව දුරටත් සමාගමේ දිගුකාලීන ශක්තිමත් මූල්‍ය ක්‍රියාකාරීත්වය, පරිණත කළමනාකාරීත්වය, මූල්‍ය ක්ෂේත්‍රයේ පුරෝගාමීත්වය, ශක්තිමත් පාරිභෝගික ජාලය සහ ඉහළ අවදානම් කළමනාකරණ පද්ධතිය තහවුරු කරමින් ICRA Lanka මඟින් කොමර්ෂල් ලීසිං ඇන්ඞ් ෆිනෑන්ස් පී.එල්.සී.හි ණය ශ්‍රේණිගත කිරීම (SL) A ස්ථාවර දර්ශකයක් ලෙසට ඉහළ නංවා තිබීමද විශේෂත්වයකි. මෙම මූල්‍ය වර්ෂය තුළම LMD විශිෂ්ට සන්නාම 50 තුළ ඉහළ ස්ථානයක් හිමි කරගත් CLC, ඩිජිටල් මාධ්‍යයන් ඔස්සේ ක්ෂුද්‍ර ඉතිරිකිරීම් (Micro savings) සිදු කිරීම සඳහා ශ්‍රී ලංකා මහ බැංකුවේ බලපත්‍ර ලබා ගත් ප්‍රථම මූල්‍ය සමාගම බවටද පත් විය.

වසර තුළ මූල්‍ය ක්ෂේත්‍රයට අභියෝග කළ අනපේක්ෂිත බලපෑම් රැසක් මධ්‍යයේ CLC, රුපියල් මිලියන 1,547ක බදු පසු ලාභයක් වාර්තා කළ අතර, එය පෙර වසර හා සැසඳීමේදී සියයට 29ක ඉහළ වර්ධනයකි. මෙම මූල්‍ය වර්ෂය තුළදී සමාගමේ අරමුදල් පිරිවැය 8%කින් සහ පොදු කාර්ය පිරිවැය 12%කින් අඩු වීම සමාගමේ නිවැරදි පිරිවැය කළමනාකරණ ප්‍රතිපත්තිවල ප්‍රතිඵලයක් ලෙස දැක්විය හැකිය.