මුතු කිමිදුමෙන් පාඩු
1831 සිට 1842 දක්වා කාලය තුළ මුතු කිමිදුමෙන් පාඩු සිදුවීම හේතුවෙන් රජයේ සියලු කටයුතු ඇනහිටින්නට හේතු යෙදිණි. මීට විකල්ප සෙවුවද හදිසි පිළියමක් හමු නොවීම හේතුකොටගෙන එතෙක් කරගෙන ආ කටයුතු ඉදිරියට පවත්වාගෙන යෑම සඳහා රජයේ ඉඩම් විකිණීම සුදුසු යැයි බාන්ස්තුමා තීන්දු කළේය. ඒ අනුව අවශ්යතාවය පරිදි ඉඩම් විකිණීම සිදුකෙරිණි.
නැවැතුණු පාරවල් යළි අරඹයි
1843ට පෙර මුදල් නැතිකමින් නැවැතුණු මාර්ග ඉදිකිරීම් යළි ක්රියාත්මක කිරීම උදෙසා රජයේ ඉඩම් විකිණීම සුදුසු යැයි අනුමත වීමෙන් පසු ඊට සුදුසු ඉඩම් තෝරා විකිණීමෙන් යළිත් මාර්ග ඉදිකිරීම් ආරම්භ විය. ඒ අනුව සැකසුණු පළමු මාර්ගය වන්නේ මීගමුවේ සිට වේයන්ගොඩ හරහා නුවර පාරට සම්බන්ධව කෙරුණු මාර්ගයයි.
ඉඩම් විකුණා පුද්ගලික පාරවලුත් හදයි
රාජ්ය ඉඩම් විකුණා ලබාගත් මුදලින් මීගමුවේ සිට කුරුණෑගල දිසාවට බරව පිහිටි ජෝර්ජ් ෆ්රෙස් නම් අයකුගේ උක් වත්තකටද පානදුර සිට තම්බපාන නම් ප්රදේශයේ පිහිටි උක් වත්තකටද පාරවල් සෑදීමට කටයුතු කර තිබේ. ඒ අනුව එවකට රාජ්ය සහයෝගය තිබූ මෙවැනි පුද්ගලයන්ගේ විශේෂ අවශ්යතා මුල්කරගෙනද මුදල් වියදම් කර ඇති බව පැහැදිලි වේ.
