එදා රෝසි අද ජූරි

මේ වසරේ ලෝක විවාහක රූ රැජින කිරුළ ශ්‍රී ලංකාවට හිමි වුණු බව මේ වෙද්දි හැමෝම දන්නවා. වෙනදට ඉන්දියාවේ එහෙම නැත්නම් වෙනිසියුලාවේ ලෝක රූ රැජිනියෝ ගැන කතා කරන අපේ අය මේ වෙද්දී අපේ රටේ රූ රැජිනියක් ගැන කතා කරනවා. මේ කිරුළ ශ්‍රී ලංකාවට හිමි වෙන්නේ වසර 35කට පසුව නිසා ඒ අවධානය තවත් වැඩි වෙලා තියෙනවා.

2020 ලෝක විවාහක රූ රැජින තරගාවලියේ අවසන් තරගය පසුගිය 07 වැනිදා පැවැත්වුණේ ඇමෙරිකාවේ ලස් වේගාස් නගරයේදී. ඒ සඳහා රටවල් 51ක් නියෝජනය කරන තරගකාරියන් සහභාගි වෙලා හිටියා. ඒ සියලුම තරගකාරියන් පරාජය කරමින් ජය ගන්න සමත් වුණේ අපේ කැරොලයින් ජූරි. ඒ තරගාවලියේ දෙවැනි තැන අයර්ලන්ත තරගකාරිනියටත්, තෙවැනි තැන ඇමෙරිකාවේ වර්ජින් අයිලන්ඞ්හි තරගකාරිනියටත් හිමි වුණා.

ලෝක රූ රැජින කිරුළ මීට පෙර එක් අවස්ථාවකදී ශ්‍රී ලංකාවට හිමිවෙලා තියෙනවා. මීට වසර 35කට පෙර එනම් 1984 වසරේදී පැවැති මුල්ම ලෝක රූ රැජින තරගාවලියේ ජයග්‍රහණය හිමි කර ගනිමින් රෝසි සේනානායක මහත්මිය තමයි ඒ ගෞරවය ශ්‍රී ලංකාවට හිමි කර දීල තියෙන්නේ.
වත්තල මහබාගේ ප්‍රදේශයේ උපන් 27 හැවිරිදි කැරොලයින් ජූරි මේ වෙද්දි එක් දරු මවක්. ඇයගේ සැමියා නිශාන්ත දීපාල්. කඳාන සෙබස්තියන් බාලිකා විද්‍යාලයයෙන් තමයි ඇය අධ්‍යාපනය හදාරල තියෙන්නේ. පාසල් අධ්‍යාපනය හමාර වීමෙන් පසු ඩුබායි නගරයේ රැකියාවක නිරත වී ඉන්න අතරෙදි තමයි කැරොලයින් සහ නිශාන්ත මුණ ගැහිලා තියෙන්නේ. ඔවුන් දෙදෙනා සහ සිඟිති දියණිය මේ වෙද්දි ජීවත් වෙන්නෙත් ඩුබායි නගරයේමයි.

