ශ්‍රී ලංකා ඉන්ෂුවරන්ස් ගුවන් විදුලි සංස්ථාව සමග එක්වෙයි

දේශීය ගුවන් විදුලි විකාශන ක්ෂේත්‍රයේ දැවැන්තයා ශ්‍රී ලංකා ගුවන් විදුලි සංස්ථාවේ නවමු ක්‍රියාවලිය සඳහා සහය වෙමින් Studio 6 6 සුභාවිත සංගීත වැඩසටහන සඳහා අනුග්‍රහය දැක්වීමට ශ්‍රී ලංකා ඉන්ෂුවරන්ස් එක්ව තිබේ.
ශ්‍රී ලංකාවේ සංගීත ක්ෂේත්‍රයේ ස්වර්ණමය යුගය ආවර්ජනය කරමින් සංගීත ක්ෂේත්‍රයේ උන්නතිය උදෙසා දක්වන ලද දායකත්වය හඳුනාගනිමින් ඔවුන් සඳහා උපහාර දැක්වීම මෙම වැඩසටහන ඔස්සේ සිදුවේ.

ගුවන්විදුලි සංස්ථාවේ පැරණිතම ගුවන්විදුලි මැදිරියක් ලෙස විචිත්‍රවත් ඉතිහාසයකට උරුමකම් කියන ස්ටුඩියෝ 6 සුභාවිත ගීත රාශියක් සඳහා පටිගත කිරීමේ පහසුකම් සපයා ඇති අතර ගේය පද රචකයන්ගේ සිට සම්මානනීය සංගීතඥයන් හා ගායකයන් දක්වා ඔවුන්ගේ විශිෂ්ට නිර්මාණ සඳහා දායක වී තිබේ.

මෙම වැඩසටහන් මාලාවේ පළමු වැඩසටහන ප්‍රවීණ ගීත රචක කුලරත්න ආරියවංශයන් හට උපහාර පුදකරමින් පසුගියදා පවත්වන ලද අතර මෙම අවස්ථාව සඳහා රෝහණ වීරසිංහ, දිලීප අබේසේකර, ටී.එම්. ජයරත්න, බන්දුල නානායක්කාරවසම් සහ සුනිල් සරත් පෙරේරා යන ප්‍රවීණ කලාකරුවන් සහභාගි විය.

සුභාවිත සංගීතයට ඇලුම්කරන සියලුම ශ්‍රී ලාංකිකයින්ට සෑම ඉරිදාවකම පස්වරු 5.00ට 89.6 හෝ 89.8 යන ශ්‍රවණ සංඛ්‍යාත ඔස්සේ City FM ගුවන්විදුලි නාලිකාවට සවන්දීමෙන් හෝ ශ්‍රී ලංකා ඉන්ෂුවරන්ස් නිල ෆෙස්බුක් පිටුවට පිවිස වීඩියෝව නැරඹීමෙන් හෝ මෙම සංගීත අත්දැකීම විඳ ගැනීම සඳහා එක්විය හැක.