සීයා යන්න මම තණකොළ කපන මාමා එක්ක ඉන්නවා…
අද සමාජය බොහෝ සේ පිරිහිලා. පුංචි දරුවන් ගැන මවුපියන්ගේ අවධානය සුළු මොහොතකට හෝ බැහැරට ගියොත් ඇතැම් විට ඒ අහිංසක දරුවන්ට මුළු ජීවිතයෙන්ම වන්දි ගෙවන්නට පවා සිදුවිය හැකියි. එවැනි අවාසනාවන්ත සිදුවීමක් සිදුවුණොත් මවුපියන්ට මුළු ජීවිත කාලය පුරාම පසුතැවිලි වන්නට සිදුවනවා. අද අපි ඔබට කියන්නේ එවැනි අනුවේදනීය අත්දැකීමකට මුහුණ දුන් මවුපිය දෙදෙනකුගේ වේදනාබර කතාවක්.(Sri Lanka Latest News)
මාලඹේ හල්බරාව ප්රදේශයේ රජයට අයිති ඉඩමක අවුරුදු පහ හමාරක දරුවකුගේ මළ සිරුරක් ඇති බවට පසුගිය 08 වැනදා මුල්ලේරියාව පොලිසියට තොරතුරක් ලැබී තිබුණා. ඒ අනුව පොලිසිය මේ දරුවාගේ මළ සිරුර සොයා යන්නට වුණා. මියගොස් තිබුණේ අවුරුදු පහමාරක් වයසැති ජොනතන් මාක්ස් ෆොන්සේකා නමැති දරුවෙක්.
ඔහුගේ උදරයේ බරපතළ කැපුම් තුවාල දක්නට ලැබුණු අතර, සිරුර වැටී තිබුණු ස්ථානය අසල කුඩා කැබැලිවලට බිඳීගිය වීදුරු බෝතලයක්ද තිබුණා. දරුවාගේ එක් සෙරෙප්පුවක් පයේද, අනෙක සෙරෙප්පුව පසෙකද වැටී තිබෙනු දක්නට ලැබුණා. මූලික පොලිස් විමර්ශනවලදී අනාවරණ කරගෙන තිබුණේ දරුවාට වීදුරු බෝතලයේ කටු ඇනී මියගොස් ඇති බවටයි.
දරුවාගේ මෘත ශරීරය පසුගිය 09 වැනිදා මුල්ලේරියාව බෝවන රෝග විද්යායතනයට රැගෙන යනු ලැබුවේ පශ්චාත් මරණ පරීක්ෂණය සඳහායි. එහිදී අනාවරණ වී තිබුණේ දරුවාගේ උදරයේ වම්පස ප්රදේශය තියුණු ආයුධයකට කැපී ඇති බවයි.
දරුවා මියයෑමට පැයකට පමණ පෙර ඒ අසලින් ගමන්ගත් කාන්තාවක දරුවා සේල්ලම් කරමන් සිටිනු දැක තිබුණා. ඇය පවසා තිබුණේ දරුවා සෙල්ලම් කරන අවස්ථාවේ තවත් පුද්ගලයකු ඒ ආසන්න ඉඩමක තණකොළ කපමින් සිටින අයුරු දුටු බවයි. එම කාන්තාව එම සිදුවීම මෙලෙස විස්තර කළා.
‘මම වැඩ ඇරිලා එනකොට පුතා එතැන සෙල්ලම් සෙල්ලම් කරමින් හිටියා. එතකොට වෙලාව හවස පහට පහක් විතර ඇති. ඒ වෙලාවේ තමයි එතැන හිටියේ. මම ඊට පස්සේ කිව්වා පුතේ ඔතන සත්තු එහෙම ඉන්න නිසා උඩහට යන්න කියලා. එහෙම කියාගෙන මම බායි කියලා එන්න ආවා…’
ජොනතන් මාක්ස් දරුවාගේ පියා කලක සිට මවගෙන් වෙන්ව ජීවත්ව ඇති අතර, අතර මව දිවා කාලයේ රැකියාවක් කරමින් අගහිඟකම් මඟහරවමින් දරුවා පෝෂණය කර තිබුණා. මවත්, දරුවාත් කුඩා කුලී නිවෙසක ජීවත්ව සිටි බවයි දැනගන්නට ලැබුණේ. දරුවාගේ සීයා සහ ආච්චීද එම නිවෙසේ සිටින අතර, මව නොමැති අවස්ථාවලදී ඔහුව රැකබලා ගනු ලැබ ඇත්තේ මෙම සීයා සහ ආච්චී විසිනි.
දරුවා මියගොස් සිටි වැඩබිමේ මුරකරු ලෙස සේවය කර ඇත්තේද දරුවාගේ සීයායි. මෙම අවාසනාවන්ත සිදුවීම සිදුවූ දින ඔහුගේ සහෝදරයකුගේ අවමංගල්ය උත්සවයකට සහභාගි වීමට සීයා පිටව ගොස් තිබුණා. එලෙස පිටව යෑමට පෙර ජොනතන් මාක්ස් දරුවාව අසල්වාසී නිවෙසක නවත්වා යෑමට සීයා උත්සාහ දරා තිබුණද, ‘සීයා ගිහින් එන්න, මම තණකොළ කපන මාමා එක්ක පරිස්සමින් ඉන්නම්…’ යනුවෙන් දරුවා තම සීයාට පවසා ඇති බවයි වාර්තා වුණේ.
