සැර වැර දාන කළු එතනා

හද්ද පිටිසර ගම්මානයක කළු එතනා ලෙසට ජීවය දෙමින් සිනමා තාරකාවියක් වීමට ඇයට වරම් ලැබුණේ ‘සිරි පැරකුම්’ චිත්‍රපටය හරහා. එතැනින් ගමන ඇරැඹූ ඇය අප වැඩි හරියක්ම දුටුවේ රිදී තිරයේ. මෑත කාලයේ ඇය පුංචි තිරයට සම්බන්ධ වීමත් සමඟ ඇය ගැන බොහෝ දෙනා කතාබහ වුණා. ඒ වෙනස ගැන කතා කිරීමට නව පරපුරේ දක්ෂ රංගන ශිල්පිනී සිනෙති අකිලාව අප එකතු කරගත්තේ මේ විදියට.
වැඩිහරියක්ම සිනෙති ඔබව අපි දැක්කේ රිදී තිරයේ. ඒත් මේ දවස්වල වෙනස්ම චරිතයකින් පුංචි තිරයේ අපි දකිනවා?
මම සිරි පැරකුම් චිත්‍රපටයේ කළු එතනාගේ චරිතය රඟපාලා තමයි මේ ක්ෂේත්‍රයට සම්බන්ධ වුණේ. ඒ ලබපු ප්‍රතිචාරත් එක්ක මට චිත්‍රපටවලින් තමයි ආරාධනා ගලාගෙන ආවේ. මේ දවස්වල ජාතික රූපවාහිනියේ විකාශය වන කැලෑහඳ ටෙලිනාට්‍යයේ ග්‍රේස් ලෙසට වලව්කාර පැලැන්තියක චරිතයක් නිරූපණය කරනවා.
ග්‍රේස්ගේ දකින අහිංසකභාවයත් එක්ක හොඳ ප්‍රතිචාර ඇති නේද?
ඇත්තටම ග්‍රේස්ට ගොඩාක් ප්‍රේක්ෂකයො ආදරය කරනවා. වලව්කාර පැලැන්තියක චරිත ගොඩාක් දුරට දකින්නේ සැර පරුෂ චරිතනේ. කැලෑහඳ ටෙලිනාට්‍ය ගොඩදෙනෙක් නරඹන බව දැනෙනවා ලැබෙන ප්‍රතිචාරත් එක්ක.
ඔබේ ආදරණීය සැමියත් එහි රඟපානව නේද?
ඔහු රඟපාන්නේ කුමතේරිස්ගේ චරිතය. අපි දෙන්නා එකම ටෙලිනාට්‍යයේ රඟපෑවාට අපිට එකට රඟපාන්න හමුවුණේ නැහැ. ඔහුගේ රූපගත කිරීම් සිදුවන්නේ කොළඹින් බැහැර ප්‍රදේශවල තමයි.
ඉදිරියට සිනෙති ටෙලිවලින් නිතරම දකින්න ලැබේවිද?
මම සිනමාවට වගේම හොඳ ටෙලිනාට්‍ය නිර්මාණවලට කැමතියි. එහෙම වර්ගීකරණයක් අනුව එකම පැත්තකින් මම සම්බන්ධ වෙන්න හිතාගෙන නැහැ. මට ගැළපෙන හොඳ චරිතයක් ලැබුණොත් මම අනිවාර්යයෙන් භාරගන්නවා.
දැන් ඉතින් එහෙම ආවට ගියාට චරිත කරන්න බැරිව ඇති හස්බන්ඞ්ගේ බලපෑමක් ඇති?
අපෝ කවදාවත් ඔහු මට බලපෑම් නීති රාමුවක් දාලා නැහැ. ඔහු මට උපරිම නිදහස දීලා තියෙන්නේ. අනික අපි දෙන්නම මේ ක්ෂේත්‍රයේ වැඩ කරන නිසා කිසිම ප්‍රශ්නයක් නැහැ. හැමෝම අපිව දන්නවා. ඔහු මට කියලා තියන්නේ කරන්න පුළුවන්නම් කරන්න කියලා.
ඔබ දෙදෙනා දැන් විවාහ වෙලා කාලයක් ගෙවීගෙන යනවා. කොහොමද විවාහ ජීවිතේ?
එහෙම කිසිම වෙනසක් දැනුණේ නැහැ. එදා වගේම අදටත් දෙන්නා සතුටින් ඉන්නවා. එදා ඉඳල අපි දෙන්නා එකට තමයි කාලය ගතකළේ. වෙනසකට තිබුණේ එක වහලක් යට ජීවත් නොවුණ එක විතරයි. ඒ ජීවිතයත් හරිම සුන්දර විදියට ගලනවා.
ගලන ගඟ හරිම සුන්දරයි කියනවා වගේ ගෙවෙන ජීවිතයට තවම වෙනසක් සිදුවුණේ නැද්ද?
තවම ඉතින් අපි බැඳලා වැඩි කාලයක් නැහැනේ. තවම දරුවන් ගැන හිතුවේ නැහැ. දරු සුරතල් බලන්න ආසාවෙන් අපි ඉන්නවා. කාලයත් එක්ක ඒ හැමදේම සුන්දර විදිහට ගලාගෙන යයි.
ඔබේ තිබුණ ජනප්‍රියතාවයට තවමත් ඇගැයීමක් ලැබුණේ නැහැ නේද. එය ගැන දුකින්ද ඉන්නේ?
සම්මාන ගැන මම හිතන්නේ ලොකු බොරුවක් විදියට තමයි. එය ගැන කලකිරීමක් තියෙවා. සුදුස්සාට හිමි තැන නැහැ. එය මම දකිනවා. ඔය ටික තමයි අපිටත් කවදාහරි වෙන්නේ. ලැබුණොත් ආදරයෙන් භාර ගන්නවා. සම්මාන ගන්න හිතාගෙන මම රඟපාන්නේ නැහැ.
වසන්ත විතාරණගේ