1978 අවුරුද්දේ ලංකාවේ හෝල්වල දුවපු ‘ජනක සහ මංජු’ ෆිල්ම් එක මතකද?
කොහොමද අමතක වෙන්නේ? 78 බයිස්කෝප් පිස්සන්ට නම් ඒක අදටත් අමතක කරන්න බැහැ. අනෙක එක දිගට දින 100ක් දුවපු දිවිල්ලට ජනකයි මංජුවයි ලේසියෙන් අමතක කරන්නත් බැහැ. Sri Lanka Latest News
කේ.ඒ. ඩබ්. පෙරේරා කියන්නේ ලොකු ලොකු සීන් නැති සාමාන්ය මිනිස්සුන්ට හරියන ජනකාන්ත චිත්රපට හදපු ප්රවීණ නිර්මාණකරුවෙක්. 1978 වෙනකොටත් ඔහු ඒ ජාතියේ සිත්කලු ෆිල්ම් 15ක් විතර හදලා තිබුණා. ඔහොම යනකොට ඉතින් මේ සොඳුරු කෙරුම්කාරයට හිතුණා අලුත් කොල්ලෙක්වයි කෙල්ලෙක්වයි දාලා ෆිල්ම් එකක් හදන්න. ඔහු ඒ දෙන්නව හෙව්වේ බොහොම ළපටි පෙනුමටයි.
‘කොහෙන්වත් මොකටද කොල්ලො හොයන්නේ? ඔයාට ඉන්නේ අපූරු පුත්ර රත්නයක්. එයාව ගන්නකො ජනකගෙ රෝල් එකට…’ කේ.ඒ.ඩබ්ලිව්ගෙ නෝනා කිව්වා.
‘කියන්නත් වගේ… ඇත්ත නේන්නම්…’ කියලා ඔහුටත් හිතුණා. ජනකගේ රෝල් එකට ‘ජයන්ත දාස් පෙරේරා’ව ගත්තේ එහෙමයි. මංජුට කෙල්ලෙක්ව හොයන්න සරසවියේ ඇඩ් එකක් දැම්මා. කේ.ඒ.ඩබ්ලිව්ගේ චිත්රපටයක් කිව්වම ඉතින් ඒ කාලේ ලොකු උණක් තමයි. ඒ උණට ආසා තරුණ ගැටිස්සයො මහ ගොඩක් ෆොටෝ එව්වා සරසවිය පත්තරේට. වට්ස්ඇප් පැටර්න් නැති නිසා තැපෑලෙන් තමයි හුඟක්ම ආවේ. ඔය අතරින් ඩිරෙක්ටර්ගේ හිත ගියේ සඳලංකාවේ කෙල්ලෙක්ට. ඈ තමයි ගෝතමී පතිරාජ. ෆිල්ම් එකේ ඩිරෙක්ටර් වැඩේ වගේම ප්රඩියුසර් වැඩේ කළෙත් කේ.ඒ.ඩබ්ලිව්ම තමයි. මොකද කියනවා නම් ජෝඩු තාලෙට රඟපාන ප්රවීණ නළු නිළියෝ සෙට් එකක් ඉන්න කාලේ අලුත් මුහුණු දෙකක් දාලා කරන චිත්රපටයට කවුරුත් අතගහන්න පොඩි බයක් තිබුණා. ඒ තියා ෆිල්ම් එකේ කටවුට් එක ලොකුවට දාන්නත් හෝල්වල අයිතිකාරයෝ බය වුණාලු. ෆිල්ම් එක බාර අරන් තියෙන්නෙත් කේ.ඒ.ඩබ්ලිව්. මහත්තයගේ නමට තියෙන රෙස්පෙක්ට් එක නිසා කියලයි කියන්නේ.
ඔන්න ඉතින් කටවුට් එක බිම තියෙද්දී චිත්රපටය තිරගත වුණා කියමුකෝ. ‘අප්පට සිරිගජ’ කිව්වලු. මුල් සතියෙ ඉඳලම හැම ෂෝ එකක්ම හවුස් ෆුල් වෙන්න ගත්තලු. බිම තියපු කටවුට් අහස උසට ඉස්සෙන්න ගත්තා. ටිකට් නැතිව හැරිලා යන සමහර මිනිස්සු හෝල් එකේ යකඩ දොරවල්වල එල්ලිලා ගෝරි කරන්න ගත්තා. ආරම්භක හෝල් බොහොමයකම ජනක සහ මංජු දින 100 පහුකළා. දින සීයෙන් පස්සෙත් ෆිල්ම් එක හෝල්වලින් ගලවලා තියෙන්නේ බොහොම අමාරුවෙන් තමයි.
‘කොහොමද ජනකයි මංජුයි කරපු කෙරුවාවේ තරම…’
තව රසවත් කතා ඒ ගැන බොහොමයි. එයින් ටිකකුත් කියන්නම්.
‘සුවඳක් දැනේවි හදේහි’ සින්දුවෙන් ක්ලැරන්ස් විජේවර්ධන නියමෙට හිට්වුණා. ඒ වගේම අනෙක් හැම සින්දුවක්ම අසීමාන්තිකව ජනප්රිය වුණා. ‘ලෝකේ ජීවත් වන්නට’ සින්දුව ඩුවට් කළේ ක්ලැරන්ස් එක්ක ප්රවීණ ගායිකා ලතා වල්පොලයි. ලතාගේ හීනි වොයිස් එක ගෝතමීට නියමෙට මැච් වුණා.
ප්රවීණ ගායක ඩී.එම්. ජයරත්න ‘කෝ මා පැතූ ඔබෙ ආදරේ’ සින්දුවට හොඳම ගායකයා විදියට ජනාධිපති සම්මාන ගත්තා. අදටත් ‘ජනක සහ මංජු’ ෆිල්ම් එකේ මොන සින්දුව ඇහුවත් හිතට දැනෙන අමන්දානන්දනීය බව කොයි තරම්ද? ඒ ගැන කියන්න චචන නැහැ. ‘ජනක සහ මංජු’ ෆිල්ම් එක ගැන වුණත් කියන්න තියෙන්නේ එහෙමයි. කියලා වැඩක් නැහැ.
දමයන්ති රේණුකා ප්රනාන්දු
