‘කොළඹ නරග සභාව අපේ. කොළඹ නගර සභාවේ හැමදාම ලෙළදුන්නේ කොළපාට කොඩි. මේක වාමාංශිකයන්ට දීලා අපිට ඇස් කන් වහගෙන ඉන්න පුළුවන්ද…?’Sri Lanka Latest News
මේ, 1955දී එවක අගමැති සහ යූ.ඇන්.පී. නායක සර් ජෝන් කොතලාවල කෝපයෙන් වෙවුලමින් කී කතාවය.
සර් ජෝන්ට කේන්ති ගියේ යූ.ඇන්.පී. අගමැතිවරයෙක් යූ.ඇන්.පී. ආණ්ඩුවක් බලයේ සිටියදීත් හැමදාම යූ.ඇන්.පී.ය දින්න යූ.ඇන්.පී.යේ හදවත වන් කොළඹ නගර සභාව වාමාංශිකයන් අතට යෑම ගැනය. කොළඹ නගරාධිපති වූයේ එසේ මෙසේ වාමාංශිකයෙක් නොවේ. වාමාංශික දේශපාලනයේ පතාක යෝධයෙක් වූ රත්තරන් මොළයක් කී ඩබල් ඩොක්ටර් ඇන්.ඇම්. පෙරේරාය. එකල සර් ජෝන්ලාට ජේ.ආර්.ලාට, ඩඩ්ලිලාට ඇන්.ඇම්. වහ කදුරු විය. මේ කාලය වනවිට ඩඩ්ලි අගමැති ධුරයෙන් ඉවත්වී දේශපාලනයෙන් ඈත්ව සිටියේය.
‘අපිට කොළඹ නගර සභාවේ බලය ගන්න ප්ලෑන් එකක් එක්ක නාගරික මන්ත්රීවරයෙක් අපේ නගර සභා කට්ටියට කතා කරලා තියෙනවා. ඔබතුමා එහෙම කතා කරන්න කැමැතිද?’
එකල යූ.ඇන්.පී. මහලේකම් අමරසූරිය, සර් ජෝන්ට කීවේ සර් ජෝන්ව කූල් කරන්නටය.
‘මොකා හරි කමක් නැහැ අරන් එන්න. ඔහෙලාට ඕක කරන්න බැරි නම් අපි මිනිහට ඔය වැඩේ බාරදෙමු…’
සර් ජෝන් කීවේය.
‘කවුද මිනිහා…?’
සර් ජෝන් විමසුවේය.
‘ප්රේමදාස කියලා කෙනෙක්…’
යූ.ඇන්.පී. මහලේකම් කීවේය.
‘මම මිනිහට කතා කරන්නම්. ඇන්.ඇම්.ව කොහොම හරි පන්නනවලා…’
සර් ජෝන් ගුගුලේය.
ඒ වනවිට රණසිංහ ප්රේමදාස ඒ.ඊ. ගුණසිංහගේ කම්කරු පක්ෂයෙන් ශාන්ත සෙබස්තියන් වෝඩ් එකෙන් නගර සභාවට තේරීපත්වී නාගරික මන්ත්රීවරයෙක්ව සිටියේය. කෙහෙල්වත්තේ පුංචි පවුලකින් ආ පුංචි ප්රේමදාසට ඒ.ඊ. ගුණසිංහගේ කම්කරු පක්ෂයේ දොරටු විවෘත වුණාට කොළඹ හතේ කුරුඳුවත්තේ ප්රභූ පන්තියේ සිරිකොත ගේට්ටු විවෘත කරගැනීම ලෙහෙසි නොවන බව ප්රේමදාස දැන සිටියේය.
ප්රේමදාස මේ මාස්ටර් ප්ලෑන ගැහුවේ ඒකටය. හැබැයි ප්රේමදාස මේ මාස්ටර් ප්ලෑන් එක ගැහුවේ අත ලෙවකන්න නොවේ. ඔහු එකල තරුණයෙකි. ඔහුට උපනගරාධිපති ධුරය ඕනෑ විය.