තම දියණියත් රැක බලා ගනිමින් රැකියාවකද නිරත වූ කැරොලයින්ට ශ්‍රී ලංකාවේ පැවැත්වුණු විවාහක රූ රැජින තරගාවලිය ගැන තොරතුරු දැන ගන්න ලැබෙනවා. ඇයට ඒ සඳහා ඉදිරිපත් වීමේ ආසාවක් ඇති වෙනවා. ඒ බව තම ස්වාමියාට පැවසීමෙන් පස්සේ ඔහුගේ ආශිර්වාදය මැද්දේ ඒ තරගය සඳහා ඇය ශ්‍රී ලංකාවට පැමිණෙනවා. ශ්‍රී ලංකාවේ විවාහක රූ රැජින කිරුළ කැරොලයින්ට හිමි වීමෙන් පස්සේ තමයි ඇය ලෝක තරගාවලිය සඳහා සිහින දැකීම අරඹන්නේ.
ඒ සඳහා පුහුණු වීම සඳහා තම ස්වාමියා සහ දියණිය ඩුබායි නුවර තනි කරමින් ඇය කිහිප වරක් ශ්‍රී ලංකාවටත් ඇවිත් තියෙනවා. ඇයගේ සැමියාගේ මව තමයි ඒ දිනවල දියණිය බලා ගැනීමේ වගකීම ඉටු කරලා තියෙන්නේ. ඒ සියලු කැප කිරීම් සහ පුහුණුවීම්වල ප්‍රතිඵල තමයි දෙසැම්බර් 07 වැනිදා මුළු ලෝකයම දැක ගත්තේ. මේ වෙද්දි කැරොලයින් ජූරි නාමය ලෝකය පුරා ප්‍රසිද්ධයි. ඒ හරහා ඇය මේ පුංචි ශ්‍රී ලංකාවටත් ගෞරවයක් අත් කරලා දීල තියෙනවා.
මීට පෙර මේ කිරුළ ශ්‍රී ලංකා නාමය ඉදිරියේ පැලඳ වූ රෝසි සේනානායක මහත්මිය, කොළඹ පුරපතිනිය විදියට තමයි මේ වෙද්දි කටයුතු කරන්නේ. කැරොලයින්ගේ ජයග්‍රහණය රෝසි සේනානායක මහත්මියට මොන වගේ දැනෙනවා ඇද්ද? මේ ගැන දැන ගන්න අපි එතුමියට කතා කළා. “නැවත වරක් මේ ජයග්‍රහණය ශ්‍රී ලංකාවට ගේන්න පුළුවන් වුණු එක ගැන මට හරිම සතුටුයි. මේ කිරුළ මීට පෙර ලංකාවට ලැබෙයි කියලා මම කිහිප වරක්ම විශ්වාස කෙරුවා. ඒත් ඒ අවස්ථාව ලැබුණේ නැහැ. අවුරුදු 35කට පස්සේ හරි ඒ ජයග්‍රහණය ලබා ගන්න පුළුවන් වීම ගැන මට ගොඩක් සතුටුයි. මගේ මුළු හදවතින්ම මම කැරොලයින්ට සුබ පතනවා” රෝසි සේනානායක මහත්මිය ඒ ප්‍රශ්නෙට උත්තර දුන්නේ එහෙමයි.

අවුරුදු 35කට කලින් ඒ ජයග්‍රහණය ලබපු අවස්ථාව මොන වගේ වෙන්න ඇතිද? අපි ඒ ගැනත් රෝසි සේනානායකගෙන් ඇහුවා.
“දැන් අවුරුදු 35කට කලින් වුණු දෙයක්නේ. මට ඒක හරියටම මතක නැහැ දැන්. ඒත් ඒක ජීවිතේ ලබන්න පුළුවන් ඉහළම සතුටක් ලබපු අවස්ථාවක්. මං හිතන්නේ ඒ වගේ සතුටක් මම ඊට පස්සේ ලබලා නැහැ. ඊට වැඩිය දෙයක් ඇත්තටම මට දැන් මතක නැහැ. මං හිතන්නේ කැරොලයින්ටත් ඒ සතුට ඒ වගේම දැනෙන්න ඇති” එතුමිය පිළිතුරු දුන්නේ එහෙමයි.
කොහොම වුණත් පහුගිය සතිය පුරාවටම ලංකාවේ සමාජ ජාලා භාවිත කරන වැඩි දෙනෙක්ගේ ප්‍රධාන මාතෘකාව වෙලා තිබුණෙත් කැරොලයින්ගේ මේ ජයග්‍රහණය තමයි. ඒ අතරේ තිබුණු එක අදහසකටත් මෙතැන ඉඩක් දෙන්න හිතුණේ එහි තිබුණු අපූරු බව හින්දමයි. “ලංකාවෙන් විවාහක රූ රැජිනියෝ දෙන්නෙක් බිහි වුණාට, තාම එකම අවිවාහක රූ රැජිනියක්වත් බිහි වෙලා නැහැ. ඒකට හේතුව ලංකාවේ ස්වාමි පුරුෂයෝ තම බිරිඳට රැජිනියකට වගේ සලකන එක.” කැරොලයින්ට වගේම ඒ කතාව හැමෝටම ගැළපෙනවද කියලා අහන්න ඕනෑ ලංකාවේ බිරින්දෑවරුන්ගෙන්ම තමයි.
චන්දන පොන්නම්පෙරුම