මේ දවස්වල බොහෝ දෙනෙක් කතාකරන සොඳුරු රුවක් තමයි හේෂරාවි වරංගනා. වෙළෙඳ දැන්වීම් හරහා අප දුටු ඇය, දැන් ‘රෝස වෙඩිල්ල‘ ටෙලි නිර්මාණයේ ‘රයිලි‘ ලෙස ඔබ හමුවට එන්නට සූදානම්. කලාවට ආධුනික වුවත්, දක්ෂතාවයෙන් පිරි ඇය, ඇයගේ රංගන දිවියේ පළමු පුවත්පත් සාකච්ඡාවට ‘මව්රට’ ‘හාට්’ අපි සමග එක්වන්නේ මෙලෙසින්, Sri Lanka Latest News
‘රෝස වෙඩිල්ල’ එක්ක මේ දවස්වල ජීවිතෙත් වෙනසක් වෙලා වගේ නේද හේෂරාවි?
ඔව්. මම ගොඩක්ම කාර්යබහුල වෙලා ඉන්නේ ‘රෝස වෙඩිල්ල‘ ටෙලිනාට්යයේ රූගත කිරීම් එක්ක. ඊට අමතරව රූපවාහිනී වෙළෙඳ දැන්වීම් කිහිපයකත් රංගන කටයුතු සිදුකරනවා. ඉතින් ඒ වැඩ කටයුතුත් එක්ක තමයි ජීවිතේ ගෙවෙන්නේ මේ දවස්වල.
මේ හැමදේම ඔබට අලුත්. මොකද හිතෙන්නේ?
ඔව්, ‘රෝස වෙඩිල්ල‘ තමයි මගේ පළමු රංගන අත්දැකීම. මීට පෙර මම වැඩිපුරම දායක වුණේ වෙළෙඳ දැන්වීම්වලටයි. මම ප්රේක්ෂකයන් අතරට මුලින්ම එන්නේ මේ නිර්මාණය හරහා නිසා ඒ ගැන ලොකු සතුටක් තියෙනවා. ඇත්තටම වර්තමාන කලා ක්ෂේත්රය තුළ ඉතා දක්ෂ පිරිසක් ඉන්නවා වගේම ගොඩක් හොඳ නිර්මාණත් බිහිවෙනවා. ඒ ගැන ඇත්තටම සතුටු වෙන්න පුළුවන්.
‘රෝස වෙඩිල්ල’ නිර්මාණයට සම්බන්ධ වෙන්න ලැබුණේ කොහොමද?
ජාතික චිත්රපට සංස්ථාව මගින් මේ නිර්මාණය සඳහා රංගන ශිල්පීන් තෝරාගැනීමක් සිදුකළා. මමත් ඒකට සහභාගි වුණා. එතැනින් තමයි මට මේ නිර්මාණයේ ‘රයිලි‘ කියන චරිතයට පණ පොවන්න අවස්ථාව ලැබුණේ.
‘රයිලි‘ ගැනත් ටිකක් කතාකරමු?
රයිලි කියන්නේ මම ගොඩක් කැමැති චරිතයක්. ඇය හරිම දක්ෂ, ඒ වගේම කටකාර චරිතයක්. මම ඉතාමත් කැමැත්තෙන් තමයි රයිලිගේ චරිතයට පණ පොවන්නේ.
හේෂරාවිගෙයි රයිලිගෙයි සමානකම් ඇති එහෙනම්?
ඇත්තටම මම සැබෑ ජීවිතයෙත් රයිලිගේ චරිතයට ගොඩක් සමානයි. මම ගොඩක් ‘ඇක්ටිව්‘ කෙනෙක්. ඒ වගේම සංගීතයට ගොඩක් ළැදියි. නිහතමානීව ජීවත්වෙන කෙනෙක් නිසා රෝස වෙඩිල්ලේ මට ලැබුණු චරිතය මගේ සැබෑ ජීවිතයට ගොඩක් සමීපයි කියලා හිතෙනවා.
හේෂරාවිගේ පවුලේ විස්තර සහ ලැබෙන සහයෝගය මොන වගේද?
මගේ පවුලේ ඉන්නේ අම්මයි, තාත්තයි, අයියලා දෙන්නයි, අක්කයි. මම තමයි පවුලේ බාලයා. මගේ කලා කටයුතු සාර්ථක කරගන්න මගේ පවුලෙන් මට ලැබෙන සහයෝගය ඉතාමත් විශාලයි.
ඔබේ ඉදිරි බලාපොරොත්තු මොනවාද?
ඉදිරියේදී මම රංගනයෙන් දායක වුණු වෙළෙඳ දැන්වීම් කිහිපයක් විකාශය වීමට නියමිතයි. ඒ වගේම ඉදිරියටත් හොඳ සිනමා සහ ටෙලි නිර්මාණවලට දායක වෙමින් රංගනයෙන් මගේ උපරිමය ලබාදෙන්න බලාපොරොත්තු වෙනවා. රංගනයට අමතරව මම මොඩ්ලින් ක්ෂේත්රයට සම්බන්ධ වීමටත් බලාපොරොත්තු වෙනවා.
මේ හැමදේම අතරේ මම මගේ අධ්යාපන කටයුතුත් කරගෙන යනවා. මම දැනට බිස්නස් ඇන්ඩ් ටුවරිසම් පිළිබඳ උපාධියක් හදාරනවා. එහි වැඩකටයුතු සාර්ථකව නිමකිරීම මගේ තවත් ප්රධාන බලාපොරොත්තුවක්.
හිමාෂා නෙත්මිණි