පුංචි ජොනතන් එසේ කියන්නට ඇත්තේ වැඩබිමේ තණකොළ කපන ආකාරය බලමින් දවස ගතකරන්නට ඔහු තුළ තිබූ කැමැත්ත නිසා වන්නට පුළුවන.
කෙසේ වෙතත් දරුවා ලේ ගලමින් වැටී සිටි අයුරු දුටු තණකොළ කපමින් සිට පුද්ගලයා අසල නිවෙසකට ගොස් පවසා තිබුණේ දරුවා වීදුරු බෝතලයක් උඩ වැටී සිටින බවටයි. ඒ අනුව එම නිවැසියා එහි පැමිණ ඇති අතර, ඒ වන විටත් දරුවා මියගොස් ඇති බව ඔහුට නිරීක්ෂණය වී තිබුණා.
‘එයා ඉස්සෙල්ලාම මට ඇවිත් කිව්වා ආයුධයක් තියෙනවා මුවහත් කර දෙන්න කියලා. පැයක් දෙකක් තණකොළ කැපුවා. පස්සේ මැෂින් එක නැවතුණා. විනාඩියක් ගියේ නැහැ අපේ ගෙදරට මේ තණකොළ කැපූ පුද්ගලයා දුවගෙන ආවා. ළමයා බෝතලයක් උඩ වැටිලා කැපිලද කොහේද බඩවැල් ඔක්කොම එළියට ඇවිල්ලා කියලා ඔහු මට කිව්වා. මාත් දුවගෙන ඇවිත් බැලුවා. බලනකොට දරුවා නැතිවෙලා…’ යනුවෙන් එම නිවෙස් හිමියා කියා සිටියා.
තණකොළ කපන්නා පවසා තිබූ පරිදි වීදුරු බෝතලයේ කොටස් ඇති ස්ථානය සහ දරුවා මියගොස් සිටි ස්ථානය අතර පරතරය අඩි 4ක් පමණ බව පොලිසියට නිරීක්ෂණය වී තිබිණි. එම පරතරය තුළ කිසිදු ලේ පැල්ලමක් නොතිබීම පිළිබඳ පොලිසියට සැක මතුව තිබිණි. මෙවැනි කුඩා දරුවකුගේ සිරුරට යටවී වීදුරු බෝතලයක් මේ තරම් කුඩා කැබැලිවලට බිඳී යා නොහැකි බවද පොලිස් නිලධාරීන්ට හැඟී ගොස් තිබුණා.
ජොනතන් දරුවාගේ මරණය, මනුෂ්ය ඝාතනයක්ද යන සැකය ඔස්සේ පොලිස් විමර්ශන තව තවත් තීව්ර කරන්නට විමර්ශන නිලධාරීන් පියවර ගෙන තිබුණේ ඉන් පසුවයි. ඒ අනුව දරුවා මියගිය ස්ථානයේ තණකොළ කපමින් සිටි පුද්ගලයාව පොලිසියට රැගෙන ගොස් ඔහුගෙන් දිගින් දිගටම ප්රශ්න කරන්නට වුණා. එහිදී ඔහු පොලිස් නිලධාරීන් හමුවේ පාපොච්චාරණයක් සිදුකර තිබුණා.
තණකොළ කැපූ පුද්ගලයා කොට්ටාව ප්රදේශයේ පදිංචි 51 හැවිරිදි අයෙකි. ඔහු තණකොළ කපමින් සිටින අතරතුර යන්ත්රයේ සිදුවූ කාර්මික දෝෂයක් පරීක්ෂා කර ඇති අතර, ඒ සමගම අසල තිබූ වීදුරු බෝතලයක යන්ත්රය වැදී ඇති බවත්, වීදුරු බෝතලය බිඳීම වැළැක්වීම සඳහා යන්ත්රය ඉවතට ගැනීමට උත්සාහ දැරූ අවස්ථාවේ එය දරුවාගේ උදරයේ වැදුණු බවත් ඔහු පාපොච්චාරණය කර තිබුණා.
එහිදී කැපුම් තුවාල සහිතව දරුවා ඇදවැටී ඇති බවත්, තමාගේ අත්වැරැදීමකින් මරණය සිදුවූ බව නොපවසා, වීදුරු බෝතලයේ කටු ඇනීම නිසා දරුවා මියගිය බව හැඟවීමට සිතා තමා ක්රියා කළ බවත් ඔහු වැඩිදුරටත් පාපොච්චාරණය කර තිබුණා. ඔහු 119 හදිසි ඇමතුම් අංකයට අමතා දරුවා මියගොස් ඇති බව දැනුම් දුන් බවද ඔහු පොලිස් නිලධාරීන්ට පවසා ඇත. කෙසේ වෙතත් ජොනතන් දරුවාගේ මරණය සම්බන්ධයෙන් මෙම තණකොළ කපන්නා සැකපිට අත්අඩංගුවට ගැනීමටයි මුල්ලේරියාව පොලිසිය කටයුතු කර තිබුණේ.
