තීක්ෂණ ඊළඟට මොනවා කරයිද?

රියැලිටි වැඩසටහන්වලින් දවසින් දවස දක්‍ෂයන් බිහිවෙනවා. තීක්ෂණ අනුරාධත් හඬ අවදි කළේ එක්තරා රියැලිටි තරගයක් හරහා තමයි. හැබැයි එදා මෙන් අදටත් ඔහුගේ හඬට ඔබ ආදරය කරනවා.
තීක්ෂණගෙන් අලුත් ගීතයක් අහන්න රසිකයන්ට අවස්ථාවක් දෙන්න සූදානමක් නැද්ද තාම?
2020 මුල ඒ සුමිහිරි හඬ අසන්නට මගේ ආදර රසික රසිකාවියන්ට ඉඩකඩ සූදානම් වෙන මොහොතක තමයි ඔබ මට මේ කතා කරන්නේ. සෑහෙන කාලයකින් මට ගීතයක් නිර්මාණය කරන්න බැරි වුණා. කාලයත් ගෙවිල ගියා. දැන් ඒ සොඳුරුම කාලය උදාවෙලා.
රංග ශිල්පීන් ගායන ක්‍ෂේත්‍රයට පිවිසෙන වකවානුවක ගායන ක්‍ෂේත්‍රයේ ඔබ නිහඬ වී සිටීම අඩුවක් නේද?
මගේ හඬට කවුරුත් ආදරය කරනවා. මම මගේ රසික රසිකාවියන්ට අඩුවක් කරන්නේ නැහැ. ඔවුන් නිසා තමයි මම අද මේ තරම් දුර ගමනක් ඇවිත් තියෙන්නේ. ඉතින් මට ඕනෑ කරන්නේ එකම රාමුවක කොටු නොවී විවිධ නිර්මාණ කරන්න. මම නිහඬ වෙලා නැහැ. ප්‍රසංග වේදිකාවේ මම සින්දු තවමත් කියනවා.
ඔබ කාලයක් එක දිගට ප්‍රසංගවල හඬ අවදි කළා. ඒත් එහෙම දැන් දැකගන්නට නැහැ?
ඔව්. ඒක ඇත්ත. මම ආපු කාලෙ මට හැම ප්‍රසංගයකින්ම ආරාධනා කළා. ඉතින් මගේ තිබුණ ආසාව වැඩිකමටත් වැඩි අවබෝධයක් නොතිබුණු නිසාත් හැම ප්‍රසංගයම භාරගෙන සම්බන්ධ වුණා. ඒත් මම කාලයත් එක්ක තීරණය කළ ප්‍රසංග කිහිපයක් තෝරාගෙන සම්බන්ධ වෙන්න. මුල් කාලයේ දවසට ප්‍රසංග හයකට විතර සම්බන්ධ වුණා. සමහර අවස්ථාවලට යෑමට නොහැකි වුණාම බැනුම් අහන්නත් සිද්ධවෙනවා. එහෙම එකදිගටම යන්න ගියාම තෙහෙට්ටුයි. එයට අමතරව ජීවිත අනතුරුවලට පවා මුහුණපාන්න සිද්ධ වෙනවා. නිදිවරාගෙන වැඩවලට ගියාම.
ඒ කියන්නෙ ඔබ දැන් සැලසුම්කාරීව වැඩ කරන්නේ?
ඔව්. ළඟ ප්‍රසංගවලට නම් යන්න පුළුවන්. දවසට ප්‍රසංග හතරකට විතර යනවා. එහෙම බැරි නම් එක ප්‍රසංගයකට හරි සම්බන්ධ වෙලා එනවා.
තවත් කරුණක් තමයි ගොඩ දෙනෙක් ජනප්‍රිය වෙද්දි තමන්ගේ නමින් සංගීත කණ්ඩායමක් නිර්මාණය කරනවා. ඒත් ඔබේ ආරම්භයේදීම වෙනසක් අපි දැක්කා?
මගේ ඔක්ටේල් සංගීත කණ්ඩායම ආරම්භ කළේ මම උසස් අධ්‍යාපනය කරන කාලේ. මගේ මිතුරන් කිහිපදෙනකු සම්බන්ධ කරගෙන දැන් මගේ සංගීත කණ්ඩායමේ හය දෙනෙක් දක්වා වර්ධනය වෙලා වැඩකටයුතු කරනවා. හැබැයි ගොඩ දෙනෙක් දන්නේ නැහැ ඔක්ටේල් සංගීත කණ්ඩායම මගේ කියලා. මම මගේ නම සඳහන් කරලා ජනප්‍රිය වීමට උත්සාහ කළේ නැහැ.
