නුවරඑළිය ග්රෙගරි වැව ආසන්නයේ නාගරික සංවර්ධන අධිකාරියට අයත් බිමකින් පසුගිය 21දා නැඟුණ වාග් ප්රහාරයක හඬක් නිසා ඒ අවට ඇති වූයේ දැඩි නොසන්සුන්තාවකි. ඒ හඬ කාගේද, සංවාදය කරන්න කවුරුන් සමඟද යන්න එළියට ඒමට වැඩි වෙලාවක්ද ගත නොවුණි. රජයේ නිලධාරීන් පිරිසක් සටන උස්හඬින් යුතුව විරෝධය පෑමේ යෙදී සිටියේ අන්කිසිවකු නොව නුවරඑළිය දිස්ත්රික්කයේ ජනතාව මෙන්ම මුළුරටම හඳුනන එක්සත් ජාතික පක්ෂයේ ජාතික සංවිධායක, පාර්ලිමේන්තු මන්ත්රි නවීන් දිසානායකය. ග්රෙගරි වැව ආසන්නයේ නාගරික සංවර්ධන අධිකාරියට අයත් බිමක අනවසරයෙන් පවත්වාගෙන ගිය ආපන ශාලාවක් ඉවත් කිරීමට නුවරඑළිය නාගරික සංවර්ධන අධිකාරියේ නිලධාරීන් කටයුතු කරමින් සිටියදී එතැනට පැමිණි පාර්ලිමේන්තු මන්ත්රි නවීන් දිසානායක මහතා එම නිලධාරීන්ගේ රාජකාරියට බාධා කරමින් විරෝධය පළකිරීම නිසා මෙම නොසන්සුන්තාවය හටගෙන තිබිණි. මන්ත්රිවරයා එහි පැමිණ තිබුණේද ආධාරකරුවන් පිරිසක් සමඟය. එහිදී දිසානායක මහතා දැඩි ආවේගශීලීව නාගරික සංවර්ධන අධිකාරියේ නිලධාරීන් සමඟ බහින්බස් වූයේ මෙසේය.
නවීන් – අපි ඉඩ දෙන්නෙ නැහැ මේක කරන්න. මට මෙතැන නිදාගන්න වෙනවා. ඔයා ඕක කරන්න ගියොත්. හරි පුළුවන්නම් මාව අයින් කරන්න.
නිලධාරියා – මම කරන්නේ මගේ රාජකාරිය.
නවීන් – ඔයා උසාවි නියෝගයක් අරන් එන්න. නීතිය ඔයාගෙ පැත්තෙ නම්, ඔබතුමා ගිහිල්ල උසාවි නියෝගයක් අරගෙන එන්න.
නිලධාරියා – මම අහන්නෙ මම මොකද්ද කරන්නෙ. මම මගේ රාජකාරිය කරනවා.
නවීන් – නැහැ, අපි ඉඩ දෙන්නෙ නැහැ ඒකට.
නිලධාරියා – කොහොමද ඔබතුමා ඉඩ නොදෙන්නෙ.
නවීන් – අපිටත් ඉන්නවා මිනිස් බලයක්.
නිලධාරියා – ඒ බලය පාවිච්චි කරන්න එපා වැරැදි විදියට මන්ත්රිතුමා. වැරැදියි, වැරැදියි.
නවීන් – බැහැ, බැහැ, (අධික ශබ්දයෙන්) මම එහෙම කරන්න ඉඩ දෙන්නෙ නැහැ අද.
නිලධාරියා – ඇයි එහෙම කරන්නෙ.
නවීන් – උසාවි නියෝගයක් අරන් එන්න ඔබතුමා. නීතිය ඔයාගෙ පැත්තේ නම් ඔයා උසාවියෙන් නියෝගයක් අරන් එන්න.
නිලධාරියා – නමුත් අධිකාරියට බලයක් තියෙනවා.
නවීන් – නැහැ, නැහැ, නෝටිස් එකක් එවලා කරන්න.
නිලධාරියා – ඇයි අධිකාරිය අධිකරණයට යා යුත්තේ? අධිකාරියට බලය තියෙනවා.
නවීන් – බලය තියෙනවා නම් බලය අරගෙන එන්න.
නිලධාරියා – එතකොට ඔබතුමා හදන්නෙ මේක කඩාකප්පල් කරන්න.
නවීන් – නැහැ, නැහැ, නැහැ, අපි නීතිය අනුව ක්රියා කරමු.
නිලධාරියා – ඔයා කියන එක වැරැදියි මන්ත්රිතුමා. මම මේ ඔයා කියන දේ කරන්නේ නැහැ. කරන්නෙ රාජකාරියක්.
නවීන් – මමත් කරන්නේ රාජකාරියක්. මම මේ ප්රදේශයේ මනුෂ්යයන්ගෙ ඡන්දයෙන් ගියා නම් මම හිටගන්නේ මිනිස්සුත් සමඟ.
