ජුහි-මධුරි සීතල යුද්ධය…
මම මධුරිට දෙවැනි වෙන්නේ කතාවෙන් විතරයි…
සුපිරි තරු අතරේ නිහඬ තරග කුළල්කාගැනීම් ඕනේ තරම් තියෙනවා…
ජුහි චව්ලා එක රැයින් සුපිරි තරු ගොන්නට එක් වූයේ ‘Qayamat Se Qayamat Tak’ චිත්රපටය තුළින්ය. ජුහීට තිබුණේ හරි අමුතු දඟකාර ලස්සනකි.., ලගන්නාසුලු මිහිරි සිනහව… අවිහිංසක නෙතඟ බැල්ම… ප්රේක්ෂකයන් කෙරෙහි ඈ ආකර්ෂණය කරන්නක් විය. උතුරු ඉන්දීය සිනමාවට ජුහී පැමිණියේ සිය ඥාතියකුගේ බලකිරීමටය. රඟපාන්නට ආශාව තිබුණද දිගින් දිගට සිනමාවේ රැඳී සිටින්නට හෝ තරු පොරය සමග සටන ජුහීට රුචි නොවීය.
එහෙත්..,
ජුහී නිරායාසයෙන්ම ජනප්රිය තරුවක විය. චිත්රපට නිෂ්පාදකයන් ඇගේ දින පොතෙහි පිටුවක් ඉල්ලමින් දුරකතන ඇමැතුම් දීම ඉවරයක් නොවීය. සුපිරි නළුවන් ජුහීව තම සහාය නිළිය ලෙස ඉල්ලා සිටීමද විලාසිතාවක් වී තිබිණි. එහෙත්… කවුරුත් හිතුවාට වැඩිය ඉක්මනින් ජුහි චව්ලා රංගනයෙන් ඈත් විය. තව බොහෝ කල් ඉන්නට කාලය තිබියදී ජුහී එලෙස ඉවත් වූයේ ගිවිසුම් අස්සන් කරන්නට චිත්රපට පෙළක්ම ඈ ඉදිරියේ තිබියදීය.
මෑතකදී… ‘ටයිම්ස් ඔෆ් ඉන්ඩියා’හී සම්මුඛ සාකච්ඡාවකට පෙනී සිටි ජුහී.., තම අතීතය, වර්තමානය සහ සිනමාවේ රසමුසු තැන් ගැන කතාබහ කොට තිබිණි.
එහිදී ජුහී වෙත ඉදිරිපත් වූ ප්රශ්න කිහිපයකට ඈ දුන් පිළිතුරු මෙලෙස සටහන්ව තිබිණි.
හිටි අඩියේ ඔබ සිනමාවෙන් ඉවත් වුණේ ජේ මේතා කළ බලපෑමක් නිසාද?
කිසිවිටෙකවත් මේතා මට හෝ මගේ මනාපයට බලපෑම් කරන්නේ නැහැ. මා සිනමාවට ආවේ අහම්බෙන්. පිටව ගියේද නිනව්වක් නැති ගණනටයි. ඒ අහඹු පිටව යෑමට මා මිස කිසිවෙකු වගකිව යුතු නැහැ. එලෙසම නැවැත රංගනයට එක්වෙන්නැයි කියමින් මා වෙත පැමිණෙන බාල වැඩකට නැති චරිත මා බාර ගන්නේද නැහැ.
ඔබ සිනමාව තුළ සැරිසැරුවේ මඳක් ඉහළින්?
ඔව්… අහස් තලයේ පාව යන වලාරොදක් වීමට මම කුඩා අවධියේ ඉඳන්ම ආසයි.
මා අදහස් කළේ ඔබේ පාරට්ටුව ගැනයි. ඔබ යාෂ්ජීටද ඔබේ ලොකුකම පෙන්නුවා?
නැහැ… මම යාෂ්ජීට ගරු කරනවා. ‘ඩර්’ තුළින් ඔහු මාව මුරුංගා අත්තක් මත ඔසවා තැබුවා… දකින, මුණගැහෙන හැම මොහොතකම මම නිතර ඒ ගැන ඔහුට තුති පුදන්නට අමතක කළේ නැහැ.
එහෙනම් ඔබ ‘දිල් තෝ පාගල් හේ’ රිජෙක්ට් කළේ මධුරිට දෙවැනි වන්නට බැරි නිසාද?
නැහැ… මගේ දින පොතේ ඒ වෙනුවෙන් ඉඩක් ඉතිරිව තිබුණේ නැහැ. කොහොමත් මා එය රිජෙක්ට් කිරීම තුළ කරිෂ්මා කපූර්ට තරුවක වීමේ වාසනාව උදා වුණා.
ඔබ පසුකලෙක එම චරිතය මගහැරීම ගැන දුක්වුණා?
ඔව්… ඒ අලංකාර ගීතමය රංගනයන් දකින විට මම තරමක විස්සෝපයට පත්වුණා තමයි.
ඔබ මධුරි ඩික්සිත්ට වඩා ප්රථම යැයි ඔබ හිතනවද?
මම මධුරිට දෙවැනි වන්නේ ඇමෙරිකන් බස උච්චාරණය කිරීමේදී පමණයි.
මධුරි සහ ඔබ අතර තිබූ නිහඬ, සීතල යුද්ධය ‘ගුලාබ්’ චිත්රපටයෙන් නිමවුණා නේද?
සුපිරි තරු හැමෝම උත්සව අවස්ථාවල් තුළදී ෂැම්පේන් බොන්නට එකට එකතු වුණාට ඒ හැමෝම අතර නිහඬ තරග සහ කුලල් කාගැනීම් තිබෙනවා.
