මට කොරෝනා හැදිලා නැහැ…
මාවත් ගොඩදාලා උඹත් ගොඩ පලයන්…
කවුරුත් දන්න කියන රංගන ශිල්පියෙක් තමයි චමීර ලියනගේ කියන්නේ. චමිරත් දැන් තාත්තා කෙනෙක් වෙලා කියලා අපට ආරංචි වුණා. කාටත් හොරා චමීරත් විවාහ වුණාද, එහෙමත් නැත්නම්..? මේ අපට ආරංචි වුණු කතාවේ ඇත්ත, නැත්ත ඔහුගෙන්ම දැනගෙන ඔබට කියන්නට හිතුවා.
චමීර දැන් තාත්තා කෙනෙක් වෙලා කියලා ආරංචියි. ඇත්තද මේ කතාව?
ඔව්.., ඔව්.., තව ටික දවසකින් හැමෝටම මගේ පියපදවිය ගැන දැකබලා ගන්නට පුළුවන් වෙයි.
අපි කැමැති ඔබ වටිනාකමක් එකතු කරමින් කියන රසබර කතා පෙළහර ගැන සවිස්තරාත්මකව දැනගන්න?
ළඟදීම ‘සිරස’ රූපවාහානී නාලිකාවේ විකාශය වීමට තිබෙන ‘දාම්’ ටෙලි තුළින් තමයි මම තාත්තා කෙනෙක් වුණේ. මම තාත්තා කෙනෙක්ගේ චරිතයක් රඟපාන පළමු වතාව තමයි. ඉතින් මගේ ආදරණීය ප්රේක්ෂකයන්ට වෙනස් අත්දැකීමක්. මේ ටෙලිනාට්යයේ කතාව වගේම එහි රඟපාන සියලුම චරිත තුළින් අපූරු සෙල්ලමක් සිදුවෙයි.
ඔබව මේ විදියට විවිධ චරිත හරහා හීරෝ කෙනෙක් කිරීමට දනුෂ්ක රත්නායක ගන්නා උත්සාහය ගැන පැවැසුවොත්?
ඇත්තටම ඔහු ගැන කතා කළ යුතුමයි. ඔහු මගේ සහෝදරයෙක් වගේ. ඔහුට මගේ ලොකු වටිනාකමක් දැනුණා. තවත් එක්තරා නිර්මාණවේදියෙක්. ඔහු නිරන්තරයෙන්ම කියන්නේ උඹ මේක අතහරින්න එපා, ඉදිරියටම යමන් කියලා. දනුෂ්ක අයියා නිර්මාණය කළ වෙස්, හේලි, දාම් ටෙලිනාට්ය සියල්ලගේම සුවිශේෂී චරිත මම රඟපෑවා. ඒ හැම චරිතයක් ගැනම හැමදෙනා අතර කතාබහට ලක්වුණා. ඔහු හැම චරිතයක්ම මට දුන්නේ මම ගැන ලොකු විශ්වාසයක් තියාගෙනයි. ඔහු ඒ හැම අවස්ථාවකදීම කිව්වේ මාවත් ගොඩදාලා උඹත් ගොඩපලයන් කියලා තමයි. ඔහුගේ ඒ ආශීර්වාදය මට ශක්තියක් වුණා කියලා කිවයුතුමයි.
තාත්තා කෙනෙක් නොවුණු ඔබට, ඒ වෙනස්ම අත්දැකීම දැනුණු විදිය ගැන කතාකළොත්?
‘දාම්’ ටෙලිනාට්යය මට වෙනස් අත්දැකීමක් කියලා කෙටියෙන් කිවයුතුයි. මම වගේ තාත්තලා මේ සමාජයේ ඕනෑ තරම් ඇති. ඒ හැම තාත්තෙක්ටම දැනෙයි එතකොට. මට අනෙකුත් නිර්මාණවල වගේම ‘දාම්’ ටෙලිනාට්යයේ සියලුම දෙනාගෙන්ම ලොකු සහායක් ලැබුණා පියපදවිය සාර්ථක කරගැනීමට.
ඔබ කොපමණ විශේෂ චරිත නිරූපණය කළත් කිරුළ ඔබට තවම අතවනනවා නේද?
සම්මානයක් ලැබෙනවා කියන්නේ කලා ශිල්පියෙක් තවත් පියවරකට ඔසවා තබනවා වගේ වැඩක්. එය වෙනම ප්රාණ වායුවක්. ඉතින් සුදුසු කාලෙට සුදුස්සාට ඒ දේ ලැබෙයි. එතකම් ඉතින් මෙහෙම ඉන්නවා. බලමු ඉතින් ඉදිරියේදී ඒ සියල්ලටම පිළිතුරක් ලැබෙයි.
ඕනෑම රංගන ශිල්පියෙක්ගේ එකම සිහිනය සිනමා තරුවක් වීමට. ඔබට සිනමාවේ ආරාධනා නැතිද තවම?
තවම එහෙම සුවිශේෂී චරිතයකට ආරාධනාවක් ලැබුණේ නැහැ. ඒ තැනට යන්න තමයි මමත් මේ පියවරෙන් පියවරට පාර හදාගෙන එන්නේ. මගෙත් එකම සිහිනයක් තමයි ඒ.
ඒ කරුණු කාරණා සියල්ල පැත්තකින් තියලා කියමුකො බලන්න ඔබත් නිරෝධායනය වෙනවා කියලා ආරංචියි. ඇත්තද මේ කතාව?
ඔය කතාව බොරුවක්. මම නිරෝධායනය වුණේ නැහැ. එහෙම වෙනවානම් මම සඟවන්නෙත් නැහැ. වෙන නිර්මාණයක වැඩකරපු කෙනෙක් අපිව හමුවීමට ආවා. ඒ නිසා දවස් දෙකක් විතර ගෙදරට වෙලා හිටියා. ඇයටත් කිසිම ප්රශ්නයක් නැති නිසා අපි දැන් වැඩ කරගෙන යනවා. රටේ දැන් තිබෙන තත්ත්වයත් එක්ක කොරෝනා කියන දේ අමුතු දෙයක් නෙවේ. ආරක්ෂාකාරීව වැඩකරගෙන යනවා.
වසන්ත විතාරණගේ
