ඇට්ලස් ඇක්සිලියා රොබෝ යන්ත්‍ර පරිත්‍යාග කරයි

හේමාස් සමූහ ව්‍යාපාරයට අනුබද්ධිත ඇට්ලස් ඇක්සිලියා සමාගම, තමන් නිෂ්පාදනය කරන ලද තවත් ස්වයංක්‍රිය මෙහෙයුම් රොබෝ යන්ත්‍ර (AGV) තුනක් සෞඛ්‍ය සහ දේශීය වෛද්‍ය අමාත්‍යංශයේ සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතාට පසුගියදා නිල වශයෙන් බාර දුන්නේය. මෙරට කොවිඞ්-19 සටන සඳහා පළමු වරට රොබෝ යන්ත්‍ර හඳුන්වා දුන් ඇට්ලස් සමාගම, මින් පෙර ලබා දුන් රොබෝ යන්ත්‍ර මේවන විට ද කොරෝනා රෝගීන් සඳහාම වෙන් වූ හෝමාගම මූලික රෝහලේත්, ඉරණවිල ප්‍රතිකාර මධ්‍යස්ථානයේත් සාර්ථකව ක්‍රියාත්මක වේ.

ශ්‍රී ලංකාවේ ප්‍රමුඛතම ලිපිද්‍රව්‍ය නිෂ්පාදකයාවන ඇට්ලස් සමාගම, මෙරට කොවිඞ්-19 ව්‍යාප්තිය පාලනය කිරීම සඳහා දිවිහිමියෙන් කටයුතු කරන සෞඛ්‍ය අංශයේ ආරක්ෂාව සඳහා සෞඛ්‍ය අමාත්‍යංශයේ සහයෝගයෙන් යුතුව මෙම රොබෝ යන්ත්‍ර වැඩිදියුණු කිරීමේ ව්‍යාපෘතිය දියත් කළේය. මෙම නවතම රොබෝ යන්ත්‍ර උෂ්ණත්ව සංවේදකයක් හරහා රෝගියාගේ උෂ්ණත්වය පරික්ෂා කිරීම, එම දත්ත ගබඩා කිරීම මෙන්ම වීඩියෝ සම්මන්ත්‍රණ පහසුකමින්ද යුතු වන අතර රෝගීන්ට අවශ්‍ය ආහාර සහ ඖෂධ රැගෙන යාමේ හැකියාවෙන් ද සමන්විත බැවින් රෝගීන් සමග සෘජුව සම්බන්ධ වීම පාලනය කරමින් වෛද්‍යවරුන් ඇතුළු ඉදිරි පෙළ සෞඛ්‍ය කාර්යමණ්ඩලවල ආරක්ෂාව තහවුරු කෙරේ.