සම්මාන උළෙලවල්වලදී පවා ඔවුන් හාදු දෙන්නේ වැලඳගෙන සුබ පතන්නේ එය සම්මත සිරිතක් නිසයි. ඉතින්… ඒ හැමෝම අතර තිබෙන ගැටුම් මා සහ මධුරි අතර නොතිබෙන්නේ කොහොමද?
ෂාරුක් සමග ඔබ ඇතිකර ගත් අමනාපයට හේතුව පසු කලෙක ඔහුට ලැබෙන චිත්රපට සඳහා ඔබේ නම සඳහන් නොකිරීමද?
එය අපූරු විහිළුවක්, කිසිවිටෙකත් මගේ සහායක රංගනය සුපිරි නළුවකු විසින් රිජෙක්ට් කර නැහැ. ෂාරුක් ද එවැන්නක් කළ බවක් මමවත් දන්නේ නැහැ.
ෂාරුක් සහ මා අතර තද මිත්රත්වයක් ගොඩනැඟුණා. ඒ සමීප බව තුළ අප ව්යාපාර කටයුත්තකට මැදි වුණා. එතැනදී සිදුවූ යම් මත ගැටීමක් නිසා ආරවුලක් ඇති වුණා.
එය එපමණයි.., ෂාරුක් සමග ජෝඩු ක්රමයට රඟපාන්නට බැරි වුණා කියා අමනාප වන්නට තරම් මම නූගත් නැහැ.
රාජ්ය හින්දුස්ථානී චිත්රපටය රිජෙක්ට් කිරීම මත ආමීර් ඔබ සමග අමනාපව සිටියාද?
ආමීර් සහ මම සිනමාවට පැමිණියේ එකම කාලයකයි. අප ඉතා හොඳින් මිතුරුව සිටියා. නමුත් ආමීර් ප්රසිද්ධියේ කළ යම් විහිළුවක් නිසා ඒ මිතුරු බව බිඳී ගියා. ආමීර් කළ ඒ විහිළුව මඳක් සීමාව ඉක්මවා ගිය එකක්. එය මට එතරම් දිරවූයේ නැහැ.
රාජා හින්දුස්ථානි චිත්රපටයට ඇරැයුම ලැබෙන විට ඒ අමනාපය ඇති වී තිබුණා. ඒ නිසාමයි ඒ අපූරු චිත්රපටයට මා පයින් ගැසුවේ.
ඔබ රිජෙක්ට් කරන හැම චරිතයක්ම කරීෂ්මාට යන හේතුව කුමක්ද?
මමත් ඒ දවස්වල ඒ ගැන නිකමට වාගේ හිතුවා. හැබැයි උත්තරයක් හිතට ආවේ නැහැ. හැබැයි ඒ සියල්ල හරහා කරිෂ්මා තරුවක් වීම ගැන මම සතුටු වෙනවා.
සල්මන් ඛාන් සමග රංගනය ඔබට රිසි නොවූයේ ඇයි?
සල්මන් සමග මට නොරිසි බවක් තිබුණේ නැහැ. කිසිවකු සල්මන් සමග සිනමා පෙමකට මට ඇරැයුම් කොට තිබුණේද නැහැ. හැබැයි ඔහු සමග රඟපාන්නට බැරි බැරියරයක් මා හමුවේ තිබුණේද නැහැ. කෙසේ වුවද ඔහු සහ රේවතී රඟපෑ (Love) චිත්රපටයට මම පුදුම විදියට ආසා කළා. එය හරිම සිත්කලු පෙම් පුවතක්.
කොෆි විත් චැට් ප්රසංගයේදී ඔබ සල්මන්ව කෙයාර් නොකළේ ඇයි?
එහෙම දෙයක් නෙවෙයි එතැන සිදුවුණේ. අප දෙදෙනා එකට වැඩ කර නොතිබූ නිසාදෝ මා සහ ඔහු අතර සුහද කතාබහකට එය බාධාවක් වුණා. ඔහු මා දිහා බලා සිටියා. මම ඔහු දිහා බලා සිටියා. යම්තමට හිනා වෙන්නටවත් අපට එදා නොසිතුණේ ඇයිද මන්දා.
සිනමාව තුළ ඔබ ගරු කරන යම් අයකු වේ නම්, ඒ කවුද?
සුන්දර ‘ශ්රී දේවිය’ මගේ සිහින කුමරියයි. ඈ මෙන් රඟපාන්නට, ඇස්වලින් හිනා වෙන්නට, දෙතොලින් මඳහස පාන්නට දන්නා තාරකාවියක් යළි මතුව ඒ නම් එය පුදුමයක්.
ඔබේ සැමියා ජේ මේතා ගැන යමක් කියනවා නම්?
ඔහු හරිම ප්රේමාන්විත සැමියෙක්. තවමත් ඔහු මගේ උපන් දිනයට නැවුම් රෝසමල් වරුසාවකින් මාව සතුටු කරවනවා. ‘පීසා ෂොප් හට්’ එකක් ඔහු විවෘත කළේද මම පීසා කන්න දක්වන දැඩි කැමැත්තටයි.
සමහර දවසට ඔහු මා සමග ඒ පීසා හට් එකට ගිහින් පාරිභෝගිකයන් දෙදෙනකුගේ පැමිණියා සේ පීසා ඇණවුම් කර කතා බහේ යෙදෙමින් එය අනුභව කරනවා. ඇත්තටම ජේ… මරු හස්බන්ඩ් කෙනෙක් බව නොකියාම බැහැ.
-දමයන්ති රේණුකා ප්රනාන්දු