නිලධාරියා – ගරු මන්ත්රිතුමා ඔබ මේ දෙන්නේ නරක ආදර්ශයක්.
එම ආපනශාලා හිමිකරුද මෙම වසරේ ජනවාරි 07 වැනි දිනද මෙම ආපන ශාලා බිම සඳහා රුපියල් 1,63,000ක මුදලක් නාගරික සංවර්ධන අධිකාරියේ බත්තරමුල්ල කාර්යාලයට ගෙවා ඇති බවක් මාධ්ය වාර්තා කර තිබුණද නාගරික සංවර්ධන අධිකාරිය පවසා සිටියේ ඔහුට 2020 වසරේ එය පවත්වාගෙන යෑමට අවසරයක් දී නොමැති බවකි.
මෙම සිද්ධිය වූ දිනයේ එම ආපනශාලාව ඉවත්කර ගැනීමට පැය 48ක කාලයක් ලබාදී නාගරික සංවර්ධන අධිකාරියේ නිලධාරීන් ඉවත්ව ගොස් තිබිණි. කෙසේ වෙතත් මෙම සිද්ධියට මැදිහත්වීමට පැමිණි නුවරඑළිය දිස්ත්රික්කයේ පාර්ලිමේන්තු මන්ත්රි නවින් දිසානායක මහතා අදාළ නිලධාරියාගේ රාජකාරියට බාධා කරමින් හැසිරුණු ආකාරය බොහෝ දෙනකුගේ දෝෂදර්ශනයට ලක්වී තිබිණි. කොහොම නමුත් නාගරික සංවර්ධන අධිකාරියේ නියමයන් පරිදි පසුගිය බදාදා වන විට අදාළ ආපන ශාලාවේ ඉදිකිරීම් සියල්ල ඉවත්කරගත් බව නුවරඑළිය පොලිසිය මෙන්ම කොළඹ නාගරික සංවර්ධන අධිකාරියේ අනවසර ඉදිකිරීම් ඉවත් කිරීමේ අංශයේ නිලධාරියකු ‘මව්රට’ට සනාථ කර සිටියේය.
මෙම සිද්ධිය වන විට කොළඹ සිට නුවරඑළිය බලාගොස් සිටි අනවසර ඉදිකිරීම් ඉවත් කිරීම් අංශයේ නිලධාරීන් සමඟ නුවරඑළිය නාගරික සංවර්ධන අධිකාරියේ නියෝජ්ය අධ්යක්ෂ රන්ජිත් බණ්ඩාර මහතා ඇතුළු නිලධාරීන් කිහිප දෙනකු සහභාගි වී තිබුණි. ඔවුන්ගේ ආරක්ෂාව සඳහා නුවරඑළිය පොලිසියේ නිලධාරීන් පිරිසක්ද සහභාගි වී ඇත්තේ අදාළ නිලධාරීන් විසින් පොලිසිය දැනුවත් කර තිබීම නිසාය. අනවසර ඉදිකිරීම් ඉවත් කිරීමේ බලය පැවරී ඇති නාගරික සංවර්ධන අධිකාරියට නීතිමය තත්ත්වය පිළිබඳව එහි උසස් නිලධාරියකුගෙන් කළ විමසීමකදී එම නිලධාරියා සඳහන් කළේ මෙවැන්නකි.’
‘අපිට නීතිවිරෝධීව තියෙන අනවසර ඉදිකිරීම් ඉවත් කිරීමට බලයක් තියෙනවා. මේවගෙ දේවල් අපි පළමුවතාවට කළ දෙයක් නොවෙයි. අධිකරණයට ගියත් සිදුවන්නේ අපගේ නීතිමය තත්ත්වය තහවුරු කිරීමක් පමණයි. එජාපය රජයේ කාලයේත් අපි ඇමැති නියෝගයන් මත අනවසර ඉදිකිරීම් ඉවත්කර තියෙනවා. 2002 වත්තල තිබුණා අපේ අධිකාරියට අයත් ඉඩමක්. ඒකේ පවුල් සෑහෙන සංඛ්යාවක් හිටියා. ඒ කාලේ හිටිය ඇමැතිවරයාගේ නියෝග මත සියල්ලම ඉවත් කළා.
