මායාරාජිනී ගැන මම බයෙන් හිටියේ

අනුරාධපුර, බසවක්කුලම වැව ආශ්‍රිත ප්‍රදේශයේ අනුලා රැජිනගේ අවතාරයක් සැරිසරන බව ජනප්‍රවාදයේ කියැවෙනවා. ඒ ජනප්‍රවාදය මූලික කරගෙන සැකසෙන සුවිශේෂී නිර්මාණයක් තමයි ‘මායාරාජිනී’ ටෙලිනාට්‍යය. ඒකාකාරී ටෙලිනාට්‍ය කලාව වෙනස්ම මාවතකට ගත් එම නාට්‍යයේ නිර්මාතෘ ප්‍රියන්ත ශ්‍රී සමරකෝන් සමඟ අප කළ කතාබහයි මේ.
‘කවුරුන්ද නුඹ මගේ’ හරහා පටන්ගත් ඔබ අද රැජිනක් හොයනවා. එය ගැන ඔබේ අදහස්?
ප්‍රභාත් රෝෂන් නිෂ්පාදනය කළ ‘කවුරුන්ද නුඹ මගේ’ මගෙත් පළමු ටෙලි නිර්මාණය. මම ප්‍රභාත් රෝෂන්ට විශේෂයෙන් ස්තුතිය පුද කරනවා. මට ඒ අවස්ථාව ලබාදීම ගැන ඉන්පසු මං ‘දංකුඩ බණ්ඩා’ නිර්මාණය කළා. ‘මායාරාජිනී’ මගේ තුන්වැනි දරුවා විදියට තමයි මම සලකන්නේ.
‘මායාරාජිනී’ ටෙලිනාට්‍යයට ලැබෙන ප්‍රතිචාර කොයි වගේද?
ඇත්තටම මම හිතුවේ නැහැ ‘මායාරාජිනී’ ප්‍රේක්ෂකයන් වැලඳ ගනීවි කියලා. මොකද දැන් තියෙන රැල්ලත් එක්ක මේ වෙනස ගැටලුවක් වෙයි කියලා මම හිතුවා. නමුත් මම මගේ උත්සාහය, කැපවීම අත්හැරියේ නැහැ. ලංකාවේ විතරක් නෙමේ විදේශීය ප්‍රතිචාරවලින් පවා මට ගොඩදෙනෙක් කියන්නේ නාට්‍ය අතර මඟ නවත්වන්න එපා කියලා තමයි. ඔවුන් කියන්නේ අද බහුතරයක් නාට්‍ය හරයක් නැතිව එක පාරට නතර කරන බවයි. ‘මායාරාජිනී’ සතිඅන්තයේ සිරස නාළිකාවේ විකාශය වෙන නිසාත්, විනාඩි හතළිස් පහක් එක දිගට විකාශය වෙන නිසාත් ප්‍රේක්ෂකයන් එයට බැඳිලා ඉන්නවා.
ප්‍රබල කලා ශිල්පීන් පිරිසක් එක්ක තමයි ඔබ ‘මායාරාජිනී’ කරන්නෙ. එය අභියෝගයක් වෙන්නට ඇති?
ඇත්තටම එය තමයි මට තිබුණ ලොකුම අභියෝගය. එවැනි දැවැන්තයන් රාශියක් එක්ක වැඩ කරන එක. කේ.බී. හේරත් තිර රචනයක් වන අතර, විශාරද නන්දා මාලිනී පසුබිම් ගායනයෙන්ද, සුනිල් ආරියරත්න ගීපද රචනයෙන්ද, දිනෙෂ් සුබසිංහ සහ ලසන්ත ජයසේකර පසුබිම් සංගීතයෙන් ‘මායාරාජිනී’ට සම්බන්ධ වෙනවා. ඔවුන්ගේ ඒ සුවිශේෂත්වය හෑල්ලුවකට ලක්වෙයි කියලා මම ලොකු බයකින් හිටියේ. නමුත් නාට්‍ය විකාශය වීමත් සමඟ නාට්‍යයට ලැබෙන ප්‍රතිචාරත් එක්ක මම නිර්මාණයට සාධාරණයක් කර ඇති බව දැන් විශ්වාසයි.
ප්‍රේක්ෂක ප්‍රතිචාර මැද විකාශය වුණත් ‘මායාරාජිනී’ හරහා චරිත අතුරුදන් කරන බවක් අපි දකිනවා. මෙයට හේතුව?
ඖෂධ හාමි චරිතය රඟපාන්නේ ජනක ප්‍රේමලාල්, ඔවුන් විශිෂ්ට ලෙස චරිතයට පණ දෙනවා. ඒත් කිසිම ප්‍රශ්නයක් නිසා ඖෂධ හාමි අතුරුදන් කළා නෙමේ. දැන් ‘උදුල සර්’ අතුරුදන් කළ බව කතා වෙනවා. නිර්මාණයේ හැම ශිල්පියෙක්ම අපි සමඟ හොඳයි. නමුත් කතාවේ හැටියට එය සිදුවන්නේ. ඉදිරියේදී මේ අතුරුදන් වන චරිත මොන විදියට ගලාගෙන යනවාද කියලා දැන්ම කියන්න මම කැමැති නැහැ. නාට්‍යයේ රසය තියෙන්නේ කුතුහලය තුළ නිසා.
අද නිර්මාණ හරහා ශිල්පීන් අපි දකින්නේ එකම කල්ලියකට කොටුවුණ චරිතයක් විදියට තමයි. ඔබේ නිර්මාණවල එලෙස කල්ලියක් ඉන්නවාද?
මම සුදුස්සාට සුදුසු ඉඩකඩ දෙනවා. මමත් මේ තැනට එන්න ගොඩාක් දුක් වින්දා. රැජිනගේ චරිතයට අපි රංග ශිල්පීන් කිහිප දෙනෙක් ගැන සොයා බැලුවා. ඒත් චරිතයට ගැළපෙන කෙනා අපිට ලැබුණේ ෆේස්බුක් හරහා තමයි. ‘මායාරාජිනී’ ටෙලිනාට්‍යයේ නිෂ්පාදිකා මාලතී විජේසිංහ අන්තර්ජාලය හරහා තමයි සුමුදු ප්‍රසාදිනීගේ ඡායාරූපයක් දැකලා තියෙන්නේ. ඒ හරහා අපි ඇය සොයාගෙන රැජිනිට තෝරාගත්තා.
ඔබට මේ නිර්මාණය වෙනුවෙන් සම්මානයක් ලැබෙයි කියලා හිතෙනවද?
ඇත්තටම මට ‘මායාරාජිනී’ වෙනුවෙන් සම්මානයක් ලැබෙයි කියලා හිතනවා. දැන් තිබෙන නිර්මාණවල ඒකාකාරිත්වයෙන් මිදුණු වෙනස්ම කතාවක් නිසා. සම්මතයක් නැතත් නිර්දේශිත නාට්‍යයට ඇතුළත් වුණත් මට ඒ ඇති.
වසන්ත විතාරණගේ