වරෙක ඇය දරුවන්ට නාට්ය හා රංග කලාව උගන්වන ආදරණීය ගුරුවරියකි. තවත් වරෙක ඇය වේදිකාව සලිත කරවන, ටෙලි තිරය ආලෝකවත් කරන අතිදක්ෂ රංගනවේදිනියකි. හර්ෂිකා රත්නායක යනු වර්තමාන කලා ක්ෂේත්රය තුළ දැකිය හැකි දුර්ලභ ගණයේ කලාකාරිනියකි. රංගනය කියන්නේ හුදු ජනප්රියත්වය පසුපස හඹා යාමක් නොව, එය හැදෑරිය යුතු විෂයයක් බව ප්රායෝගිකවම ඔප්පු කරන ඇය සමඟ ‘හාට්’ අපි කළ හෘදයාංගම කතාබහයි මේ.Sri Lanka Latest News
ඉතින් හර්ෂිකා කොහොමද මේ දවස්වල?
ඇත්තටම මේ දවස්වල කලා කටයුතුත් එක්ක මම ටිකක් කාර්යබහුලයි. මොකද ටෙලි නිර්මාණ කිහිපයක රූගත කිරීම් එකවර ආරම්භ කළා. ඒ වගේම අලුත් නිර්මාණ කිහිපයකටත් රංගනයෙන් සම්බන්ධ වෙලා ඉන්නවා. නමුත් ඒ හැමදේම මම පිළිවෙළකට කළමනාකරණය කරගෙන යනවා. මේ දිනවල විකාශනය වන ‘ආලේ’ සහ ‘රොන් සොයා’ යන ටෙලි නිර්මාණ දෙක හරහා මම ප්රේක්ෂකයන් අතරට එනවා.
හර්ෂිකා නිළියක් වගේම ගුරුවරියක්…
ඔව්. මම නාට්ය හා රංග කලාව පිළිබඳ ගුරුවරියක්. මගේ කාලයෙන් වැඩි හරියක් ගෙවෙන්නේ දරුවෝ එක්ක. ඉතිං මේ භූමිකාවන් දෙකම මම ආදරයෙන් වැලඳගෙන ඉන්නවා.
නිළියක් සහ ගුරුවරියක් කියන්නේ වෙනස්ම භූමිකා දෙකක්?
ඔව්, ඇත්තටම මේවා ක්ෂේත්ර දෙකක්. ඒ නිසාම මට පුළුවන් ඒවා වෙන වෙනම කළමනාකරණය කරගන්න. මේ දෙකම මගේ වෘත්තීන්. ඒ නිසා මම මගේ උපරිම කාලය වෘත්තීය මට්ටමෙන් ඒ සඳහා ලබාදෙනවා. පාසලේදී මම අතිශය වෘත්තීය මට්ටමින් වැඩ කරනවා වගේම, රංගන කටයුතුවලදීත් මම වේලාවට වැඩ කරන කෙනෙක්. මම මේ වෘත්තීන් දෙකටම ගොඩක් ආදරෙයි. ඒ නිසා පාසල් කටයුතු හෝ රංගන කටයුතු මඟහැරෙන්න දෙන්නේ නැතුව සමබරව පවත්වාගෙන යනවා.
ගුරුවරියක් වීම රංගනයට අත්වැලක්ද? නැතිනම් සීමාවක්ද?
කාලය ගැන බැලුවොත් එය රංගනයට යම් සීමාවක්. මොකද මම ගුරුවරියක් නිසා මගේ කාලයෙන් වැඩි කොටසක් දරුවන් සහ පාසල වෙනුවෙන් වෙන් කළ යුතුයි. ඒ නිසා ඇතැම් වැඩකටයුතු බාර නොගන්නා අවස්ථාත් තියෙනවා. නමුත් රංගන ශිල්පිනියක් විදිහට බැලුවොත් මම නිරන්තරයෙන් ඉගෙන ගන්නවා වගේම උගන්වනවා. ඒ අතින් ගුරුවරියක් වීම මගේ රංගන ජීවිතයට විශාල අත්වැලක් සහ පහසුවක් වෙනවා.
නර්තන සහ රංග වින්යාස ශිල්පිනියක් විදිහට පටන් ගත්ත මේ ගමනේ අද ඔබ ඉන්නා නැවතුම ගැන මතක් කළොත්?
මම විශ්වවිද්යාල උපාධියෙන් පස්සේ රංග වින්යාස ශිල්පිනියක් සහ නර්තන ශිල්පිනියක් විදිහට මුලින්ම වැඩ ආරම්භ කළේ. රංගනයට අවතීර්ණ වුණේ වේදිකාවෙන්. වේදිකා නිර්මාණ සඳහා මම විශාල කාලයක් කැප කළා. ටෙලි නිර්මාණ ක්ෂේත්රයටත් පිවිසිලා දැන් අවුරුදු හයක් හතක් විතර වෙනවා.
‘ආලේ’ සහ ‘රොන් සොයා’ නිර්මාණවලට ලැබෙන ප්රේක්ෂක ප්රතිචාර කොහොමද?
ඇත්තටම ඒ ගැන තියෙන්නේ ලොකු සතුටක්. නිර්මාණ දෙකටම හොඳ ප්රතිචාර ලැබෙනවා. විශේෂයෙන් ‘ආලේ’ නාට්යයේ කමෙන්ට්ස් කියවද්දී තේරෙනවා ප්රේක්ෂකයෝ ඒ කතාව කොයිතරම් දුරට තමන්ගේ හදවතට සමීප කරගෙනද කියලා. මවක් දරුවෙක් ගැන තියෙන බලාපොරොත්තුව ඔවුන් හොඳින් තේරුම් අරන් තියෙනවා. මේ ටෙලි නිර්මාණ දෙක නරඹන්නේ ප්රේක්ෂක පන්ති දෙකක්. පාර තොටේදී මුණගැසුණත් බොහෝ දෙනෙක් ආදරෙන් කතා කරනවා. ඇතැම් අය කියනවා ටෙලි නිර්මාණවලට වඩා මම සැබෑ ජීවිතයේදී සුන්දරයි කියලා. ඒ වගේ ආදරණීය ප්රතිචාර ගොඩක් ලැබෙනවා.
ඉදිරි වැඩකටයුතු ගැන මතක් කළොත්?
ඉදිරියේදී මම රංග වින්යාසයෙන් මෙන්ම රංගනයෙන් දායක වුණු ‘සූරිය සුළඟ’ සිනමා පටය තිරගත වීමට නියමිතයි. ඊට අමතරව රංගනයෙන් දායක වුණු ටෙලි නිර්මාණ කිහිපයකුත් ඉදිරියේදී විකාශය වීමට නියමිතයි.
හිමාෂා නෙත්මිණි
