‘රැස්’ ගිය හැටි දන්නවද

ජනවාරි 1 වැනිදා විකාශය වීමට නියමිතව තිබූ ‘රැස්’ ටෙලිනාට්‍ය හදිසියේම නතර කළේ ඇයි?
එයට ප්‍රධානම හේතුව තමයි යම්කිසි පුද්ගලයකු ‘රැස්’ ටෙලිනාට්‍යයේ විනාඩි 8ක පමණ කොටසක් අන්තර්ජාලයට මුදාහැර තිබීම. මේ ප්‍රශ්නය දුරදිග ගිය හේතුව නිසා තමයි ජනවාරි 1 දාට විකාශනය වීමට තිබුණු ‘රැස්’ නාට්‍ය විකාශය නොකරන්න තීරණය කළේ. ජනවාරි අට වැනිදා සිට නැවැත 8.30ට සිරස නාළිකාවේ රැස් විහිදෙනවා.
මේ කාගේ කීමට වුණා කියලද ඔබ හිතනනේ?
එය අපට තීරණාත්මකව කියන්න අපහසුයි. සිරස නාළිකාවේ අධ්‍යක්‍ෂ මණ්ඩලය දැනටමත් එය පිළිබඳව පරීක්‍ෂණ පවත්වමින් යනවා. මේ සිදුවීමට සම්බන්ධ කිහිපදෙනකුගේ රාජකාරි කටයුතු තාවකාලිකව අත්හිටුවීමටත් කටයුතු කර තිබෙනවා
‘රැස්’ හරහා ඔබ සමාජගත කිරීමට උත්සාහ කළේ තවත් රැල්ලක්ද?
මට වුවමනා කළේ කවුරුත් කතා නොවුණු මාතෘකාවක් ගැන කතා කරන්න. දැන් පාසල් ඇඳුමින් සැරැසිලා පෙම් ජවනිකා කරන ටෙලිනාට්‍ය හැම තැනම දකින්න තිබෙනවා. ඉතින් මම ලබපු අත්දැකීම් සමඟ කාලයක් තිස්සේ මට හිතුණා නර්තන කලාව ගැන නිර්මාණයක් කරන්න. ඉතින් ‘රැස්’ හරහා ඉස්මතු වන්නේ පාරම්පරික නර්තන ශිල්පීන් දෙදෙනෙක් හා ඔවුන්ගේ දරුවන් අතර ඇති වන ආදර සම්බන්ධයක් හා ඒ තුළ ඇතිවන සිදුවීම් මාලාවක්. මම හිතනවා ටෙලිනාට්‍ය කලාවෙන් දුරස්වී ගිය බොහෝ ප්‍රේක්‍ෂක ප්‍රමාණයක් ‘රැස්’ හරහා නැවැත එකතුවෙයි කියලා මෙය වෙනස්ම වැඩක් නිසා.
සිද්ධාර්ථ ගෞතම ටෙලිනාට්‍ය නිර්මාණ කළ ඔබ මෙවැනි නාට්‍යක් නිර්මාණයක් කිරීම ගැන කතා කළොත්?
සිද්ධාර්ථ ගෞතම ටෙලිනාට්‍ය මට අභියෝගයක්. ඒ අභියෝගයම මම සාර්ථකව මුහුණ දී ඉහළ ප්‍රතිචාර මැද උසස් රසවින්දනයක් ප්‍රේක්‍ෂකයන්ට ලබා දුන්නා. ඒ මගේ පළමු ටෙලිනාට්‍ය. මම පළමුවෙන්ම ‘හිරු’ නාළිකාවේ අධ්‍යක්‍ෂ මණ්ඩලයට ස්තුතිය පුද කරනවා. මට ඒ අවස්ථාව ලබා දීම ගැන. ඉතින් මගේ හිතේ තිබුණා තාරුණ්‍යය වෙනුවෙන් දෙයක් කරන්න. බොලිවුඞ් ආකෘතිය සමාන නිර්මාණයක් කරන්න. ඒ ගත්ත උත්සාහයේ ප්‍රතිඵල තමයි ඔබ අද මේ දකින්නේ.
සිද්ධාර්ථ ගෞතම ටෙලිනාට්‍යයේ ගෞතම චරිතය නිරූපණය කළ කැලුම් ශ්‍රී මෙයට තෝරා ගැනීම විශේෂ හේතුව?
