කොරෝනාවට බය නැති අපේ රැහේ එවුන්

මෙදා සැරේ සිංහල හින්දු අලුත් අවුරුද්ද උදා වුණේ වෙන කවදාටවත් වඩා වෙනස් වටපිටාවක. ඒ කොවිඞ් 19 වසංගතය හේතුවෙන් රටේ ඇති වෙලා තියෙන තත්ත්වය හින්දා. මෙදා සැරේ අලුත් අවුරුද්දට අපිට වෙනදා වගේ එළිපෙහෙළියට බහින්න අවස්ථාව ලැබුණේ නැහැ. පවුලේ සමීපතමයන් එක්ක අපි ගේ ඇතුළේ ඉඳන් තමයි අලුත් අවුරුද්ද සැමරුවේ.

වෙනදා වගේ මේ සැරේ රට වටේ අවුරුදු උත්සව තිබුණේ නැහැ. වෙන අවුරුදු කාල වලදී ගොඩක් කාර්යබහුල වෙන කලාකරුවොත් මේ අවුරුද්ද සැමරුවේ ගෙදර ඉඳන්. වෙනදා නම් අලුත් අවුරුද්ද උදා වෙද්දිම අපිට මුලින්ම ඇහෙන සින්දුවක් තියෙනවා. “මේ අවුරුදු කාලේ සිනහ වෙයන් රාලේ තෙල් ඉහිරුණු කැවුම් ගෙඩිය වාගේ.” කියන සින්දුව. ඒ අලුත් අවුරුදු ගීතය ගායනා කරන්නේ රංවල බලකාය. වෙන අවුරුදු වගේ මේ අවුරුද්දේ හිතේ හැටියට හිනා වෙන්න බැරි හින්දා ඒ සින්දුව මේ අවුරුද්දේ නිතර ඇහුණේ නැහැ.

හැබැයි එහෙමයි කියලා සහන් රංවල ප්‍රමුඛ රංවල බලකාය මේ අවුරුද්දටත් නිකම්ම හිටියේ නැහැ. ඔවුන් මේ අලුත් අවුරුද්ද වෙනුවෙන් ගීතයක් නිර්මාණය කළා. ඒ ගීතය නම් කරලා තිබුණේ “තුන් හෙළ මංගල්ලය” නමින්. කොහොම වුණත් රංවල බලකාය හැමදාම අලුත් අවුරුද්දට කල් තියාම සූදානම් වෙන හින්දා මේ ගීතය සඳහා වීඩියෝවක නිර්මාණය කරන්නත් ඔවුන්ට හැකියාව ලැබිලා තියෙනවා.

නුවන් කුමාර කටුගම්පොළ විසින් රචනා කළ මෙම ගීතය රංවල බලකායේ ප්‍රදීප් මුතුකුඩආරච්චි විසින් තමයි තනු නිර්මාණය කර සංගීතවත් කරලා තියෙන්නේ. ඒ වගේම මේ ගීතයේ ගායනාවෙත් විශේෂත්වයක් තියෙනවා. සහන් රන්වල, ඉසුරු ජයරත්න සහ ජනනාත් වරකගොඩ තමයි මේ ගීතය ගායනා කරන්නේ. මේ තුන් දෙනාම කලා පවුල්වලින් පැවතගෙන අය. ඒ අයගේ කලා උරුමය ඊලඟ පරපුරට ගෙනියන්න පුළුවන් වෙන විදියට තමයි මේ ගීතය නිර්මාණය වෙලා තියෙන්නේ.

