ඇයගේ රංගන කුසලතාව අපට මෙලෙස අකුරු කිරීමට නොහැකි වුණත් දුමීගේ ආදරණීය ප්රේක්ෂකයන් ඇයව වැලඳගෙන හමාරයි. අතේ ඇඟිලි ගානටවත් ඇය නිර්මාණවලට සම්බන්ධ නොවී ඇති අතර, මේ දිනවල ‘පද්මලතා’ චරිතය හරහා විශිෂ්ට රංගනයක නිරත වෙමින් ඔබට සමීප වී සිටිනවා. ඉතින් ඇය ගැන බොහෝ දෙනා කතාබහ කරන මොහොතක ‘හාට්’ අපිත් හිතුවා ඇය සමග පිළිසඳරක යෙදෙන්න. මේ, දුමී වන්නිආරච්චි සමග අප ගතකළ මොහොතක්.Sri Lanka Latest News
මේ දවස්වල නම් දුමී ගැන ගොඩක් දෙනෙක් කතාබහ කරනවා?
ඇත්තටම මමත් ඒ ගැන ගොඩක් සතුටු වෙනවා.
ඔබ නිරූපණය කරන ‘පද්මලතා’ ගැන මොකද හිතෙන්නේ?
ඒ ගැන කතාකරන්න ගියොත් ගොඩක් දේවල් තියෙනවා. මේ දිනවල ජාතික රූපවාහිනියේ විකාශය වන ලලිත් රෝහිත අධ්යක්ෂණය කරන ‘දොරකඩ දෙවොල’ ටෙලිනාට්යයේ මම රඟපාන පද්මලතා කියන්නේ නැටුමට දස්කම් දක්වන කාන්තාවක්. පාරක බැහැලා යන්න බැරි තරමට ප්රේක්ෂක ආදරය ඊට ලැබෙනවා. සමහරුන්ගෙන් බැණුම් පවා අහන්න වෙනවා. තවත් සමහරු පද්මලතා තේරුම් අරගෙන අනුකම්පා කරනවා. ඒ කොහොම වුණත් ඉතා ආදරණීය ප්රේක්ෂක ආදරයක් ලැබෙනවා. පද්මලතා චරිතයට හොඳ සාධාරණයක් කළා කියලා මට මේ ලැබෙන ප්රතිචාර එක්ක හිතෙනවා. ගොඩ දෙනෙක් ‘දොරකඩ දෙවොල’ ටෙලිනාට්යය වැලඳගෙන තියෙනවා. මේ ළඟදි මට ෆේස්බුක් එක හරහා මැසේජ් එකක් ආවා රසිකාවකගෙන්. ඇය විඳපු ජීවිතයම පද්මලතා චරිතය තුළින් දකිනවා කියලා. පද්මලතා වගේ විඳවපු ගැහැනු තව කොයි තරම් ඇද්ද කියලා මටම හිතුණා.
ජනප්රිය රංගන ශිල්පී දසුන්ගෙන් කාපු පාර කොහොමද?
අම්මෝ ඒ පාර නම් කෑව තරු පේන්නම. දසුන් අයියා ගහපු කනේ පාර නම් සැරටම වැදුණා. ඒ වැදුණු පාරට මට වුණු දේ හිතාගන්නත් බැරි වුණා. අඩු තරමේ මට ඩයලොග් එකවත් කියාගන්න මතකයට ආවේ නැහැ. ඒ විතරක් නෙවෙයි උමා අක්කගෙනුත් හොඳට කෑවා. ඉතින් ඒ වගේ ප්රශ්න රැසකට මුහුණ දෙමින් මට ඒ චරිතය තුළ ජීවත් වෙන්න වුණා.
ඔබ හැදුණු පරිසරයත් එක්ක ඔබ තුළින්ම පද්මලතා බිහිවුණු එක පුදුමයක් වෙන්න ඇති?
ඇත්තටම ඔව්. මට පද්මලතා චරිතය ලොකු අභියෝගයක් වුණා. පද්මලතා චරිතය මගේ වයසට වඩා වැඩිමහලුයි. ඒ වගේම ඇය හැදුණු වැඩුණු පරිසරය, වචන උච්චාරණය මේ හැම දේම බලනකොට මට වඩා ලොකු දුරක් තියෙනවා. ඉතින් මම ඒ වගේ චරිතයකට හාත්පසින්ම වෙනස් වෙන්න වුණා. මා තුළින්ම පද්මලතා නිර්මාණය වීම ගැන ලොකු අභියෝගයක්. හරියටම කිව්වොත් ඒ පරිසරයට, පොළොවට ගැළපෙන විදියේ ගැහැනියක් ලෙසට හැඩගැහෙන්න වුණා. හික්මීමක් ඇතිව පද්මලතා චරිතයට සාධාරණයක් කළා.
රඟපාන්න වගේම හොඳට නටන්නත් පුළුවන් නේද දුමීට?
මහාචාර්ය මුදියන්සේ දිසානායක ගුරු පියාණන් යටතේ මම නැටුම් කලාව ඉගෙන ගත්තා. ඉතින් මට හොඳට නටන්න පුළුවන් නිසා පද්මලතා චරිතයට තවත් සාධාරණයක් කරන්න ලොකු පහසුවක් වුණා. ඒ වගේම ‘දොරකඩ දෙවොල’ කණ්ඩායමෙන් ලැබුණු සහායත් පද්මලතාට ශක්තියක් වුණා කියලා මට කියන්න පුළුවන්.
ඔබ ඒ හෙළපු කඳුළු ස්වභාවික කඳුළුද?
ගොඩක් දුරට මට ස්වභාවික කඳුළු ගන්න පුළුවන් අවස්ථාව අනුව. එහෙම අඬපු අවස්ථා තියෙනවා. අනෙකුත් ශිල්පීන්ගෙන් ලැබෙන සහායත් එක්ක මට ඒ සිටුවේෂන් එකට හැඩගැහෙන්න පුළුවන්. හැබැයි ඉතින් ටේක් දෙක තුන ගන්නකොට නම් මට ඒ දේ කරන්න අපහසු වෙනවා.
චරිතයට හැඩගැහෙන්න කලින් නවකතාව කියෙව්වද දුමී?
ෂූටින් අතරතුර තරංගා අක්කගේ දුව නවල් එක ගෙනත් මම බැලුවා. හැබැයි නවල් එකම නෙවෙයි තියෙන්නේ. නවල් එකේ පද්මලතා තමයි ගෙනාවේ. හැබැයි මානුෂික වශයෙන් අවස්ථාවලට පද්මලතා චරිතයට වෙනස් වෙන්න හේතු තිබුණා. නවකතාවේ පද්මලතා කළු චරිතයක් වෙන්න පුළුවන්. හැබැයි නිර්මාණයක් හැටියට පද්මලතා අළු චරිතයක් ගෙනාවේ. ඔය විදියට පොඩි පොඩි වෙනස්කම් කිහිපයක් තියෙනවා.
දුමීගේ මීළඟ අලුත් පෙරළිය ගැන කතා කළොත්?
තවම එහෙම අලුත් පෙරළියක් නැහැ. ‘දොරකඩ දෙවොල’ රූගත කිරීම් ඉවර වෙනකම් මම පද්මලතා තුළ ජීවත් වෙනවා. නිර්මාණවලින් මට ආරාධනා ලැබුණා. ඒත් තවම භාරගත්තේ නැහැ. මේ වැඩකටයුතු අවසන් වෙනකම් ඉන්න තමයි බලාපොරොත්තුව.
වසන්ත විතාරණගේ