‘මේ සිද්ධියේ හඬපටය හොඳට අහන්න. එතැනට ආව මන්ත්රිවරයා කියනවා ඉවත් කිරීමේ බලය යූ.ඩී. එකට තියෙනව කියලා. අපි හිටියෙ නිලධාරීන් හත්අට දෙනකු විතරයි. යහපාලන රජය කාලේ මේ ස්ථානය ලබා දීල තියෙන්නෙත් විනිවිද භාවයෙන් නොවෙයි. ඉඩමක් ලබා දෙන විට ක්රමයක් තිබිය යුතුයි. ටෙන්ඩර් පරිපාටියක් තියෙන්න ඕනෑ. පසුගිය රජය කාලෙ ඔය කරල තිබුණෙ පිළිගත හැකි ක්රමවේදයක් නොවෙයි. ඒ තැන වෙනුවට වෙනත් තැනක් දෙනව කියල අපේ බැඳීමක් නැහැ. අනෙක් එක මේ ග්රෙගරි වැව ප්රදේශය මුක්ත කලාපයක්. ස්ථිර ගොඩනැඟිලි හදන්න බැහැ. අනෙත් එක ළඟදි නානුඔය සිට නුවරඑළිය ග්රෙගරි වැව ආසන්නයට කේබල් කාර් ව්යාපෘතියක් එනවා. ඒ ව්යාපෘති සඳහාත් මේ තැන් නිදහස් විය යුතුයි. සමහර විට ඒ ව්යාපෘතියට වඩා වෙනස් ව්යාපෘතියක් වෙන්න පුළුවන්.’
කෙසේ වෙතත් මෙම සිද්ධියට අදාළව වැඩිදුර විස්තර දැනගැනීම සඳහා නීතිය ක්රියාත්මක කිරීමට එහි ගිය නාගරික සංවර්ධන අධිකාරියේ නිලධාරිනිය සමඟ ප්රශ්න ඇතිකරගත් නුවරඑළිය දිස්ත්රික් හා එක්සත් ජාතික පක්ෂයේ පාර්ලිමේන්තු මන්ත්රී නවින් දිසානායක මහතා දුරකතනයෙන් සම්බන්ධකර ගැනීමට දින දෙකක් තිස්සේ ‘මව්රට’ ගත් උත්සාහය අසාර්ථක විය. ඔහුගේ ආරක්ෂක නිලධාරියා බව කියන දුරකතන අංක 0717 845671 සිටි අයට කතා කළද ඔහු කීවේ මන්ත්රිවරයා දවස තිස්සේම විවිධ සාකච්ඡාවල යෙදෙන බැවින් දුරකතනයට සම්බන්ධ කරගත නොහැකි බවය. ‘මව්රට’ පුවත්පතෙන් කතා කළ බව පමණක් මන්ත්රිවරයාට දැනුම් දීමට කටයුතු කරන බවද ඔහු පවසා සිටියේය. කෙසේ වෙතත් මෙම සිද්ධිය වාර්තා වූයේ මීට දින කිහිපයකට ඉහතදී ගම්පහ අඩවි වන නිලධාරිනිය වන දේවානි ජයතිලක මහත්මිය හා රාජ්ය අමාත්ය සනත් නිශාන්ත මහතා අතර සිදුවූ ආන්දෝලනාත්මක වචන හුවමාරුවේ උණුසුම මැකී යෑමටත් මත්තෙන් වීම විශේෂ සිදුවීමකි. ඒ අවස්ථාවේදී ‘මව්රට’ පුවත්පත කොන්දේසි විරහිතව රාජ්ය අමාත්යවරයාගේ ක්රියාකලාපය විවේචනය කරමින් රාජ්ය සේවයේ කොන්ද කෙළින් තියාගෙන කටයුතු කළ අඩවි වන නිලධාරිනිය වෙනුවෙන් පෙනී සිටීමට පියවර ගත්තේය. එම නිසා නවීන් දිසානායකට හා රජයේ නිලධාරියකු හා නාගරික සංවර්ධන අධිකාරියේ නිලධාරියා අතර සිදුවන සිද්ධියේදී අප පැහැදිලිවම පෙනී සිටින්නේ රජයේ නිලධාරියා වෙනුවෙනි. මන්ද යත් එම නිලධාරියා ඍජුව කියා සිටින්නේ තමන් පැමිණ සිටින්නේ නීතිය අකුරට ක්රියා කරවන්න යැයි කියාය. එමෙන්ම නීතිය කඩනොකරන ලෙසට ඔහු මන්ත්රි නවීන්ගෙන්ද ඉල්ලිමක් කරයි. බැලූබැල්මට මෙම සිදුවීමේදී රජයේ නිලධාරීන් ඍජුව කටයුතු කරන ආකාරයක් පෙනෙන්නට තිබේ.
අනෙක් අතට මන්ත්රිවරයා අනවශ්ය ලෙස මෙම සිදුවීමට බාධා කරන ආකාරයක්ද පෙනී යයි. හුදෙක්ම එය ඡන්ද මත පදනම්ව සිදුකරන බලපෑමක් බව පෙනෙන්නට තිබේ. එය සැබැවින්ම වැරැදි පූර්වාදර්ශයක් මෙන්ම දේශපාලකයකු වශයෙන්, නීතිඥයකු වශයෙන් කටයුතු කරන නවීන් වැන්නකුට එය උචිත නොවන බවක්ද පෙනී යයි. එම නිසා පාට, පක්ෂ භේදයකින් තොරව ඊට විරුද්ධ වීම මාධ්යයේ මෙන්ම ජනතාවගේද වගකීමකි.
ප්රේමලාල් විජේරත්න
