ගංගා දෙකක් එකට එකතුවෙන තැනට දෙමුවාවක් කියනවා. ගංගාවල් දෙකක් එකට එකතුවෙලා හැදෙන මහ ගංගාවක් අයිනෙ කුඹුක්ගහක් යට ඉඳගෙන තුරුලුවෙලා ආදර කතා මුමුනන්න. හිමිදිරි උදයක හිරිපොද වැස්සෙ තෙමි තෙමී ගඟ අයිනෙ ඉඳන් කොළ කැඳ වීදුරුවක රස බලමින් උණු උණු රොටියක රස බලන්න. ළඟ ළඟ එන නැකැත් මාසවල කරකාර බඳින්නට මඟ බලා ඉන්න ඇත්තන්ට තියන හීන තමයි ඕවා.
උඩවලව ජාතික වනෝද්යානය කියන්නෙ ලංකාවේ අලි ඇතුන් බලන්න පුළුවන් හොඳම තෝතැන්නක්. අලි ඇත්තු විතරක් නෙවෙයි මේක කුරුලු පාරාදීසයක්. ඒත් එක්කම උඩවලව ජලාශයේ වැව් බැම්ම උඩින් ඔබ ගිහින් ඇති. මධ්යම කඳුකරයේ මල් කුමාරි දියලුම උඩවලව ජලාශය දිහා බලාගෙන රඟන රැඟුම් බලාගෙන යන මේ මංපෙත ලංකාව සුරලොව සමඟ සසඳන්න පුළුවන් තවත් එක තැනක්. ඒතැන් ඔක්කොම බලාගෙන එන්න අපි මේ පාර යන්නේ උඩවලවට.
අද අපේ නවාතැන ගැන කියනවනම් මේක ටිකක් වෙනස් තැනක්. ඒ ගැන මම පොඩි ඉඟියක් ඉහළින් සඳහන් කරලත් තියනවා. මේක ටෙන්ට් ලොජ් එකක්. පිහිටලා තියෙන්නේ රක්වාන ගඟට මායිම් වෙන්න. සුවපහසු ටෙන්ට් එකක් කිව්වම ඔබට හිතෙයි ගොඩක් දේවල්. ලංකාවෙ වායු සමීකරණය කරපු ටෙන්ට් ලොජ් එකක ඉන්නවා කියන්නේ සමහරුන්ට හීනයක්. මොකද මේ කන්සෙප්ට් එකට හදල තියන හෝටල් ගොඩක් ගණන්. ලේසි නෑ ඉන්න එක.
ගගා බීස් උඩවලවේ නවාතැන හරිම නිස්කලංක වගේම අපේ අතේ තියන මුදලටත් සරිලන තැනක්. හැබැයි ලක්ෂ ගණන්වලට විකිණෙන නවාතැනක තියෙන හැම දෙයක්ම මෙතැන තියනවා. ඩබල් ඩිලක්ෂ් කාමර වගේම පවුල් පිටින් ගිහින් නවතින්න ෆැමිලි කාමර මේ නවාතැනේ තියනවා. මේ කාමර ඇතුළත ඉඩ ඇතිද කොහොමද ටෙන්ට් එකක් අස්සෙ ඉන්නේ ඔබට හිතෙන්න පුළුවන්.
ඉඩකඩ ගැන කතාකරනව නම් තරු පහේ හෝටලයක කාමරයකට වඩා ඉඩකඩ තියනවා. ඇතුළත හරියට මාලිගාවක් වගෙයි. ලොකු නාන කාමරයක් වගේම හුරුබුහුටි සෝෆා එකක්, ටී, කෝෆි ඇතුළු හැම දෙයක්ම මෙහි තියනවා.
වටපිටාව ගැන නම් අමුතුවෙන් කියන්න ඕනේ නැහැ. මේක කැලෑවක්. අනිත් පැත්තෙන් බලනකොට පලතුරු වත්තක්. වලිකුකුළා, ඕළු මුවා, ඉත්තෑවා, වල් ඌරා ගැවසෙනවා දකින්න ලැබෙන පුංචි වනාන්තරයක්. වනාන්තරයක ගියත් මේ සත්තු ඇහැට දකින්න ලොකු පිනක් කරල තියෙන්න ඕන. මෙතැනට යන අයට ඒකත් ඉබේම හම්බ වෙනවා.
කෑම බීම ගැන කතාකරන්න කලින් අවන්හල ගැන කියන්න ඕනේ. ඉතා පැරණි ගමක කුස්සියක විදිහට තමයි මෙහි අවන්හල නිර්මාණය කරල තියෙන්නෙ. මෙතැනට ගියාම දැනෙන්නෙ හරි ගැමි බවක්. ඒ ගැන අපි වැඩිය කතා නොකර ඉමු. ගියාම බලන්න ඔබත් හිතේ කොනක ලියලා තියාගන්න. කටට රහට ගමේ රසට චිමිනි ලාම්පු එළියෙන් කෑම කන්න, මහ රෑ පන්දම් එළියට නටන පළඟැටියන්ගෙ රැඟුම් බලන්න තවත් වෙන මොනාද.
මධුසමය ගතකරන කෙනකුට නම් මෙතැන දිව්යලෝකයක් වගේ දැනෙයි. අමතක නොවන මංගල රාත්රිය වෙනස්ම තැනක ගතකරල උදේට ගඟ අද්දර තියන කෑම මේසේ ලංකාවෙ ඉඳිආප්ප, පිට්ටු, රතුබත්, හැලප, ආප්ප ගමේ රසට රස බලල කොළකැඳ කෝප්පෙකින් අලුත් ජීවිතේ ආරම්භ කරන්න නොවරදවාම මෙහෙ එන්න. ඒ අයට විතරක් නෙවෙයි කොළඹ වගේ තදාසන්න පැතිවල හිරවෙලා ඉන්න අයටත් මෙතැන මාර නිදහස් තැනක්.
ගඟ ළඟ අසිරිය වචනවලට පෙරළන්න අමාරුයි. ඒතරමට සුන්දරයි. ගංගාවන් දෙකක් එකට එකතුවෙන තැන කුඹුක් වනාන්තරයක් වගෙයි. වැස්ස අඩු දවසක ආවොත් හොඳහැටි නාගන්නත් පුළුවන්. උඩවලවෙ ඇත් අතුරු සෙවණෙ ඉන්න අලි බබාලට කිරි පොවන්න යන්න ගගා බීස් අත දිග ඇරියා වගේ. වෙන කතා ඕන නෑ. මේ අංකයට කතාකරල දිනයක් වෙන්කර ගන්න.
071 620 5343
නිශ්ශංක මුවර්
