‘ජනකාන්ත’ කියන විශේෂණය යම් කෙනකුගේ නමට මුලින් යෙදෙනවා කියන්නේ ඒක ලොකු වාසනාවක්. එහෙමත් නැත්නම් ලොකු පිනක්. Sri Lanka Latest News
ලස්සන රූපකායක් ඇතිව මෙලොව ඉපදෙන එකත් ඒ වගේම පිනට ලැබෙන වරප්රසාදයක්. ‘ජනකාන්ත’ බවයි ලස්සනයි දෙකම හිමිවෙනවා කියන්නේ ඊටත් වැඩිය පිනක්. ‘ජනකාන්ත’ කියන විශේෂණ පදය ලැබෙන්නේ අසීමිත ජනප්රියත්වයක් ලබන්න පුළුවන් කෙනකුටයි. ‘කේවලගේ විජය සිල්වා’ නොහොත් විජය කුමාරණතුංග කියන්නේ ඒ ජනප්රියත්වය මැරෙන තුරුම ලබාගත්ත කලාකරුවෙක්. මැරෙනතුරු නෙවෙයි මරණයෙන් පස්සේ අදටත් තවමත් විජයගේ නමට මුලින් ‘ජනකාන්ත’ කියන අකුරු පහ නොලියා බැහැ. නළුවෙක් වගේම ගායකයෙක් විදියටත් ඔහු හැමදාමත් ජනකාන්තයි. ඒ ජනකාන්ත බව ඔහුට ලැබුණේ සෝෂල් මීඩියාවල රඟලාවත් තමන්ගේ නමට එස්.එම්.එස්. කරන්නය කියලා තමා විසින්ම තමන්ගේ රසිකයන්ට සිම්පත් අරන් දීලාවත් නෙවෙයි. විජයට ඒ ජනකාන්ත බව ලැබුණේ ඔහුට ඇලුම් කරපු රසිකයන්ගේ හදවත ගැඹුරින්මයි. තවත් විදියකට කියනවා නම් බොක්කෙන්මයි. එයට වයස් භේදයක් හෝ තරාතිරමක් තිබුණේ නැහැ. අදටත් නැහැ.
විජයව අපිට නැති කළේ 1988 පෙබරවාරි 16 වැනිදා. 88ට පස්සේ ඉපදිලා අද තරුණ වයසේ ඉන්න දරුවොත් විජයගේ පින්තූරයක් මුහුණු පොතේ දැක්කම ඒකට කමෙන්ට් කරනවා. ඔවුන් කියන්නෙත් මේ වගේ කඩවසම් පෙනුමක් තියෙන නළුවෙක් ආයෙමත් සිංහල සිනමාවට එන එකක් නැහැ කියලයි. අන්න ඒක තමයි ජනකාන්ත කියන වචනෙ නියමම තේරුම. ජනප්රියම නළුවාට හිමි සම්මානය ගත්ත එක වතාවක විජය මෙහෙම කියනවා.
‘නළුවෙක් හැටියට සිනමාවට ආ දා ඉඳන් තවමත් මිනිස්සු මට ආදරේ කරනවා. මාව පිළිගන්නවා. කලාකරුවකුට තියෙන ලොකුම සතුට තමයි ඒ ඇල්ම. ඒ තරමට මට ආදරය කරන මිනිස්සු වෙනුවෙන් පෝරකයට යන්න වුණත් මම සූදානම්. මාව නරඹන්න ආපු මිනිස්සුන්ට මම දුන්නේ මගේ හදවතින්ම ආව හිනාවයි රංගනයයි විතරයි. හැබැයි එයාලා මට ඒ වෙනුවෙන් දුන්න මේ ජනකාන්ත බව මිල කරන්න බැරි තරම් අමිලයි….’
විජය ඒ ටික කිව්වේ ඔහුගේ අකල් මරණයට මාස ගණනකට කලින් වගෙයි. ඔහු කීවේ සම්පූර්ණ ඇත්ත. ඒ ජනකාන්ත බව මිල කරන්න කවදාවත් කාටවත් බැහැ. තමන්ව ජනප්රියම නළුවා කරන්න කියලා තමන් විසින්ම මුහුණු පොත හරහා පණිවුඩ දාන සැලෝලයිට් නළුවො ඉන්න කාලේ විජය කුමාරණතුංග වැනි නළුවෝ කියන්නේ ඉතින් පට්ටම නළුවො තමයි. ඉහත උපුටා දක්වපු විජය කියපු වචන සෙට් එකත් එක්ක ඔහු වෙනුවෙන් නිර්මාණය වුණු පෝස්ටුවක් මුහුණු පොතේ ඊයේ පෙරේදා දැක්කා. ඒ දැක්ම තමයි මේ සටහන ලියන්නත් හේතු වුණේ. ඇත්තම කියනවා නම් විජය කියන්නේ ජනකාන්ත අමරණීය නාමයක්. සුන්දර චරිතයක්.
මල්මි කෞශල්යා
