නවක රංගන ශිල්පියෙක්, අභියෝග භාර ගැනීමට සැදීපැහැදී සිටින තරුණයෙක් වන සුරන් දසනායක මේ දිනවල අපි අතරට එන්නේ ‘මාරියා’ චිත්රපටය තුළින්. සුරන් ‘මාරියා’ ගැන වගේම, එහිදී මුහුණ දුන් අමතක නොවන අත්දැකීම් ගැනත් ඔහුගේ රංගන ජීවිතය, අනාගත බලාපොරොත්තු පිළිබඳ ‘හාට්’ අපිට කිව්වේ මේ විදියට.Sri Lanka Latest News
ඉතින් කොහොමද මේ දවස්වල වැඩකටයුතු?
ඇත්තටම මේ දිනවල ටෙලිකාස්ට් කළ ටෙලිනාට්ය කිහිපයක් අවසන් කළා. ඒ වගේම අලුතින් ටෙලිනාට්ය දෙකක රූගත කිරීම් සිදුකරගෙන යනවා. ඊට අමතරව මේ දිනවල ‘මාරියා’ චිත්රපටයේ ප්රමෝෂන් වැඩකටයුතුවලට සම්බන්ධව වැඩකරගෙන යනවා.
මුලින්ම ‘මාරියා’ ගැන කතා කරමු?
ඇත්තටම ‘මාරියා’ කියන්නේ වෙනස්ම අත්දැකීමක්. මම කලාවට අලුත්. මේ චිත්රපටයේ අලුත්ම නළුවත් මම. ඒ අත්දැකීම හරිම අමාරුයි. දර්ශන් නොසිතූ වෙලාවක නැතිවුණා. වැඩ කරපු අනිත් කලාකරුවන් වන මහේන්ද්ර පෙරේරා, හේමාල් රණසිංහ, අශාන් ඩයස්, දසුන් පතිරණ, ප්රියන්ත සිරිකුමාර කියන චරිත සමග වැඩකරන්න ලැබීම මාරම අත්දැකීමක්. ඇත්තටම මුහුදෙදි අපි හරිම අමාරු දේවල්වලට මුහුණ දුන්නා. සමහර අවස්ථාවල අපි කිහිපදෙනෙක් ගහගෙන යන්න ගියා. ඇත්තටම හොඳ දේවල් වගේම නරක දේවලුත් වෙන්න ගියා. දෙවියන්ගේ බැල්මක් නිසාද කොහෙද සමහර අවස්ථාවලදී අපි බේරුණා. ඒ අත්දැකීම හරිම සුන්දරයි. මේකේ අවුට්පුට් එකත් හරිම ලස්සනයි. හොඳ නිර්මාණයක් බිහිවුණා. ඒ වගේම හොඳ පිරිසක් සමග වැඩකිරීමට අවස්ථාවක් ලැබුණා.
‘මාරියා’ චිත්රපටයේ රූගත කිරීම්වලදී සිදුවුණු අමතක නොවන සිදුවීම් මොනවද?
මටනම් පළමු දවසේ ඉඳන් ඉවර වෙනකම් අමතක නොවන සිදුවීම් තමයි තියෙන්නේ. ඒ සිදුවුණු සෑම දෙයක්ම හරිම අමාරුයි. මහන්සියෙන් කරපු වැඩක්. ගොඩබිම ඉඳන් කරනවා වගේ නෙමෙයි. ඒ සෑම සිදුවීමක්ම මට අද වගේම මතකයි. එහෙම විශේෂ සිදුවීමක් කියලා නැහැ. ඒ හැම දෙයක්ම මට විශේෂ සිදුවීම් තමයි.
මෙවැනි ඇඩ්වෙන්චර් නිර්මාණයකට නැවතත් ආරාධනා ලැබුණොත් භාරගන්නවද?
මම හරිම ආසයි දැනෙන වැඩක් කරන්න. අභියෝග භාරගැනීමට කැපකිරීම් කිරීමට කැමැතියි. මම හරිම කැමැතියි ඒ වගේ වැඩවලට. අනිවාර්යයෙන් භාරගන්නවා ඒ වගේ නිර්මාණයක් ලැබුණොත්.
