කට්ට කළු කෙහෙල් සුසාගේ පැටිකිරිය

ඈවරයි, දෑවරයි, තුන් ඈවරයි කියලා කඩන් පනින කෙහෙල් සුසා මේ දවස්වල අලුත් වැඩකට අත ගහලා කියලා ආරංචි වුණා. ඒ වුණත් කෙහෙල් සුසාට ලැබෙන ප්‍රතිචාර තවමත් ඒ විදියමයි. කෙහෙල් සුසා කළු වුණේ කොහොමද කියන එක පසුගිය කාලේ ගොඩක් අයට තිබුණු ප්‍රශ්නයක්. ඒත් කෙහෙල් සුසා කළු වෙන විදිය බලාගන්න ෆේස් බුක් හරහා පසුගිය දවසක අවස්ථාව ලැබුණා. කෙහෙල් සුසාගේ වැඩ වගේම අලුතින් පටන් ගත්ත වැඬේ ගැනත් තොරතුරු දැන ගන්න අපි සාරංගට කතා කෙරුවා.
පසුගිය කාල වකවානුව තුළ සාරංග වැඩිපුර කාලය ගතකළේ විදේශීය රටවල තමයි. එයින් නිර්මාණ බොහොමයක් අතපසු වන්නට ඇති නේද?
ඇත්තටම පසුගිය කාලේ විදේශීය ප්‍රසංග සඳහා තමයි මම යොමුවෙලා හිටියේ. මම ප්‍රසංග සඳහා ගායනයෙන්, නර්තනයෙන්, ප්‍රචාරක පූර්වකවරයකු ලෙසටද කටයුතු කරනවා. හැම අංශයයෙන්ම ප්‍රසංගවල කටයුතු කරන නිසා ආරාධනා එනවා විදේශීය ප්‍රසංගවලින්.
සියලුම වැඩකටයුතු අතර සාරංග නැවැත විවාහ වීමට සැලසුම් කරනවා නේද?
සැලසුම් කරගෙන ආපු සියල්ල කොරෝනා වසංගතය නිසා ඇන හිටියා. තවම එය ගැන හිතලා නැහැ. ඉදිරියේදී ඒ සියල්ල හෙමීට සැලසුම් කරගෙන යනවා.
‘ලංසුපතිනියෝ’ හරහා ඔබ නිර්මාණ නිෂ්පාදන පැත්තට යොමු වුණා. ඉදිරියටත් නිෂ්පාදන පැත්තෙන් යොමුවීමට ඔබේ අදහසක් තිබෙනවාද?
කලාව මගේ වෘත්තිය. එය ඉදිරියට රැගෙන යෑමට අපි නිර්මාණ බිහි කළ යුතුයි. ඉතින් ඉදිරියේදීත් මම ටෙලිනාට්‍ය නිෂ්පාදන කටයුතු කරාවි හොඳ නිර්මාණ පිටපත් ලැබුණොත්.
‘ආදර හෝඩිය’ හරහා ‘අම්මාගේ ආදරය’ ගැන ඔබේ හඬින් ගායනා කරනවා නේද? අම්මා වෙනුවෙන්මද එය ගායනා කරන්නේ?
මගේ අම්මා වෙනුවෙන් වගේම ලෝකවාසී සියලුම අම්මාවරුන් වෙනුවෙන් තමයි මම ‘ආදර හෝඩිය’ ගායනා කරන්නේ. අලුත් ගීත කිහිපයක් නිර්මාණය කිරීමට සැලසුමක් තිබෙනවා. රූගත කිරීම් සඳහා ලොකු කාලයක් යොමු කරන නිසා ගායනය පැත්තෙන් යමක් කිරීමට ප්‍රමාද වූයේ ඒ හේතුව නිසා තමයි.
පසුගිය කාලේ රටේ තිබුණු කොරෝනා වසංගතය නිසා නිර්මාණ කිහිපයක් අතරමග නතර වුණා. ඒ අතර ‘ලංසුපති’ ඒ ප්‍රශ්නයට මුහුණපෑවා. නැවැත ලංසුපතිනියෝ විකාශය වෙනවා. එය ගැන යමක් පැවසුවොත්?
කොරෝනා වසංගතය නිසා මුළු ලෝකයම කඩාවැටුණා. එය කනගාටුවට කරුණක් ලෙසට සඳහන් කරන්න මම කැමැතියි. නිර්මාණ අතරමඟ නතර වීම නිසා තමයි විකාශය වුණු නිර්මාණ නැවැත විකාශය කළේ. දැන් ඒ සියල්ල හොඳ අතට පත්වීම නිසා සියලුම දෙනාටම වැඩකටයුතු කිරීමට සුදුසු වාතාවරණයක් දැන් තිබෙනවා. ලංසුපතිනියෝ රූගත කිරීම් කටයුතු අවසාන හරිය සිදුකළා. එහි අවසාන කොටස් කිහිපය තමයි මේ දවස්වල විකාශය වෙන්නේ.
‘බොඳ මීදුම්’ ටෙලිනාට්‍ය හරහා ඔබව මල්මාවතකට රැගෙන ගියා. නැවැතත් බොඳ මීදුම් ටෙලිනාට්‍ය විකාශය වෙනවා. එදා සහ අද ඔබට එය දැනෙන වෙනස කොයි වගේද?
‘බොඳ මීදුම්’ ජනප්‍රිය නවකතාවක් බවට පත්වුණා. ඒ හරහා බොඳ මීදුම් රූප රචනයට නැඟුණා. මම හිතුවාටත් වඩා සාර්ථක ප්‍රතිචාර ලැබුණා. ඒ හරහා මම ජනප්‍රිය නළුවා අතරටද පත්වී සම්මාන හිමිවුණා. ඒ තරමට වයස් භේදයකින් තොරව බොඳ මීදුම් නරඹපු පිරිසක් හිටියා. ඉතින් නැවැතත් බොඳ මීදුම් විකාශය වුණා. එය නැවැත විකාශය වන බව මම දැනගෙන හිටියේ නැහැ. නමුත් අලුත් පරම්පරාවකට බොඳ මීදුම් නරඹන්න ලැබීම එක ගැන මම සතුටු වෙනවා. අන්තර්ජාලය හරහා දේශීය විදේශීය ප්‍රේක්‍ෂක ප්‍රතිචාර ලැබුණා. ඔවුන් නිතරම අහන්නේ (බොඳ මීදුම් 2) එන්නැද්ද කියලා තමයි.
සාරංග ඔබ දායක වුණු නිර්මාණ කිහිපයක් මේ දවස්වල විකාශය වෙනවා. ඒ අතර ‘අකුරු මැකී නෑ’ ටෙලිනාට්‍යය ගැන මුලින් කතා කළොත්?
අකුරු මැකී නෑ ටෙලිනාට්‍යය මේ දවස්වල ‘හිරු’ නාළිකාවේ විකාශය වෙනවා. තවම මගේ කොටස් විකාශය වුණේ නැහැ. ඉදිරියේදී මගේ රඟපෑම් කටයුතු වෙනස්ම විදියට දැකබලා ගන්නට පුළුවන්. කුඩා දරුවන් පිරිසක් සමග තමයි අකුරු මැකී නෑ හරහා මට දායක වීමට අවස්ථාව ලැබුණේ. ජීවිතය ගැන වෙනස්ම කෝණයකින් බලන චරිතයක් තමයි ඒ හරහා ස්මතු වන්නේ. අකුරු මැකී නෑ මට වෙනස්ම අත්දැකීමක් කියලා පැවසුවොත් හරි.
වසන්ත විතාරණගේ