දවසින් දවස රියැලිටි හරහා ගායන ක්‍ෂේත්‍රයට හඬවල් එකතු වෙනවා. ඒ හඬවල් එක්ක තීක්ෂණගේ ගීතවලට තිබෙන ඉල්ලුම අඩු වෙනවාද?
මගේ නිර්මාණවලට වර්තමානයේ බිහිවන අයගේ ගීතවලින් කිසිම ප්‍රශ්නයක්, බලපෑමක්, ප්‍රතිචාරයක් අඩු වෙලා නැති බව මම දන්නවා. මට කලින් මේ ක්‍ෂේත්‍රයයේ විශිෂ්ට නිර්මාණ යුග බිහි වුණා. අජිත් මුතුකුමාරණ, චාමර වීරසිංහ වැනි අයට කලිනුත් තවත් විශිෂ්ට නිර්මාණකරුවන්ගේ නිර්මාණ බිහිවුණා. ඒ හැම ගායන ශිල්පියෙක්ටම රැල්ලක් තිබුණා. හැබැයි ඔවුන් නැහැ කියලා ඒ ඔවුන්ගේ නිර්මාණවලට කිසිම අඩු ප්‍රතිචාරයක් නැහැ. අදටත් අපි හැමෝම රස විඳිනවා. මතු පරපුරක් එන එක මට සතුටක්.
ජීවිත ගමනත් එක්ක පෙර කුසල් එනවා වාගේ තීක්ෂණගේ සංගීත දිවිය පිටුපස නැතුවම බැරි දෙයක් තමයි බටනළාව?
බටනළාව කියන්නේ මගේ ජීවිතයේ තවත් කොටසක්. මම යන්නේ කොතැනද ඒ හැම තැනම මගේ අත ළඟ බටනළාව. ඒ තරමට එය මට නැතුව බැහැ. මම ටෙලිනාට්‍යයක හෝ චිත්‍රපටයකට පසුබිම් ගායනා වැඩ කළත් අනිවාර්යයෙන් ඒ තුළ බටනළා ශ්‍රවණය වැඩිපුර අසන්නට ලැබෙනවා. ඒ තරමට මම බටනළාව වාදනය කරන්න කැමැතියි.
ඔබ සංගීත ක්‍ෂේත්‍රයට අමතරව වෙනත් මාධ්‍ය කටයුත්තකට සම්බන්ධ වෙලා වැඩ කරනවා. එය ගැන සඳහන් කළොත්?
මගේ යූ-ටියුබ් චැනල් එක ගැන වෙන්න ඇති ඔබ ඔය අසන්නේ. මම එය කරන්නන් වාලේ කරන දෙයක් නෙවේ. ගොඩ දෙනෙක් උත්සාහ කරන්නේ ඒ වැනි මාධ්‍ය ජාලයකින් තව කෙනෙක් අපහාසයට ලක්වන විදියට ගොසිප් මැවීමයි. එය ජනප්‍රිය කරගැනීමටයි. මගේ යූ-ටියුබ් මාධ්‍ය ජාලය නරඹන හැමදෙනාටම දැනුම වගේම සමාජයට වැදගත් දෙයක් තමයි කතා කරන්නේ. හරි දෙයක් හරි විදියට පාවිච්චි කළාම ඒ ගැන අසන්නට ලැබෙන්නේ හොඳ දෙයක් තමයි.
ඔබ දැන් එක් දරු පියෙක්. කලාවට වගේම දරුවන්ටත් ආදරය කරනවා. තවත් දරුවෙක් හදන්න බලාපොරොත්තුවක් නැද්ද?
දරුවෝ මට සම්පතක්. අනිවාර්යයෙන්ම මම දරුවන් තුන්දෙනෙක් හරි හදනවා.
අද ගොඩ දෙනෙක් මවුපියන්ට කියනවා එක දරුව හදාගත්තේත් බොහොම අමාරුවෙන් කියලා. එහෙම හිතන අය ආත්මාර්ථකාමී අය. ඒ දරුවා අවසානයේ ලොකු වුණාට දෙන්නෙක් බලාගන්න ඕනෑ බව හිතුවාද. එය අසාධාරණයි. මළ ගෙයක් වුණාම ඒ තනි දරුවා හැම දේම කළ යුතුයි. තවත් දරුවන් හිටියොත් සහනයක්. මමත් මගේ මවුපියන්ට අසනීප වුණු වෙලාවේ ඔය ප්‍රශ්නයට මුහුණ පෑවා. මගේ අක්කා හිටියේ නැතිනම් මම අසරණ වෙනවා. ඒ අසරණකම මම මගේ දරුවන්ට දෙන්නේ නැහැ.
වසන්ත විතාරණගේ