මම අඩනිරුවත මාකට් කරන්නෙ නෑ

නිරූපිකාවක් ලෙස ජාත්‍යන්තරය සමඟ තරග කරමින් ජයග්‍රහණය කළ ඈ නතර වූයේ ‘විසුල අහස යට’ තුළයි. එයින් යම් පන්නරයක් ලබමින් නිලුක්ෂි අමන්දා ලෙසට ජනප්‍රියත්වයක් ලබන්නට වගේම ඇයට සිනමාවේ පළමු වරට අභිෂේක ලබන්න ‘ෂෙලිනා’ චිත්‍රපටය භාග්‍යයක් වුණා. ඇයගේ සතුට උතුරා ගලා යන මේ මොහොතේ ඇය අපි සමඟ කතා කළේ මේ විදියට.
ඉතින් මම අමන්දා කියන්නද, ෂෙලිනා කියලා කතා කරන්නද මුලින්?
ගොඩදෙනෙක් ඉතින් මාව දැන් හඳුනන්නෙ ෂෙලිනා කිව්වම තමයි.
ෂෙලිනා ලෙසට ජනප්‍රිය වෙන්නට චරිතය වගේම චිත්‍රපටයත් බලපාන්න ඇති නේද?
අනිවාර්යයෙන් එයත් එක විශේෂත්වයක්. චිත්‍රපටයේ නමත් ‘ෂෙලිනා.’ මගේ චරිතයත් ‘ෂෙලිනා.’ ඉතින් නම හොඳට මතක තියාගෙන ෂෙලිනා කිව්වාම දන්නවා.
ඉතින් ෂෙලිනාට ලැබෙන ප්‍රතිචාර ගැන කතා කළොත්?
චිත්‍රපටය තිරගත වීමට අරන් වැඩි කාලයක් නැහැ. ලැබෙන ප්‍රතිචාරත් එක්ක චිත්‍රපටය ගොඩදෙනෙක් නරඹන බව දැනෙනවා. ෂෙලිනාට මගේ ආදර රසික රසිකාවියන් ආදරය කරනවා වගේම මමත් ඉතින් ෂෙලිනාගේ රසිකයෙක්.
ඔබ මුලින්ම අපි දුටුවේ පුංචි තිරයේ. එය ගැන කතා කළොත්?
කැළුම් පාලිත මහිරත්න අධ්‍යක්‍ෂණය කළ ‘විසුල අහස යට’ ටෙලිනාට්‍යයේ තමයි මම මුලින්ම ප්‍රධාන චරිතයක් රඟපෑවේ. ඒ ටෙලිනාට්‍යයට ඔහුගෙන් ලැබුණු ගුරුහරුකම් ඉතා විශිෂ්ටයි. ඔහුගෙන් ඒ ලැබුණු ගුරුහරුකම් එක්ක තිබුණු බය නැති වුණා. ඒ නිසාම තමයි මම චිත්‍රපටයට සම්බන්ධ වීමට හිතුවේ.
ඇයි ඔබ මෙපමණ කාලයක් නිර්මාණ සඳහා ඔබේ දායකත්වය ලබා නොදුන්නේ?
නිර්මාණවලින් මට ආරාධනා ලැබුණා. ඒත් මම කැමැති වුණේ නැහැ. මම ගොඩක් කැමැති නිරූපණ ක්‍ෂේත්‍රයට. මොකද නිර්මාණවලට ලොකු කාලයක් යොදවන්න වෙනවා. ඉතින් මම කොහොමත් මට වදයක් වෙන විදියේ වැඩ කරන්නේ නැහැ.
ඔබට සිනමාවේ වරම් ලැබුණේ ජනප්‍රිය නළුවෙක් එක්ක තිබුණු දැනහැඳුනුම්කමක් නිසා කියලා කියනවා. ඇත්තද මේ කතාව?
දිනෙත් ද සිල්වා කියන්නේ මගේ හොඳ මිතුරෙක්. ඒ වගේම සහෝදර අයියා කෙනෙක්. ඒ විතරක් නෙවේ ඔහු නිරූපණ ක්‍ෂේත්‍රයට වගේම මුළු කලා ක්‍ෂේත්‍රයටම ඔහු වටිනා සම්පතක්. ඔහු සමඟ මම නිරූපණ ක්‍ෂේත්‍රයේ එකට වැඩ කළා. ඉතින් ඒ දැනහැඳුනුම්කම් මත තමයි මට සිනමා තාරකාවියක් වීමට අවස්ථාව උදාවුණේ. මේ අවස්ථාවේ දිනෙත් අයියාට මගේ විශේෂ ස්තුතිය පුදකරනවා. ෂෙලිනා චරිතය ගොඩනඟා ගැනීමට ඔහුගෙන් වගේම අනුෂ් අයියාගෙන්ද මට ලොකු සහායක් ලැබුණා.
ඔබේ ආදරණීය සැමියාගෙන් මොන වගේ දායකත්වයක්ද ඔබට ලැබෙන්නේ?
ඔහු මම ගැන තබන විශ්වාසය ඒ හැම දේටම ශක්තියක් බව කිව යුතුයි. ඔහු මට එහෙම නීති – රීති පනවලා නැහැ. ඔහු කුඩා කාලේ ඉඳලා ඇමෙරිකාවේ හැදුණේ, වැඩුණේ. ඉතින් ඔහු මට කියන්නේ ලස්සනට අඳින්න. සතුටින් ඉන්න කියලා. මට කරන්න පුළුවන්නම් විතරක් නිර්මාණවලට සම්බන්ධ වීමට නිදහස දීලා තියෙන්නේ. ඔහුගේ ඒ විශ්වාසය මම හැමදාමත් හදවතින්ම රකිනවා.
නිරූපිකාවක් ලෙසට කටයුතු කිරීම ඒ තුළින් අහන්න ලැබෙන කතා ගැන මොකද හිතෙන්නේ?
එක්කෙනෙක් දෙන්නෙක් කරන වැරැදිවලට හැමෝම පලි නැහැ. නමුත් මිනිසුන් පිළිගන්නේ හැමෝම එකම විදියට. ඕනෑම ක්‍ෂේත්‍රයක වෘත්තියක වැරැදි සිදුවෙනවා. නමුත් කලා ක්‍ෂේත්‍රයේ ඉන්න අය ජනප්‍රිය නිසා කතා හදනවා වැඩියි. තමන් කරන දේ හරියට කරල හිටියොත් කාගෙන්වත් ප්‍රශ්නයක් නැහැ.
නිරූපිකාවක් වුණාම අනිවාරයයෙන් බිකිනි ඇඳිය යුතුමද?
එහෙම කියලා බලකිරීමක් නැහැ. තමන්ට කැමැති නම් අඳින්න පුළුවන්. නැතිනම් සරිලන පහසු ඇඳුමක් අඳින්න පුළුවන්. බිකිනි ඇඳලා ෆැජන්ට් ගියා කියලා එය අසාමාන්‍ය විදියට බලන එක වැරැදියි.
බෙලිවුඞ් සිනමා නිර්මාණයක අඩ නිරුවත් ලෙසට රඟපෑමට ආරාධනාවක් ලැබුණොත් ඔබට?
කිසිසේත්ම මම සම්බන්ධ වෙන්නේ නැහැ. අඩ නිරුවත්වලින් මට ජනප්‍රිය වෙන්න කිසිම වුවමනාවක් නැහැ. එහෙම ජනප්‍රිය වීමේ ආශාවක් තිබුණා නම් මම මෙයට කලින් සම්බන්ධ වෙලා.
වසන්ත විතාරණගේ