‘මිනිහා කෙහෙල්වත්තේ කොල්ලෙක්. ඒ කොල්ලා ගැන විශ්වාසය තියන්න පුළුවන්ද…?’
නගර සභාවේ යූ.ඇන්.පී.ය මෙහෙයවන නායකයා මහලේකම්ගෙන් ඇසුවේය.
‘මම ඒ තරුණයාව දන්නේ නැහැ. හැබැයි අපේ නාගරික මන්ත්රීවරු කියනවා වැඩකාරයෙක් කියලා….’
මහලේකම් කීවේය.
‘යූ.ඇන්.පී.යෙන් විශ්වාසභංගයක් ගේන්න. ඉතිරි ටික මම බලාගන්නම්…’
ඉතිහාසයේ පළමු වරට කොළඹ හතේ කුරුඳුවත්තේ ප්රභූ පන්තියේ සිරිකොතට පයගැසූ කෙහෙල්වත්තේ නාගරික මන්ත්රී කොල්ලා නොහොත් ප්රේමදාස කීවේය. යූ.ඇන්.පී.ය මේ නිර්ප්රභූ කෙහෙල්වත්තේ කොල්ලා කියන දේ අහලා විශ්වාසභංගය ගෙන ආවේය.
ඇන්.ඇම්. විශ්වාසභංගයට එරෙහිව අධිකරණයට ගියේය. අධිකරණයේ තීන්දුව ලැබීමට නියමිතව තිබුණේ විශ්වාසභංගය විවාද කරන දිනයේදීමය. අධිකරණ තීන්දුව එන තෙක් විශ්වාසභංගය ඇදගෙන යන්න ඇන්.එම්. ගේම් එකක් ගැහුවේය. එනම් සමසමාජ පතාකයන් වූ ඔස්මන්ඩ් ජයරත්න, බර්නාඩ් සොයිසා සහ ජේ.ඊ. දේවපුරට විවාදයේදී කතාකරන්න පැය ගණන් කාලය දුන්නේය. වැඩේ හරි ගියේ නැත. වාමාංශික දේශපාලනයේ පතාකයා ඩබල් ඩොක්ටර් ඇන්.ඇම්.ගේ ඇස් පුදුමයට පත්කරමින් ඇන්.ඇම්. පරදවන විශ්වාසභංගයට සහාය දෙන්න ප්රේමදාස කොමියුනිස්ට් පක්ෂයෙන් කොටහේනට තේරීපත්වූ ඇන්තනී මාර්ෂල්ගේ සහ තවත් අයෙක් ආණ්ඩු පක්ෂයෙන් විපක්ෂයට ගත්තේය. වැඩි ඡන්ද දෙකකින් විශ්වාසභංගය පරාජය විය. ඒ මොහොතේම යූ.ඇන්.පී.ය කොළඹ නගර සභාවේ කොළ කොඩි ඉස්සුවේය. උපනගරාධිපති ජේ. රුද්රාව ඉවත් කරගෙන ප්රේමදාස උපනගරාධිපති විය.
‘මිනිහා දක්ෂයා. මිනිහව යූ.ඇන්.පී.යට ගන්න…’
කොළඹ නගර සභාව කොළ පාට වූ බව දැන අගමැති සහ යූ.ඇන්.පී. නායක සර් ජෝන් කීවේය. ජේ.ආර්. ඔළුව වැනීය.
