ඔබ වැඩියෙන්ම දන්න දිමුතු මුතු නන්දා

මුවන්පැලැස්ස හෝ
මොණරතැන්න අසන්නට රේඩියෝව වටේට රෑට රෑට වටවුණු රසික රසිකාවියන් හිටි අඩියේ එයින් ඈත් වන්නට ගත්තේ රූප පෙට්ටිය හෙවත් ‘රූපවාහිනිය’ ශ්‍රී ලාංකේය ප්‍රේක්‍ෂකයනට ශ්‍රව්‍ය සේම දෘශ්‍ය වූ වශීකරණයක් වූ නිසාය. රේඩියෝව සදහටම නිවෙස මුල්ලක ගොළුවෙමින් යද්දී නැති බැරිය කියන මිනිසුන් පවා කාට හෝ ණය වී අඟල් 12 රූපවාහිනියක් හෝ ගෙදරට ගෙනාවේය. මෙහිදී බොහෝදෙනකු පළමුව හුරුවූයේ ඉංග්‍රීසි ටෙලිනාටක අබියස රාත්‍රිය ගෙවීමටය. ඉංග්‍රීසි වදනක් හෝ නොදන්න අය පවා ‘ස්ටාස්කි ඇන්ඞ් කම්’ සහ ‘චාල්ස් ඒන්ජල්ස්’ නොකඩවා බැලූහ. 1982 වසරේදී ඩී. බී. නිහාල් සිංහයන් ‘දිමුතු මුතු’ ගෙන ආයේ ඔය අතරදීය. බාල, තරුණ, මහලු කොයි කවුරුත් වයස් බේදයකින් තොරව ශ්‍රී ලාංකේය ටෙලිනාට්‍ය කලාවවේ ඒ සොඳුරු උපත ඉදිරියෙහි අමන්දානන්දයට පත්වූයේ ‘බණ්ඩා කොළඹ ගියා’ ආකාරයේ පුදුමයක තම සිත දැහැන්ගත කරලමිනි. ‘දිමුතු මුතු’ නැරැඹූ ප්‍රේක්‍ෂකයන් පමණක්ම නොව ‘දිමුතු මුතු’ හී රඟපෑ රංගන ශිල්පීන්ද ‘දිමුතු මුතු’ හරහා තම කලාකාමී දිවිරටාව ඉතා අලංකාරව හැඩකර ගනිමින් සිටියහ. ‘දිමුතු මුතු’ නම් ඒ මුතු අහුරෙහි ආකර්ෂණීයම ‘මුතු ඇටය’ වූයේ ‘නන්දා’ ලෙස රංගනයෙන් දායක වූ දේවිකා මිහිරාණිය. ‘දිමුතු මුතු’ ටෙලිය ගැන දේවිකා මිහිරාණි කී මුතුවන් කතා ‘හාට්’ විශේෂාංගය සැරැසුවේ මෙලෙසිනි.
මතකයිද? ‘දිමුතු මුතු’ විකාශනය වූ ඒ පළමු බදාදා රාත්‍රිය?
ඒ රාත්‍රිය අමතක කරන්න නම් ඉතින් නන්දා වෙන්න මම මැරිලා උපදින්න ඕනෑ.
එච්චරටම ඒ මතකය ඔබට අමරණීයයි?
මොනවද මේ කියන්නේ. පළමුවරට ‘දිමුතු මුතු’ විකාශනය වූ දාට පහුවදා කඩපිල් ගානේ, බස් නැවැතුමේ, දුම්රියේ, ප්‍රධාන කතා වස්තුව වුණේ ‘දිමුතු මුතු’ ටෙලිනාට්‍යය ගැන රසවත් ඕපාදූපයි. ඇත්තටම එය ප්‍රේක්‍ෂකයනට අපූරු මැජික් එකක් වුණා. හිතන්නකෝ ශ්‍රී ලංකාවේ පළමු ටෙලි කතාව එයනේ.
නිහාල්සිංහ මහත්තයා නන්දාගේ චරිතයට ඔබව තෝරාගත් බව කියනකොට මොනවද හිතුණෙ?
පුදුමාකාර තුෂ්ණිම්භූතවයි මම හිටියේ. එක අතකින් පළමු ටෙලි නිළිය වීමේ සතුට, අනෙක් අතින් ප්‍රසිද්ධ ලස්සන නිළියන් අච්චර හිටියදී මාව නන්දට තෝරා ගැනීම. මට මතකයි මම නිහාල්සිංහ මහත්තය දිහාවේ ටිකක්වෙලා බලාගෙන හිටියා. ඔහු මගෙන් ඇහුවා ඇයි දේවිකා පුදුමෙන් වාගේ කියලා. මම ඇස්වල කඳුළු පුරවගෙන කිවුවා, ‘පුදුම නොවී කොහොමද? මෙච්චර මේ රටේ හැඩකාර නිළියෝ ඉන්දැද්දි ඔබතුමා මාව හොයාගෙන ආව එක පුදුමයක් තමයි’ කියලා.
නිහාල්සිංහ මහත්තයා ඔබව තෝරාගන්න විශේෂය කුමක්ද?
මම කී වතාවක් නම් ඒ ප්‍රශ්නය ඇහුවද? ඒත් ඔහු එයට උත්තර දුන්නෙ නැහැ. ඔහු කීවේ අනේ මන්දා දේවිකා ඒ හේතුව මමවත් දන්නෙ නැහැ කියලයි.
