‘කහෝන ප්යාර් හේ’ (Kahona Pyar Hey) හී රඟපා එක රැයකින් උතුරු ඉන්දීය යෞවනියන් සහ කාන්තාවන් අතර උන්මාදනීය තරුවක වූ ‘රිතික් රෝෂන්’ මේ දිනවල විශාල පෙරළියකට සැරැසෙමින් සිටින වග ‘බොලිවුඩ් ගොසිප්’ ඔස්සේ පලවූ අලුත්ම පැපරාසි නිවුස්වල සඳහන්ව තිබිණ.
ඒ පාර මොකක්ද? තවත් අලුත් නිළි කෙල්ලක සමග හුටපටයක්ද?
එහෙම ඇහුවාට එහි වරදක් නැත.., ඒ තරමටම රිතික්ගේ නම උතුරු ඉන්දීය නිළියන් සමඟ වරින්වර පැටළුණේය. මුදල්, බලය, ජනප්රියත්වය සමග කඩවසම් රූපකායක් ලැබුණු විටෙක බොහෝ පිරිමින් යහපත් බවෙහි සළු උනාදමා අසංවර නාම පුවරු තම ජීවිතය මත ලේබල් කරගනිති.
වැල්වටාරම් අවැසි නැත. කතාවට බහිමු.
ඇත්තෙන්ම එය සුපිරි කතාවකි. කෙටියෙන් කියනවා නම් ජනප්රිය දමිළ සිනමා පටයක් වූ ‘වික්රම් වේද’ (Vikram Vedha) ගැන කතාවකි.
‘වික්රම – වේද’ කියන්නේ 2017 අවුරුද්දේ කොලිවුඩ් සිනමාව හොල්ලපු චිත්රපටයක් නේද?
ආයෙත් අහලා. ලාබය පමණක්ම ඉන්දියානු රුපියල් කෝටි 600ක් පමණ ‘වික්රම් වේද’ තුළින් උපයාගෙන තිබුණා. මැර කල්ලියක නායකයෙක් සහ අවංක පොලිස් නිලධාරියකු වටා ගෙතුණු වික්රම්වේද කතා පුවතෙහි රඟපෑවේ මාධවන් සහ සේදුපති, චිත්රපටය අධ්යක්ෂණය කළේ පුෂ්කර් සහ ගයාත්රි.
මාධවන් එහි වික්රම් නම් පොලිස් නිලධාරියා ලෙසත්, සේදුපති වේද නම් පාතාල නායකයා ලෙසත් ඉතාම අනර්ඝ රංගනයක යෙදිණ. ඒ රංගනයන් කොයිතරම් සුපිරියිද කියනවා නම් ‘හවුස් ෆුල්’ හේතු කොටගෙන ප්රවේශ පත්ර අහිමි පුද්ගලයන් පසුදා උදෑසන දර්ශනය නැරැඹීම සඳහා ඒ රාත්රියේ ප්රධාන ගේට්ටුව පාමුල බිම වාඩි වී සිටියහ.
ඉතින් ඔය සුපිරි චිත්රපටයට රිතික්ගේ ඇති සම්බන්ධය මොකක්ද?
රිතික් මේ දවස්වල සූදානම් වන්නේ ‘වික්රම් වේද’ හින්දි භාෂාවෙන් නිර්මාණය කරන්නටය.
සේදුපතිවයි මාධන්වයි එකතු කරලා..,
නැහැ… ‘වික්රම්’ ලෙස සායිෆ් අලි ඛාන්වත් ‘වේද’ ලෙස එකතු කර ගෙනයි රිතික් ‘වික්රම් වේද’ කරන්නට යන්නේ, අධ්යක්ෂණය සඳහා රිතික් මුදලට ගෙන තිබෙන්නේ දමිළ සිනමාපටය නිර්මාණය කළ පුෂ්කර් සහ ගයාත්රිවමයි.
දකුණු ඉන්දියානු ගැම්මට වැඩේ සිද්ධ වෙයිද?
මොකද විජය සෝදුපති සහ මාධවන් කියන්නේ සුපිරි පොරවල් දෙකක්. ඒ වාගේම ඒක මරේ මරු ‘සුසංයෝගයක්…’
රිතික් සහ සයිෆ් කියන්නේත් කදිම සුසංයෝගයක් නෙවෙයිද?
දකුණු ඉන්දියානු ගොසිප්වල නම් තියෙන්නේ රිතික් වැඩේ ‘අනාගන්නා’ කතාවකි. රිතික් ආමීර් ඛාන්ට මේ සඳහා ආරාධනා කළ බවත් ඔහු එය සුහදව ප්රතික්ෂේප කළ බවත් ඉන්පසු සයිෆ්ව පොලිස් නිලධාරියා සඳහා තෝරා ගත් බවටත් කටකතාවක් වේ.
එතකොට සේදුපති කළ පාතාල චරිතය කරන්නේ රිතික්ද?
ඔව්… ආරංචිය එහෙමය. රිතික්ව සුළුකොට තකන්නට බැරිය… පොඩ්ඩක් විතර ඕවර් ඇක්ටිං ගියාට ‘ඩූම්-2’හී මං පහරණ හොර දෙටුවා විදියට රිතික් කළ රංගනය නරක නැත.
කොයික කෙසේ වුවද දමිළ අධ්යක්ෂවරුන් වූ පුෂ්කර් සහ ගයාත්රි ‘වික්රම් වේද’ හී බර කරට ගෙන ඇත. ඔවුන් රිතික්ට කියා ඇත්තේ.
ඔබ සතු ධනය නොබියව ‘වික්රම් වේද’ වෙනුවෙන් තිළිණ දෙන්න… ඉතිරිය අපට බාර දෙන්නැ’යි කියාය.
රිතික්ට ලැදි කෝටි සංඛ්යාත අනුගාමිකයන් රිතික් වේද්ට ආරූඪ වනතුරු මහත් නොඉවසිල්ලෙන් බලා සිටිති. ඉන්දීය චිත්රපට තිරගත කිරීමේ කමිටු මණ්ඩලයද දැන්ම තියාම ‘වික්රම් වේද’හි හින්දි සිනමා පටය ගැන ගණන් හිලව් බලන බවද කියැවේ.
ප්රධාන නිළියක තවම තෝරා නැති ‘වික්රම් වේද’ හින්දි චිත්රපටයෙහි රූගත කිරීම් ජුනි මාසයේ ආරම්භ වීමට නියමිත බව රිතික් මෙන්ම පුෂ්පකාර් සහ ගයාත්රිද මාධ්යයට පවසා ඇත.
දමයන්ති රේණුකා ප්රනාන්දු