එහෙව් තාත්තාගේ පුතා සජිත් ප්රේමදාස 1955 ඇන්.ඇම්.ට කොළඹ නගර සභාව ගියාට පසු ජවිපෙට ගිය කොළඹ නගර සභාව බකල් කරන්න පසුගියදා මාර ගේමක් ගැහුවේය. ඒ රනිල්ගේ යූ.ඇන්.පී.ය නාමල් රාජපක්ෂගේ පොදුජන පෙරමුණ, නිමල් සිරිපාලගේ ශ්රීලනිපය, දිලිත් ජයවීරගේ සර්ව ජන බලය, චම්පික රණවකගේ ජනරජ පෙරමුණ එකට එකතු කරලාය. තවත් ස්වාධීන කණ්ඩායම් ඒ ගේමට එකතු විය. ගේම ගහන වැඩේ භාරගත්තේ මුජිබර් රහුමාන්ය.
පසුගිය පුංචි ඡන්දයේදී කිසිදු පක්ෂයකට කොළඹ නගර සභාවේ බලය පිහිටුවීමට බහුතර බලයක් තිබුණේ නැත. ඒ වෙලාවේ කොළඹ නගර සභාවේ බලය ගන්න වැඩේ සජිත් මුජිබර්ට භාරදුන්නේය. ඒත් ජවිපෙ ආණ්ඩුව නගර සභාවේ ස්වාධීන මන්ත්රීවරුන්ට වරදාන වරප්රසාද දී බුරියානි කන්න දී තරු පහේ හෝටල්වල තියලා බාගෙන ජවිපෙ හිතවාදී නාගරික කොමසාරිස්ගේ බලය යොදවාගෙන කොහොම හරි කොළඹ නගර සභාවේ බලය පිහිටුවා ගත්තේය. ජනාධිපති අනුර ගේමට ඍජුවම මැදිහත් විය. අනුර ගහපු ගේම ඉදිරියේ සජිත් සහ මුජිබර් අසරණ විය.
1954 යූ.ඇන්.පී.යට නගර සභාව නැතිවුණේ 1956 මහ රැල්ලට පෙරමග කියමිනි. 1956 එන රැල්ල ඒ වෙනකොට හැදිලා ඉවරය. ඒ රැල්ලට සර් ජෝන්ට හෝ යූ.ඇන්.පී.යට මුහුණ දීමට නොහැකි විය. ඇන්.ඇම්.ලා පළමු වරට කොළඹ ඇතුළු නගර සභා ගණනාවක් දින්නේ 1956 රැල්ලට පෙරමග ලකුණු පෙන්වමිනි.
සජිත්ගේ සමගි ජන බලවේගය 2025 පුංචි ඡන්දයට මුහුණ දුන්නේ 2024 ජවිපෙ මහා සුනාමියට පසුවය. යූ.ඇන්.පී.ය වෙනම ඉල්ලා කකුලෙන් අදිද්දී ඒ සුනාමියට මුහුණදී නගර සභාව බේරාගැනීම දුෂ්කර විය.
හැබැයි 1956 එන්න නියමිත රැල්ල උඩුගං බලා පිහිනා ප්රේමදාස යූ.ඇන්.පී.යට නගර සභාව හිමිකර දුන් තාත්තාගේ පුතා සජිත් මෙවර ජවිපෙ නගර සභාවේ අයවැය පරාජය කොට නගර සභාව යළිත් කොළ පාට කළේ රනිල්ගේ කොළ පැහැය, නාමල් රාජපක්ෂගේ රතු පැහැය, නිමල් සිරිපාලගේ සහ දිලිත් ජයවීරගේ නිල් පැහැය, චම්පික රණවකගේ පක්ෂ පැහැය මිශ්ර කරමිනි.
‘කෙහෙල්වත්තේ තරුණයා දක්ෂයි. ඔහුව යූ.ඇන්.පී.යට ගමු…’
එදා සර් ජෝන් කීවේය.
‘සජිත් ගේම ගැහුවා. අපි යූ.ඇන්.පී.-සජබ එකතු කරලා නායකත්වය සජිත්ට දෙමු…’
රනිල් නම් එහෙම කියයි කියලා හිතන්න බැරිය.
