කපූර් පවුලේ කට්ටිය ඊයේ පෙරේදා දවසක ඉන්දීය අගමැති නරේන්ද්ර මෝදිව හම්බවෙන්න ගියාලු. කපූර් පවුලේ කට්ටිය කිව්වේ රීමා කපූර්, රන්බීර්, ආලියා, නීතු සිං, කරීන්, සයිෆ් අලි ඛාන්, කරීක්ෂා සහ ශෂී කපූර් තමයි ඉතින්. (Sri Lanka Latest News)
කපූර් කන්ධාන් නමින් මුළු ඉන්දියාව පුරාම ප්රසිද්ධ මේ කට්ටිය මොකටද මෝදිව හම්බවෙන්න ගිහින් තියෙන්නේ? රන්බීර් හෝ සයිෆ් දේශපාලනයටවත් එන්න හදනවද?
එහෙම එකක් නෙවෙයි. එයිට වැඩිය බොහොම වැදගත් කාරණාවකටයි එයාලා එහෙම ගියේ. කාරණය කෙටියෙන් කියනවා නම් ‘කපූර් කන්ධාන්වල’ නිර්මාතෘවරයා වෙච්ච රාජ් කපූර්ගේ අවුරුදු සියයේ ජන්ම දින සංවත්සරය ඉහළින්ම සමරන්නලු සූදානම. ඒ සූදානමේදී ඔහු රඟපෑ ජනප්රියම චිත්රපටද විශාල ගණනක් රජ දැක්මක් ලෙස දින ගණනක් තිස්සේ ප්රදර්ශනය කිරීමටද සියලු විධිවිධාන කපූර් පවුල විසින් සැලසුම් කර ඇත.
අගමැති මෝදි හමුවේ මේ උත්සවයට තියෙන සම්බන්ධය?
දෙසැම්බර් 14 වැනිදා ආරම්භ වන මෙම උත්කර්ෂවත් උත්සවයෙහි ප්රධාන අමුත්තා නරේන්ද්ර මෝදිලු.
මෝදි ආරාධනාව පිළිඅරගෙනද?
ආරාධනාව ඉතසිතින් පිළිඅරන් විතරක් නෙවෙයි. කපූර් පවුල සර්ප්රයිස් කරන්න මෝදි අසීමිත රසකින් පිරුණු ස්පෙෂල් කෑම වේලකුත් කට්ටිය වෙනුවෙන් පිළියෙල කරලලු. එන හැම අමුත්තෙක්ම මනාප කෑම බීම ගැන හරි රහසිගතව හොයලා බලලා ඒ විදියට තමයි මෝදි මේ කලාකාමී සුවිශේෂ පවුල වෙනුවෙන් අර කියාපු රාජකීය කෑම වේල එයාගේ විශේෂම සූපවේදීන්ට කියලා සකසලා තියෙන්නේ.
රාජ් කපූර්ගේ වාගෙම රිෂී කපූර්ගෙත් ප්රියතම රසිකයෙක් වෙච්ච මෝදි, කපූර් පවුලේ සාමාජිකයන් මෙලෙස පැමිණීමත්, රාජ් කපූර්ගේ සියවැනි ජන්ම දිනය වෙනුවෙන් පවත්වන ජන්ම දින උත්සවය වෙනුවෙන් ආරාධිත අමුත්තා ලෙස තමාව තෝරාගැනීමත් ඉහළම භාග්යයක් කොට සලකන බවත් අමුත්තන් හමුවේ පැවැසුවේය.
සමුගැනීමට පළමුව මෝදි කපූර් පවුල සමග ඉතා සුවිශේෂ වූත් අනුවේදනීය වූත් ඡායාරූප පෙළකට පෙනීසිටියේය. එසැණින්ම ඒ සියල්ල සෝෂල් මීඩියාවලටද මුදාහැරිණි. කපූර් පවුල සමග රොදබැඳගෙන සිටින සුවහසක් සිනමා ලෝලීහු එය දැක සොඳුරු කම්පනයකට මැදිවූහ. මෝදි මැදිකොට ගත් සෙල්ෆිවලටද හාදු වරුසාවක් වැටිණි.
ඒ අතර එහි එක් සේයාරුවක් අන් හැම සේයාරුවකටම වඩා කාගෙත් ඇස ගැටුණේ රන්බීර් ඉතා ආදරණීය විදියට ආලියා බාට්ගේ උර මත සිය සුරත වෙලා සිටින සංවේදී දසුන නිසාය.
‘අනේ එය කෙතරම් ආදරණීයද…?’
‘ඇස් අහකට ගන්නට නොහිතෙන තරම් ඔවුන්ගේ ආලිංගනය පියකරුය’
‘ප්රිය රන්බීර්, මේ ප්රේමණීය බැඳීමට කිසි විටෙක ඇස්වහ වදින්න දෙන්න එපා…’
ඒ සොඳුරු සේයාරුව පාමුල සටහන්ව තිබෙන දසදහස් ගණන් කමෙන්ට්වල වූයේ එවැනි ආදර වදන්ය.
දමයන්ති රේණුකා ප්රනාන්දු