ඔබ රංගනට පිවිසෙන්නේ කොහොමද?
ඒකත් අහම්බෙන් සිදුවුණු දෙයක්. මම මුලින්ම ‘පබා’ ටෙලි නාට්යයට තමයි රංගනයෙන් දායක වෙන්නේ අතිරේක චරිතයකින්. අහම්බෙන් වුණත් පසුව ආසාවක් ඇති වුණා. කැපකිරීමුත් කළා. තවම ලොකු දෙයක් කරලා නැහැ මම. ඉතින් හෙමීට ගමනක් යන්න ආසාවෙන් බලාපොරොත්තුවෙන් ඉන්නවා.
චරිතයක් භාරගැනීමේදී තෝරාබේරා ගැනීමක් සිදුකරනවද?
චරිත තෝරාබේරා ගැනීමක් කිරීමට තරම් මුලදී මට අවස්ථා ලැබිලා නැහැ. දැන් තමයි අවස්ථා ලැබිලා තියෙන්නේ. නළුවෙක් වුණාම ලැබෙන හැමදේම භාරගන්න කියලා සමහරු කියනවානෙ. නමුත් එහෙම හැමදේම කරන්න අමාරුයි. අපිට කරන්න පුළුවන් දේවල් තියෙනවා. බැරි දේවලුත් තියෙනවා.
රංගනයට අමතරව වෙනත් වැඩත් කරනවා කියලා ආරංචි?
මම ෆුට්බෝල් කෝච් කෙනෙක් විදියට වැඩ කරනවා මීගමුව පාසලක. මම පාසල් යන කාලයේ ඉඳන් ස්පෝර්ට්ස් කරනවා. ඉතින් කෝචින් කරගෙන යන ගමන් තමයි කලාවට සම්බන්ධ වෙන්නෙත්.
පවුලෙන් ලැබෙන සහයෝගය කොහොමද?
ඇත්තටම මුල් කාලෙදි නම් කැමැති වුණේ නැහැ. නමුත් එයාලා අකමැති වුණත් මම හිතාගත්තා දවසක එයාලට සතුටු හිතෙන වැඩක් කරන්න ඕනෙ කියලා. දැන් නම් ඇත්තටම ලොකු සපෝර්ට් එකක් හම්බෙනවා. දැන් ඉතින් ෂේප් එකේ වැඩ කරගෙන යනවා.
සුරන් දසනායක කියන කලාකරුවා අද දවසේ ඉන්න තැන ගැන මොකද හිතෙන්නේ?
මට හරිම සතුටුයි. මොකද අපේ පරම්පරාවේ කවුරුවත් කලාවට සම්බන්ධ නෑ. දුෂ්කරතා මැද අද ඉන්න තැන ගැන සතුටක් දැනෙනවා. ‘මාරියා’ වගේම තව හොඳ ටෙලිඩ්රාමා කිහිපයක වැඩකටයුතු සිදුකළා. ඒවට ජනතාවගෙනුත් හොඳ ප්රතිචාර ලැබීම ගැන ඇත්තටම සතුටුයි.
ඉදිරියේදී එළිදැක්වීමට නියමිත නිර්මාණ ගැනත් දැනගන්න කැමැතියි?
තව හොඳ චිත්රපටයක් එන්න තියෙනවා. ජගත් ආනන්ද අයියගෙ ‘යකඩ මනමාලි’ කියන චිත්රපටය. ඒ වගේම ටෙලිනාට්ය 3-4ක් සඳහා රංගනයෙන් දායක වුණා. ඒවත් ඉදිරියේදී විකාශය වීමට නියමිතයි. ඒ වගේම අභියෝගාත්මක චිත්රපට සඳහා ආරාධනා ලැබුණොත් හරිම සතුටින් බාරගන්නවා.
හිමාෂි මධුවන්ති සේනාරත්න
