සේද මාවත දිගේ සිනමාවට ආපු අංජුමාලා

තාලයට අඩිය තියමින් රටක් වසඟයට පත්කරමින් දෙනෝදාහකගේ ආදර දිනා ගත්තා. ඇය පසුකාලීනව ‘සිඳූ’ ටෙලිනාට්‍යය ගයනි හරහා රංගන ශිල්පිනියක් වුණා. ඉතින් දැන් රිදී තිරයේද පෙම් බඳින හර්ෂි අංජුමාලා සමඟ අප සිදු කළ කතාබහයි මේ.
‘සේද මාවත’ චිත්‍රපටයේ හිරුණිට ලැබෙන ප්‍රතිචාර ගැන කතා කළොත්?
‘සේද මාවත’ චිත්‍රපටය තිරගත වුණු මුල් කාලවල බොහෝ දෙනෙක් චිත්‍රපටය නරඹලා තිබුණා. සිනමාවට ආදරය කරන අයට වෙනස්ම අත්දැකීමක් ‘සේද මාවත’ චිත්‍රපටය. ඒත් තිරගතවෙලා දින කිහිපයකට පසු ලෝකයට බලපාපු කොරෝනා වෛරසය සිනමාවටත් බලපෑවා. ඒ නිසා අතරමඟ ‘සේද මාවත’ චිත්‍රපටයටද ඒ ප්‍රශ්නයට මුහුණපෑමට සිදුවුණා. ඉතින් නැවැතත් ‘සේද මාවත’ චිත්‍රපටය තිරගත වෙනවා.
පුංචි තිරයේ පෙම් බැන්ද හර්ෂි අංජුමාලා සිනමාවට එකතු වුණේ කොහොමද?
‘සේද මාවත’ චිත්‍රපටයට දායක වීමට මට අවස්ථාව උදා වුණේ අනුජ් රණසිංහ අයියා හරහා තමයි. ඔහු මම ගැන හර්ෂ උඩකන්ද අයියාට කියලා තිබුණා. මගේ හිතේ ආශාවක් තිබුණා සිනමා නිර්මාණයකට දායක වීමට. ඒත් මම හිතුවේ නැහැ මේ තරම් ඉක්මනට මට ඒ අවස්ථාව උදාවෙයි කියලා.
ඔබේ පළමු සිනමා රංගනය ‘සේද මාවත.’ එය අභියෝගයක් වුණාද?
ඇත්තටම ඔව්. මුළු චිත්‍රපටයම මට වෙනස්ම අත්දැකීමක්.
හර්ෂි වැඩිපුර කැමැති සිනමාවටද, එහෙමත් නැතිනම් ටෙලිනාට්‍ය කලාවටද?
මේ ක්‍ෂේත්‍රයේ ඉන්න ඕනැම කෙනෙක් කැමැති හොඳ චිත්‍රපට අධ්‍යක්‍ෂවරයකුගේ හොඳ නිර්මාණයකට සම්බන්ධ වීමට. ඉතින් ඒ වගේ ආශාවක් මටත් තිබුණා. වර්ග භේදයකින් තොරව හොඳ නිර්මාණවලට සම්බන්ධ වීම තමයි මගේ අදහස.
නැවැතත් හර්ෂි සිනමා නිර්මාණයකට දායක වුණා නේද?
ඔව්. ආරියරත්න ඇතුගල අධ්‍යක්‍ෂණය කරන ‘සහෝ’ චිත්‍රපටයේ මම ප්‍රධාන චරිතය රඟපානවා. මෙතෙක් කල් මම කිසිම නිර්මාණයක රඟ නොපාපු වෙනස්ම රංගනයක් ‘සහෝ’ චිත්‍රපටය හරහා දැකගන්න පුළුවන් ඉදිරියේදී.
හිටිහැටියේම ‘සිඳු’ ටෙලිනාට්‍යයෙන් ඉවත් වුණේ ඇයි?
‘සිඳු’ ටෙලිනාට්‍යයෙන් මම ඉවත් වෙලත් නැහැ, ඉවත් කරලත් නැහැ. ඉදිරියේදී ‘සිඳු’ එකේ මම ඉන්නවා. මුළු රටම මාව දැනහඳුන ගත්තේ ‘සිඳු’ ටෙලිනාට්‍ය හරහා තමයි. ඉතින් ඇයි මම එහෙම දෙයක් කරන්නේ. කවදාවත් මුල අමතක කරන කෙනෙක් නෙවෙයි මම.
එකම අධ්‍යක්‍ෂවරයෙක්ගේ නිර්මාණ දෙකක වැඩ නේද මේ දවස්වල?
තිළිණ බොරලැස්ස අයියා තමයි මාව ‘සිඳු’ ටෙලිනාට්‍යයට සම්බන්ධ කරගත්තේ. ඔහුගේ ‘සිහින සමාගම’ ටෙලිනාට්‍යයටත් මාව සම්බන්ධ කරගත්තා. මම ‘සිඳු’ ටෙලිනාට්‍යයට අසාධාරණයක් කළා නම් තිළිණ අයියාගේ අලුත් නිර්මාණයට මාව ගනියිද?
හර්ෂි දැන් පෙම්වතියක් නේද?
මම දැන් පෙම්වතියක්. විවාහ යෝජනාවක් හරහා තමයි අපේ ආදර කතාව පටන්ගත්තේ.
එතකොට ළඟදි විවාහය සිදුවෙනවා කියන්නේ ඇත්තද?
එහෙම අදහසක් තියෙනවා. නමුත් මගේ අධ්‍යාපන කටයුතු අවසන් කරගන්න ඕනෑ මුලින්ම. බොහෝ දුරට ලබන වසරෙදි අපේ විවාහ කටයුතු සිදුවේවි.
වසන්ත විතාරණගේ