මොණරියක තරමට ඔබ ඒ කාලේ ආඩම්බරේට හිටියලු?
අයියෝ නැහැ. ඒක නම් අලි බොරුවක්. මඟතොටදී ප්‍රේක්‍ෂකයන් මාව වටකර ගනිද්දී මම ඒ හැමෝම එක්ක කතා කළා. ඔවුන් නන්දාට දැක්වූ ආදරය ගැන මට අදටත් පුදුමයි.
මේකප් නැති, ඇඟ පේන්න අඳින ඇඳුම් නැති, පාට පාට වාහන වගේම නවීනපන්නයේ තෙල් ගාන්නේ නැති ‘දිමුතු මුතු’ නාට්‍යයට ප්‍රේක්‍ෂකයන් වශීවී සිටියා.
ඒ රහස මොකද්ද දේවිකා?
ටෙලි කලාව බාල්දුවට නොගිය අගය තමයි ඒ රහස. දවසකට එක ටෙලි කතාවයි විකාශනය වෙන්නෙ. හතු බිහිවෙන්නා සේ තත්පරයෙන් තත්පරයට ටෙලිනාට්‍ය විකාශය වූ කාලයක් නෙවෙයි ඒ. බදාදා රෑට ‘දිමුතු මුතු’ බලන ප්‍රේක්‍ෂකයා ඊළඟ බදාදා වෙනකල් බලා ඉන්නවා ඊළඟ කොටස බලන්න. ‘දිමුතු මුතු’ විතරක් නෙවෙයි, එයට පසු තිරගත වූ පළිඟු මැණිකේ, රේඛා, දූදරුවෝ වැනි ටෙලි කතාද විකාශනය වූයේ සතියට එක වතාවයි. ඒ නිසයි ඒ ටෙලිනාට්‍යය බලන්න ඒ තරමට ප්‍රේක්‍ෂකයා උනන්දු වුණේ.
‘නන්දා’ විදියට කොණ්ඩෙ පීරන්න, අඳින්න, පලඳින්න, තරුණියෝ උනන්දු වුණා කියන්නේ ඇත්තද දේවිකා?
නැතුව… නන්දාගේ චාම් විලාසිතා ඒ කාලේ ටීචර්ස්ලා හිටන් අනුකරණය කළා. කොණ්ඩ ගෙඩිය බෙල්ලට තියලා බැඳලා අත්බෝරිච්චි හැට්ටය ඇඳලා ඔසරිය ඇඟට දවටලා ඔවුන් තුළින් ඒ අය හෙව්වෙ ‘නන්දා’ව. ඒ විතරක්ම නෙවෙයි සමහර වැදගත් පවුල්වල අම්මලා, කපු මහත්වරුන්ට කිව්වලු ‘දිමුතු මුතු’ එකේ නන්දා වාගේ මනමාලියක් මගෙ පුතාට හොයන්නය කියලා. කපු මහත්තයලත් සමහර තැන්වලදී කියන්න පුරුදු වුණාලු ඇස්වහක්, කටවහක් නැහැ නෝනා, මනමාලි අර ‘දිමුතු මුතු’ කතාවේ ‘නන්දා’ කෙල්ල වාගේමයි කියලා.
‘නන්දා’ට පෙම් බැන්ද පිරිමින් ඒ අතර ඉන්න ඇති?
කිසිම රසිකයෙක් නරක ඇහැකින් මං දිහා බැලුවේ නැහැ. හැබැයි ඔවුන් අසීමිතව මගේ චරිත නිරූපණයට ඇලුම් කළ බව මතකයි.
විජය නන්දසිරිට ජෙලස් හිතුණෙ නැතිද?
අනේ නැහැ. ‘දිමුතු මුතු’ හී නන්දාට සාර්ථකව ප්‍රවිෂ්ට වෙන්න විජය මට දුන් අත්වැල හරිම ආදරණීයයි.
ප්‍රේක්‍ෂකයන්ට ඕන වුණේ ඔබ ජයසේනට ආදරය කරනවා දකින්නලු?
‘උඩුකිඳ මහත්තයාටත් සමහරු අනුකම්පා කළා. ඒත් ප්‍රේක්‍ෂකයන් හුඟක් ආදරය කළේ ජයසේනට තමයි. අමරසිරි කලංසූරිය ඒ චරිතය කළ අපූරුව ඔවුන් බොහෝ අගය කළා. ඒ වගේම ‘දිමුතු මුතු’හී රංගනයෙන් දායක වූ හැමෝම තම වගකීම අපූරුවට ඉටුකළා.
අද ඒ ප්‍රමිතිය හෝ විනය නැති බවද ඔබ කියන්නේ?
කාටවත් චෝදනා කරන්න කැමැති නැහැ. හැබැයි අද ටෙලි කලාව ගැන කතා කරන්නත් කනගාටු හිතෙන තරමට එය ප්‍රමිතිකරණයෙන් බැහැරට ගිහින්. අතළොස්සක් ටෙලි නිර්මාණ හැරුණු විට නිතර බිහිවන්නේ හරයක් නැති අනුකරණයන් පමණයි.
දමයන්ති රේණුකා ප්‍රනාන්දු