දරුවකු පතන හැමට විශේෂයි

සරුවියේ පසුවන සෑම අඹු – සැමි යුවළකටම යහපත්, පිරිපුන්, පංච මහා සම්පත්තියම හිමි දරු උපතක් ලබා ගැනීම උදෙසා ජ්‍යොතිෂයේ පිහිට ලබාගත හැකිය.
ඉතාම සුබ ප්‍රශස්ත මුහුර්තයකදී අඹු-සැමියන් විසින් එක්ව ක්‍රියාත්මක වීම හරහා සුදාරකොත්පත්තියක් ලබා ගැනීමේ වාසනාව පෑදේ. ඉන් පුතෙක් හෝ දුවෙක් ලබාගත හැකිය.
ආබාධ රහිත නිරෝගී ජනනේන්ද්‍රියක් හිමි සරු වියේ පසුවන ස්ත්‍රියක් මාසික ඔසප් සිදුවීමෙන් 7 දිනකට එළැඹෙන දින 13 ඇතුළත ඇය සමඟ පුරුෂයාගේ එක්වීමෙන් ස්ත්‍රිය ගැබ් ගන්නා බැව් සත්‍යයකි. ඔත්තේ දිනවල පිරිමිද, ඉරට්ටේ දිනවල ගැහැනුද පිළිසිඳ ගන්නා බැව් එක්තරා මතයකි.

මවුපියන්ගේ ගති ගුණ හා ශාරීරික අංග ලක්‍ෂණ උත්පාදනය වී දරුවන් කරා බද්ධ වෙයි. දෙදෙනාගේම වර්ණාංශු 48කි. මිනිස් සිරුර කෝටි ප්‍රකෝටි ගණන් ජීවාණු එක්වීමෙන් සෑදේ. විද්‍යාත්මකව බලන විට පිරිමියකු වැඩිවියට පත්වූ විට ශුක්‍රාණු හටගන්නේ කෝටි ගණනකි. වැඩිවියට පත් ස්ත්‍රියගේ අණ්ඩාශයේ ආර්තවාණු හැදෙන්නේ මසකට එකක් බැගිනි.
45 ඉක්මවූ විට ආර්තවාණු හටගැනීම අඩුයි. 50 හේදී පූර්ණව නවතී. එහෙත් අවුරුදු 90ව ඉක්ම වන තුරුම පිරිමියාගේ බීජ කෝෂයෙහි ශුක්‍රාණු නිපදවෙයි. මහලු වියේ වුවත් හටගන්නා ශුක්‍රාණු හරහා උපදින දරුවෝ දුබල නොවේ. මේ අනුව බලන විට පිරිමියා කොතෙක් මහලු වුවත් ශුක්‍රාණු මහලු නොවේ.

මෙය ජ්‍යොතිෂ අනුව ගර්භදානය අපේක්‍ෂාවෙන් සම්භෝගයේදී අස්විද, රෙහෙණ, මුවසිරස, පුෂ, උත්‍රපල්, හත, සා, අනුර, උත්‍රසල, සුවණ, දෙනට, සියාවස, උත්‍රපුටුප, පුනාවස, රේවතී නැකැත් පවතින කාලය තෝරගත යුතුයි.
කන්‍යා, තුලා, කුම්භ, මිථුන රාශියක් හෝ ධනු, පූර්වාර්ධය හෝ තත්කාලයක් මනුෂ්‍ය රාශියක් ලග්නය ලෙස උදාවෙමින් තිබීම යහපත්ය.
රාත්‍රි 8.00 සිට අලුයම 4.00 අතර පංචාංගයම ශුද්ධ සුබ මුහුර්තයක් වැදගත් වෙයි. දිවා කාලයද උචිතය.
ගර්භ දානයට සඳු 4 කේන්දරයේද, 6, 3, 11 භාවයන්හි පාපීන්ද, ගුරු හෝ සිකුරු 01 සිටීම යහපත් වෙයි.
ගුරු ලග්නයේ ප්‍රබල වූ මොහොතේදී සම්භෝගය දීඝායු ඇතිව වාසනාවන්ත දරු කලලයක් රෝපණය වෙයි.
ලග්නාධිපතියා සහ 7 වැන්නාධිපතියා දෙදෙනාම 5 වැන්නේ පිහිටීම හරහා වාසනාවන්ත දරු පිළිසිඳ ගැනීමකි.
තත්කාල කේන්දරයේ 3, 6, 7, 10, 11 භාවයන්හි රවි ඇත්නම් පිරිමි දරුවෙක්ද, අන්‍ය භාවයක නම් ගැහැනු දරුවෙක්ද උපදී.

සම්භෝග අවස්ථාව තුළ ලග්නාධිපතියාද සඳු ග්‍රහයාද ශනිද පුරුෂ රාශිවල නම් පිරිමි දරුවකුද, ස්ත්‍රි රාශිවල නම් ගැහැනු දරුවකුද පිළිසිඳ ගනී.

මේ එක් එක් යෝග ඒ අනුවම දුටුවේ නම් නැකැත් සීහුම්ද ලග්න රාශි සීහුම්ද සුබ හෝරාවන්ද සම්භෝගය සඳහා යොදාගනු ලබන සුබ මුහුර්තියක් සමඟ එකට බද්ධ වීමද අනිවාර්ය වෙයි.
අපේ පැරැණි අය මංගල යහන ඉතාම අලංකාරව සැලසුම් කර පෝෂදායී ආහාර පානවලින් එක්කොට සුවඳ වහනය වන පරිදි සකස් කළ බැව් පෙනේ. මත්ද්‍රව්‍ය නොගැනීම අපථ්‍ය ආහාර-පානවලින් වැළකී ආගමික වතාවත්වල යෙදී අඹු-සැමි ප්‍රේමයෙන් උද්දාම වී සතුටු සිතින් දෙදෙනාගේම සිහින ලෝකය ආලෝකවත්ව සම්භෝගය මධුසමය ගතකරන්නේ නම් ආයු, වර්ණ, සැප, බල, ප්‍රඥා යන පංච මහා සම්පත්තිය හිමි වාසනාවන්ත සුදාරකෝත්පත්තියක් පිහිටන බැව් අපේ ජ්‍යොතිෂ විiා පදනමේ අන්තර්ගත වී ඇති බැව් සනිටුහන් කරමු.
ප්‍රවීණ ජ්‍යොතිෂවේදී ටී. හෙන්රි බෙම්මුල්ල