ඔහු දක්‍ෂ නළුවෙක්. ඔහුගේ දක්‍ෂතාව එක කෝණයකින් මට කියන්න බැහැ. ගෞතම චරිතය වෙනුවෙන් සටන් කිරීමේ හැකියාව, අශ්වයන් පිටේ යෑමේ හැකියාව වගේම ප්‍රියමනාප පෙනුමක් මට වුවමනා කර තිබුණු නිසා ඔහුව තෝරා ගත්තා. ‘රැස්’ටෙලිනාට්‍ය තාරුණ්‍යයේ නර්තන කලාව ගැන කියැවෙන නිර්මාණයක්. ‘රැස්’ සඳහා දායක වුණු ශිල්පීන්ගේ සැඟවුණු දක්‍ෂතා මම එළියට ගත්තා කියලා කිව්වොත් හරි.
ඔබත් දන්න කරුණක් තමයි රංගන ශිල්පීන් තේරීමේදී රූපවාහිනි නාළිකාවට අවශ්‍ය පරිදි තමයි ශිල්පීන් තෝරගන්නේ. ‘රැස්’ ටෙලිනාට්‍යට මෙය බලපානවාද?
ඔය කාරණාව මමත් දන්නා කරුණක්. නමුත් මගේ කිසිම නිර්මාණයකට රූපවාහිනි නාළිකාවලින් බලපෑමක් එල්ලවූයේ නැහැ. ශිල්පීන් තේරීමේදී මේ නිර්මාණ සාර්ථක වීමට ප්‍රධානම හේතුව එයයි. අලුත්ම කතාවක් නිසා ඒ නිලධාරීන් දන්නේ නැහැ. මෙයට සුදුසු කවුද ඩාන්සින් කිරීමට දන්නේ කියලා. ඒ නිසා මට පූර්ව නිදහස ලබා දුන්නා නිර්මාණයට ගැළපෙන පරිදි ශිල්පීන් තෝරාගැනීමට.
පියුමි හංසමාලි නිරූපණ ක්‍ෂේත්‍රයේ ඉන්න දක්‍ෂ රංගන ශිල්පිනියක්. ඇයත් ටෙලිනාට්‍යයක සම්බන්ධ වන පළමු අවස්ථාව මෙය?
පියුමි හංසමාලි මේ ටෙලිනාට්‍යයේ මලිනා චරිතය නිරූපණය කරනවා. ඇය මම කරතිබෙන නිර්මාණ දැක තිබෙනවා. ඇය ගැන විවිධ අය විවිධ අදහස් ප්‍රකාශ කර තිබුණත් ඇය සමඟ වැඩ කරන්න පහසුයි. කලා ශිල්පිනියක් විදියට ඇය ඇයගේ චරිතය වෙනුවෙන් උපරිම කැපවුණු බව මට දන්නවා. ඒ විතරක් නෙවේ ඇයට මම මේ ටෙලි නාට්‍යයට ආරාධනා කළාට පසු ඇය දෙවරක් නොහිතා මගේ ආරාධනය පිළිගත්තා එය මට සතුටක්.
ඔබ දැන් රංග ශිල්ප ශාලිකාවකුත් ආරම්භ කර තිබෙනවා. ඉදිරියේදී නාටක රංගන ශිල්පීන්ට ලොකු පිටිවහලක් වෙයි?
මම මේ ක්‍ෂේත්‍රයට ආවේත් තිස්ස ගුණවර්ධන, යසපාලිත නානායක්කාර වගේ ප්‍රවීණ ශිල්පීන් යටතේ හැදෑරීමක් කරලා. අලුත් ළමයින් රඟපෑමට කාලයක් ගන්නවා. ඒත් ඔවුන්ට රඟපාන්න බැහැ.
මගේ මේ ප්‍රශ්නය මගේ නිර්මාණවල සම්බන්ධ කරගන්න සමහර අලුත් පිරිසක් මම දැක්කා. හැමෝටම රඟපාන්න බැහැ. ඒ නිසා කලාරෝ රංග පාසලක් මම ආරම්භ කළා. හැදෑරීමක්, දැනුමක් ඇතිව මේ ක්‍ෂේත්‍රයේ අලුත් පරපුරට ඉදිරියට යෑමට එය උදව් වේවි. මගේ නිර්මාණවලට විතරක් නෙවේ වෙනත් නිර්මාණකරුවන්ගේ නිර්මාණවලටත් හැදෑරීමක් ඇතිව යනකොට කිසිම කෙනෙක්ට ප්‍රශ්නයක් නැහැ. රඟපෑම ගැන හැදෑරීමට අවශ්‍ය අයට මම සමඟත් එකතුවෙලා වැඩ කරන්න පුළුවන්.
වසන්ත විතාරණගේ