රාජ්ය ණය ගෙවීම සඳහා මහා භාණ්ඩාගාරය සතුව තිබූ ඇමෙරිකානු ඩොලර් මිලියන 2.5ක් අතුරුදන් වීම සම්බන්ධයෙන් ශ්රී ලංකා මහ බැංකුවේ අධිපති ආචාර්ය නන්දලාල් වීරසිංහ මහතා විසින් රජයේ මුදල් පිළිබඳ කාරකසභාව වෙත වාර්තාවක් ඉදිරිපත් කර තිබේ. Sri Lanka Latest News
මෙම කාරකසභාව ආචාර්ය හර්ෂ ද සිල්වා මහතාගේ සභාපතිත්වයෙන් පසුගිය 23 වැනි දින පාර්ලිමේන්තුවේදී රැස්වූ අතර, එහිදී මුදල් අමාත්යාංශය සහ මහ බැංකුව විසින් ලබාදුන් වාර්තා සම්බන්ධයෙන් දීර්ඝ වශයෙන් සාකච්ඡා කොට තිබිණි.
අස්ථානගත වූ මුදල් සම්බන්ධයෙන් මුදල්, ක්රම සම්පාදන සහ ආර්ථික සංවර්ධන අමාත්යාංශය මීට පෙර වාර්තාවක් ඉදිරිපත් කර තිබූ අතර, ශ්රී ලංකා මහ බැංකුවේ නිලධාරීන් විසින් එය පරීක්ෂා කිරීමෙන් අනතුරුව තම මතය සහිත වාර්තාව මෙම රැස්වීමේදී කාරක සභාවට ඉදිරිපත් කොට තිබිණි.
අමාත්යාංශය සහ මහ බැංකුව විසින් ඉදිරිපත් කළ වාර්තා දෙකම සලකා බලා, ඒ පිළිබඳ අවසන් වාර්තාවක් සකස් කර ඉදිරියේදී පාර්ලිමේන්තුවට ඉදිරිපත් කිරීමට රජයේ මුදල් පිළිබඳ කාරක සභාව සැලසුම් කර ඇති බව දැනගන්නට ඇත.
