කොහොමද මේ කවර් පේජ් එකේ ඉන්න සිංහල සිනමාවේ නිළි රැජිනගේ හැඩ? ‘සිසිවන උවන ඉඟසුඟ ගත හැකි මිටින’ කියලා පැරැණි කවියෝ පද ගැළපුවේ මේ වාගේ හැඩකාර ලලනාවෝ ගැන තමයි. Sri Lanka Latest News
මාලනීගේ සරාගී රුවින් එදා ‘සුරතුර’ පත්තරේ කවරය මේ විදියට අලංකාර වුණේ ෆොටෝ ෂූට් එකකින් නම් නෙවෙයි. මේ සීන් එක තිබුණේ 1977 ප්රවීණ චිත්රපට අධ්යක්ෂ මෙන්ම නිෂ්පාදකවරයකුද වූ ජෝ සුගන්ධගේ ‘නීලා’ ෆිල්ම් එකෙයි. ‘නීලා’ කියන්නේ බොක්ස් ඔෆිස් වාර්තා බිඳහෙළපු අන්තිම ලස්සන ෆිල්ම් එකක්.
මාලනී සෙනෙහෙලතා ෆොන්සේකාගේ පෙම්වතා විදියට එහි රඟපෑවේ 70 දශකයේ ගැහැනු සිත්වල වශියක් වූ සිත්ත විජේසුරේන්ද්ර. මේ කපල් එකත් ඒ කාලේ ජෝඩු විලාසිතාවට රඟපෑවා. ඒ වගේම එයාලා හිටපු හැම ෆිල්ම් එකක්ම හවුස් ෆුල් වුණා. ‘නීලා’ බලන්නත් රසිකයෝ හෝල්වලට ආවේ පිස්සුවෙන් වගේ.
එහෙම ආවේ වැඩිපුරම මාලනීගේ සරාගී රංගනය නිසාද?
එහෙම කතාවකුත් ඒ කාලේ තිබුණා කියලා කසුකුසුවක් තියෙනවා. මේ සීන් එක විතරක් නෙවෙයි. ‘නීලා’ ෆිල්ම් එකේ මාලනීගේ මේ වාගේ සරාගී රැඟුම් තව කීපයක්ම තිබුණලු.
අහිංසක චරිතවලට කොටුවෙලා හිටපු ඈ හිටි අඩියේ නීලා එකේ මේ වාගේ රඟනකොට සිනමා පත්තරවල දිගට හරහට විචාරකයෝ අනං මනං දෙස් දෙවොල් තියන්න ගත්තලු.
‘අනේ දෙවියනේ මාලනීට මොකද මේ වුණේ…?’
‘කවදාවත් හිතුවේ නැහැ මාලනී රඟපායි කියලා’
‘අනේ මාලනී… ආයේ නම් මෙහෙම රඟපාන්න එපා…’
ඔන්න ඔය වගේ විවේචන සමග හීනි ඇනුම්පද ඔහොයියාවට පත්තර පුරාම ගියා. කලකට ඉහත ‘එයා දැන් ලොකු ළමයෙක්’ ෆිල්ම් එක වෙනුවෙන් මොස්කව් චිත්රපට උළෙලේදී මාලනීට ලැබිච්ච ජාත්යන්තර සම්මානෙත් මේ සරාගී රංගනය නිසා මාලනීට අහිමි වෙයිද කියන ඕපාදූපයත් පැපරාසියෝ පත්තර පිටු පුරා පතුරවලා තිබුණා කියලත් කියන්නේ. මොන කතා කොයි විදියට ඇවිළුණත් මාලනී ඒ එකකින්වත් සැලුණෙ නැහැලු. මොකද කියනවා නම් මාලනී කියන්නේ විවිධ චරිත පිපාසයෙන් පෙළුණු අතිදක්ෂ නිළියක්. හැමදාමත් අහිංසක ශුද්ධ වූ චරිත නිරූපණයන්ට තමාව කොටුකරන බැම්මෙන් මිදෙන්නයි හැමදාමත් ඈ උත්සාහ කළේ.
කොහොමත් නීලා ෆිල්ම් එක රසිකයෝ අසීමිත සතුටකින් වැලඳගත්තා. ඒ වටා රොද බැඳුණා. මාලනී නීලා තුළින් තව තවත් අතිශය ජනප්රියත්වයට පත්වුණා.
ඒ වගේම පසුගිය දවසක මාලනී ෆොන්සේකාගේ මේ සරාගී රුව සහිත කවර නිර්මාණය මුහුණු පොතෙන් පළවී තිබුණා. පහළින් වැටිලා තිබුණු කමෙන්ට්වල වැඩිපුරම තිබුණේ මාලනියගේ හැඩකාර රූ සපුවෙහි වර්ණනාවයි.
දමයන්ති රේණුකා ප්රනාන්දු