පුංචි ජොනතන් අධ්යාපනය ලැබූ තලාහේන විසාලා පාසලේ ගුරුතුමියක වන නිරෝෂා විමලසූරිය මහත්මිය, දරුවාගේ මරණය සම්බන්ධයෙන් පවසා සිටියේ මෙවැන්නකි.
‘මේ දරුවා ඉගෙනගත්තේ මගේ පන්තියේ. දරුවාගේ නම ජොනතන් මාක්ස් ෆොන්සේකා වුණාට මම ඔහුට ආදරේට කිව්වේ ජොනී කියලා. ඇත්තටම ඒ දරුවා පාසලට එන්නේ සීයා එක්ක. හැම තිස්සේම මම සීයාට කියන දෙයක් තමයි සීයේ දරුවා රැකගන්න කියන එක. නිවාඩු දෙන සතියේ මම දෙමවුපියන්ට කිව්වේ දරුවන්ව පරිස්සම් කරගන්න කියලා. මේ දරුවා දක්ෂයි. ළෙන්ගතුයි. දෙන වැඩේ හරියට කරනවා.
මම හැම තිස්සේම අවවාද දෙන්නේ, දෙමවුපියන්ට කියන්නේ දරුවන්ට මීට වඩා රැකවරණය ආරක්ෂාව දෙන්න කියලා. දරුවෝ දාලායන්න එපා. හෙට මම ඉස්කෝලේට යනවා. දරු පැටව් ටිකයි මමයි හෙට තනි වෙනවා. නාම ලේඛනයෙන් ජොනතන්ගේ නම කපාගන්නේ කොහොමද? ලබන ආත්මෙවත් හොඳ රැකවරණය ලැබෙන තැනක ඉපදෙන්න කියලා මම ප්රාර්ථනා කරනවා…’
පුංචි ජොනතන්ගේ පාසල් මිතුරු මිතුරියන්ද ඔහුගේ අවසන් කටයුතු සිදුකරන අවස්ථාවට පැමිණ සිටියා. ජොනතන්ගේ පුංචි මිතුරකු ඔහු පිළිබඳ මතකද අවදි කළේ මෙලෙසයි. ‘මගේ හොඳම යාළුවා ජොනී. එයා මට කෑම ගෙනත් දෙනවා. අපි එකට සෙල්ලම් කරනවා’ යනුවෙනි.
ජොනතන් ක්රිස්තියානි දහම ඇදහූ දරුවෙක්. පල්ලියේ පියතුමන්ලාගේද, පවුලේ ආදරණියයන්ගේද ශෝක ගීතිකා මැදින් ජොනතන් අවසන් ගමන් යන්නට වුණා. පවුලෙන් වෙන්ව සිටි නමුත් ජොනතන්ගේ පියාද ඔහුගේ අවසන් මොහොත වෙනුවෙන් පැමිණ සිට අයුරු දැකගත හැකි වුණා. ජොනතන්ගේ මව අවස්ථා කිහිපයකදීම දරු දුක දරාගත නොහැකිව සිහිසුන් වන අයුරු දක්නට ලැබුණා.
පසුගිය 11 වැනිදා තලාහේන පොදු සුසාන භූමියේදී පුංචි ජොනතන්ගේ අවසන් කටයුතු සිදු කෙරුණා.
වර්තමානයේ බොහෝ මවුපියන්, දරුවන්ගේ අසාවන්ට මුල්තැන දෙනවා. නමුත් ඔවුන්ගේ ආරක්ෂාව ගැන වැඩිදුර හිතන්නේ නැහැ. දරුවන්ව අනාරක්ෂිත ස්ථානවල තබාගෙන වැඩකටයුතු සිදුකරනවා. එවැනි කටයුතුවල අවදානම බරපතළකම හැඟෙන්නේ මෙවැනි අනතුරක් සිදුවුණු විටයි. පවුලක මව සහ පියා අතර බැඳීම් නොමැති අවස්ථාවලද දරුවන්ගේ ජීවිත අනාරක්ෂිත වීම බහුලව දැකිය හැකිය. නමුත් දරුවන්ගේ ආරක්ෂාවට මුල්තැන ලබාදීමට සියලු දෙනා වගබලාගත යුතුමයි.
‘අනෙක් සියලු වැඩ දෙවැනි තැනට දමා දරුවන්ගේ ආරක්ෂාවට මුල් තැන ලබාදිය යුතුය. තම ආදරණීයයන්ව, විශේෂයෙන්ම දරුවන්ව මොහොතකටවත් අනාරක්ෂිත ස්ථානයක තබන්නට එපා. දරුවන්ව ආදරයෙන් රැකබලා ගන්න…’ යනුවෙන් සෑම මවකටම, සෑම පියෙකුටම වටිනා පාඩමක් උගන්වා පුංචි ජොනතන් අපෙන් සදහටම සමුගෙන ගියා.
නිලන්ති රේණුකා