රංවල බලකාය ඒ විදියට තම උරුමය ජාතියේ උරුමය සමඟින් අනාගතයට ගෙනියද්දී, නවක ගායක ගායිකාවන් පිරිසක් විසින් ගායනා කරන “සෞභාග්‍යයේ සංග්‍රාමය” නැමැති ගීතයත් පසුගිය දින වල වැඩි දෙනාගේ අවධානයට ලක් වුණා. ඉෂාරා කල්පනී, අශාන් නේරංග, සඳරු පරණහේවා සහ සසිත සාලිඳු තමයි ඒ ගීතය ගායනා කරන්නේ. සහන් දහනායක විසින් රචනා කර ඇති ඒ ගීතයේ සංගීතය නිර්මාණය කර තිබෙන්නේ විශාරද සසිත සලිඳු විසින්. සිංහල හින්දු අලුත් අවුරුද්ද සමඟින් රටේ සෞභාග්‍යය නැවත ගොඩ නගමු යන්න තමයි ඒ ගීතයේ තේමාව. ඒ වගේම රජය විසින් ආරම්භ කර ඇති සෞභාග්‍ය වගා සංග්‍රාමයේ තේමාවත් මේ ගීතය හරහා ජනතාවට සමීප කරන්න කටයුතු කරලා තියෙනවා.

කොවිඞ් 19 වසංගතය ලෝකය පුරා දරුණු ලෙස පැතිරයාමත් සමඟ ඉදිරියේදී ආහාර අර්බුධයකට මුහුණ දීමට සිද්ධ වේවි කියන බය අපි හැමෝටම ඇති වුණා. ඒ වෙනුවෙන් තම තමන්ගේ ගෙවත්තේ හැකි පමණින් වගා කරන්න බොහෝ දෙනෙක් උනන්දු වුණා. කලාකරුවන්, දේශපාලනඥයන්, ක්‍රීඩකයන් ඇතුළු බොහෝ දෙනෙක් ඒ සඳහා කැප වුණා. තමන් ඒ සඳහා කටයුතු කරන ආකාරය ජනතාවට පෙන්වන්නත් ඔවුන් කටයුතු කළා. ඒ ජනප්‍රිය පුද්ගලයන් තම ගෙවත්තේ වගා කටයුතුවල නිරත වන ආකාරය ඇතුළත් ඡායාරූප රැසක් මේ ගීතය අවසානයේ දැක ගන්න පුළුවන්.

මේ අතරේ කොරෝනා වසංගතය හේතුවෙන් නිවෙස්වලට කොටු වී සිටින ජනතාවගේ මානසික සෞඛ්‍ය ඉහළ නැංවීම සඳහා මහල් නිවාස අසල විශේෂ සංගීත සංදර්ශන පෙළක් පවත්වන්න ආරක්ෂක අංශ පසුගිය දින කිහිපය පුරාම කටයුතු කළා. තම නිවාස වලට වී එම ප්‍රසංග නරඹන ජනතාව ප්‍රීතියෙන් විනෝද වන ආකාරයත් දක්නට ලැබුණා. ත්‍රිවිධ හමුදාව, පොලිසිය ඇතුළු ආරක්ෂක අංශ විසින් සංවිධාන කළ එම ප්‍රසංග මාලාවට ජනප්‍රිය කලාකරුවන් කිහිප දෙනකුත් සහභාගි වීම විශේෂත්වයක්. භාතිය, සන්තුෂ් දෙපළ සහ ඉරාජ් වීරරත්න ඒ අතරේ ඉදිරියේම හිටියා.

මේ අතරේ කොරෝනා හමුවේ ඇතිවූ ව්‍යාකූලත්වය හමුවේ දිවා රෑ නොබලා වෙහෙස මහන්සි වෙන නිලධාරින් රැසක් සිටින ජනාධිපති කාර්යාලයේ මහජන සම්බන්ධතා ඒකකයට හදිසියේ භාතිය, සන්තුෂ් දෙපළ ගොස් සිටින ආකාරය සමාජ මාධ්‍ය ඔස්සේ දැක ගන්නට ලැබුණා.
තම පවුලෙන් ඈත්ව දැඩි වෙහෙස මහන්සියෙන් වැඩ කටයුතු කරන නිලධාරීන්ගේ ආතතිය නැති කිරීම සඳහා ඔවුන් සමඟ එකතුව ගීත ගායනා කිරීමටත් භාතිය, සන්තුෂ් කටයුතු කර තිබුණා.
චන්දන පොන්නම්පෙරුම