හැමදාම තනිකඩව ඉන්න බෑනෙ…
බනින්නේ මම චරිතය හොඳට කරන හින්දනෙ…
ඇය චණ්ඩ මාරුතයෙන් එන කුණාටුවක් වගෙයි. ඒ තරමට ගංගා කියන්නේ දුෂ්ට චරිතයක්. ‘සකර්ම’ ටෙලිනාට්ය හරහා ප්රේක්ෂක හදවතට ළෙන්ගතු වන නව පරපුරේ දක්ෂ රංගන ශිල්පිනියක් ලෙස කටයුතු කරන නුරානි තෙන්නකෝන්ට කාලෙකට පස්සේ අපි කතා කළා.
🔴 නුරානි ඉතින් කොහොමද?
මේ දවස්වල ගෙදරට වෙලා ඉන්නවා, කැම්පස් වහල නිසා. කොරෝනා ප්රශ්නයත් එක්ක හැම දේම නතර වෙලා. මාත් ගෙදරට වෙලා විවේකීව ඉන්නවා.
🔴 ඔබ දැන් අම්මා කෙනෙක් වෙලා කියලා ආරංචියි?
අම්මෝ, ඒ මම නෙවෙයි. මම නිරූපණය කරන ගංගා චරිතය තුළින් ආදරනීය පෙම්වතියක් වගේම බිරියක් ලෙස රඟපානවා. වෙනස්ම රංගන පරාසයක් දැකබලාගන්නට පුළුවන් ස්වාධීන රූපවාහිනියේ සති අන්තයේ විකාශය වන ‘සකර්ම’ ටෙලිනාට්ය නැරඹුවොත්. ගංගා චරිතය තවම ප්රේක්ෂකයන් අතරට ගියේ නැහැ.
🔴 ගංගා තුළින් ඔබ මොන වගේ ප්රතිචාරයක්ද බලාපොරොත්තු වන්නේ?
පාරක බැහැලාවත් යන්න බැරි විදියට මට ප්රේක්ෂකයන්ගෙන් දෝෂාරෝපණ අහන්න ලැබෙයි කියලා මම හිතනවා. මොකද ගංගා චරිතය සැරපරුෂ වැඩි චරිතයක්. සුබේගෙ බිරිය ලෙස තමයි මම රඟපාන්නේ. ප්රේක්ෂකයන්ට වෙනස්ම අත්දැකීමක් ලබාගන්න පුළුවන් ගංගා තුළින්.
🔴 මීට කලිනුත් ‘ඉත්තෝ’ ටෙලිනාට්ය තුළ ඔබ නිරූපණය කළ චරිතයට ලැබුණේ එවැනි ප්රතිචාර නේද?
ඔව්, මම හිතනවා ඊටත් වඩා ප්රතිචාර ලැබේවි මේ පාර. මොකද ඒ තරමටම මම දුෂ්ට චරිතයක් නිරූපණය කරන නිසා. ප්රෙක්ෂකයන් ඒ තරම් මට බණින්නේ මම චරිතය හොඳට කරන නිසා නේ. ඉතින් ඔවුන්ගේ ප්රතිචාර මම සතුටින් භාරගන්නවා.
🔴 කොට්ටයක් බඩේ බැඳගෙන රඟපාන අත්දැකීම ගැන කතා කළොත්?
ඇත්තටම මම ඒ අත්දැකීම තවම විඳලා නැහැ. ඉතින් ගංගා චරිතය තුළින් මට වෙනස්ම අත්දැකීම් රාශියක් ලබාගැනීමට සිදුවුණා. සමහර අවස්ථාවල රූපගතකිරීම්වලදී බැණුම් අහන අවස්ථාත් තිබුණා. කොහොම හරි ඉතින් ගංගා චරිතයට සාධාරණයක් කළයි කියලා මම විශ්වාස කරනවා.
🔴 ඉදිරි නිර්මාණ තුළ පෙම්වතියගේ චරිත ඔබට මඟහැරේවිද?
‘සකර්ම’ ටෙලිනාට්යයේ මම පෙම්වතිය ලෙස රඟපානවා. ඉදිරි නිර්මාණවල වැඩිහිටි චරිත සඳහා මාව ගැළපෙනවා නම් අධ්යක්ෂවරුන් ඊට මාව තෝරාගනීවි. මම එහෙම චරිත තෝරා බේරාගැනීමක් කරන්නේ නැහැ. මට කරන්න පුළුවන් නම් මම අනිවාර්යයෙන්ම සම්බන්ධ වෙනවා. හැබැයි දුර බැහැර නිර්මාණ සඳහා මම සම්බන්ධ වෙන්නේ නැහැ. මගේ අධ්යාපන කටයුතු සඳහා බාධාවක් වන නිසා.
🔴 ඒ කියන්නේ ඔබ ඕනෑම චරිතයක් කිරීමට සූදානමින්ද ඉන්නේ?
අපි රඟපෑවාට අවසානයේ පාරේ බැහැලා යන්න ඕනෙ. ඉතින් මගේ පෞද්ගලික ජීවිතයට හානියක් වන විදියේ චරිත නිරූපණය කිරීමට මම යන්නේ නැහැ. මට වගේම මගේ ආදරණීය ප්රේක්ෂකයන්ටත් මගේ රඟපෑමේ වෙනසක් දැනෙන විදියේ චරිත නිරූපණය කිරීමට තමයි කැමැති.
🔴 නුදුරු දිනෙකදී කලා ක්ෂේත්රයේ අධ්යක්ෂවරියක් වීමට සූදානම් වන බව ආරංචියි?
ඔව්, ඒක තමයි මගේ හීනය. අධ්යක්ෂවරියක් ලෙස කටයුතු කරමින් රඟපානවා. මොකද එතකොට තවත් ගොඩක් පහසුයි රඟපෑම් කටයුතුවලට. මොකද හැම දෙයක් ගැනම දැනුමක් තිබෙන නිසා. තවම මම ඒ ගැන හදාරමින් තමයි ඉන්නේ.
🔴 නුරානි විවාහයට සූදානම් වන බවට කටකතාවක් පැතිරෙනවා?
ඔව් ඉතින් හැමදාම තනිකඩවම ඉන්න බැහැනේ. මේ අවුරුද්දේ විවාහ වීමට තමයි සැලසුම තියෙන්නේ. මේ කොරෝනා ප්රශ්නය නිරාකරණය වුණොත් ඒ සුන්දර දවසත් ඉතා ඉක්මනින් උදාවේවි. එහෙම නොවුණොත් විවාහය තව කල් යාවි.
🔴 ඔබේ ආදරණීය පෙම්වතා කලාවට සම්බන්ධ කෙනෙක්ද?
අපෝ නැහැ. එහෙම කෙනෙක් මම කසාද බඳින්නේ නැහැ. මොකද එතකොට ප්රශ්න වැඩියි. ඔහු කලාවට සම්බන්ධ නැහැ. කලා නිර්මාණ රසවිඳිනවා. කලාකාමී හදවතක් ඔහුට තියෙනවා. මගේ වැඩකටයුතු සඳහා ඔහුගෙන් උපරිම නිදහසක් වගේම සහායක් ලැබෙනවා.
– වසන්ත විතාණගේ
