ඉන්දීය සිනමාවේ රිදී රේඛාව

රේඛා ගනේෂන් නම් වූ සුපිරි තාරකාව ගැන යම් හැඳින්වීමක් කළ යුතුද, නැද්ද යන්න ගැන මම නොදනිමි. අලුත් පරපුර රේඛා ගැන යමක් නොදැන සිටියද, 70, 80 සහ 90 දශකවල ඉන්දියානු චිත්‍රපටවලට ඇබ්බැහිව සිටිය ශ්‍රී ලාංකේය ප්‍රේක්‍ෂකයන්ට රේඛා ගනේෂන් ගැන අලුතෙන් යමක් කිවයුතු නැත.

ඒ තරමටම රේඛා උතුරු ඉන්දීය සිනමා වසන්තයට පාට පාට දේදුන්නක් වූවාය. ඍංගාර රසයෙනුත්, අලංකාර නර්තනයෙනුත් රේඛා ඉන්දීය රිදී තිරය දෙවනත් කළාය. මොනාලිසාගේ චිත්‍රය තරමටම ඈ සතු වත කමල හැඟීම්බර විය. ඉන්දීය සිනමාවෙහි රේඛා රජ කළ යුගයේදී එවකට අලුතින්ම සිනමාවට පය තබන තරුණ නළුවන් සමඟ වුවද පෙම් චරිත රඟපාන එක රේඛාට ඒ තරම් ප්‍රශ්නයක් නොවූයේ වයස කිසිසේත්ම ප්‍රකට නොවන ඇගේ රූ සපුව නිසාය.
ප්‍රවීණ ජනප්‍රිය ද්‍රවිඩ නළු ජෙමිනි ගනේෂන්ගේ දූ වන නිසා රේඛාගේ ජානවලින්ම පැමිණි හැකියාවට ඈ තෝතැන්නක් කරගත්තේ දකුණු ඉන්දීය සිනමාව වෙනුවට උතුරු ඉන්දීය සිනමාවයි.

දකුණු ඉන්දීය සිනමාවටද දායකත්වය දෙන්නැයි කියා ජෙමිනි දියණිය රේඛාගෙන් ඉල්ලා සිටියද රේඛා ඔහුගේ ඉල්ලීම ඒතරම් නොතැකුවාය. එයට ප්‍රධානතම හේතුවක් වූයේ ඉන්දීය සුපිරි තරුවක සමඟ රේඛාගේ වූ ආදර සම්බන්ධතාවයි.

බොහොමයක් වූ ජනප්‍රිය තාරකාවන් තහනම් පෙම් හබවල පැටලෙයි. හුදෙක්ම එය සිදුවන්නේ ආකර්ෂණය මතය. නැතිනම් රැල්ලට අනුවය. තවත් සරලව කියනවා නම් ජෝඩු ක්‍රමයට අනුවය.
නමුත් රේඛා සමඟ අමිතාබ්ගේ පෙම් පලහිලව්ව එයට වඩා වෙනස්ය. බොහෝ විට එය හැඟීම්බර විය. එලෙසම ආත්මීය විය. ඒ අපූරු ආලිංගනයේ රස රහස් දැනගත් ඉන්දීය සිනමාකරුවන්ද බොර දියෙහි හරි හරියට මාළු බාන්නට ගත්තේ රේඛා – අමිතාබ් හවුල එක්කොට චිත්‍රපට පෝලිම් ගණන් නිර්මාණය කරමිනි.

නියම භාරත පතිනියක වූ “ජයා බච්චන්” සියල්ල ඉවසා සිටියේ සිය දරු පවුල වෙනුවෙනි. ඉන්දීය කාන්තාවක සතු ගෞරවය රැකගැනීම වෙනුවෙන් ජයා ගෙදර ගිනි පිටතට නොදීමට පරෙස්සම් වූවාය.
බොහෝ විට ප්‍රසිද්ධ පුද්ගලයන් අතර අනියම් සබඳතාවලදී වඩා පරෙස්සම් වන්නේ පිරිමින්ය. ගැහැනිය එය ප්‍රසිද්ධකරලීමට ගන්නා බොළඳ උත්සාහයද පිරිමියා නවතා දමයි. අමිතාබ් සහ රේඛා අතරද එය සිදුවිය. අමිතාබ් තම කුටුම්බය සහ මහත්මා බව රැක ගැනීමට සියල්ල වසං කිරීමට ගත් උත්සාහය ප්‍රබල විය. සියල්ලන් බොහෝ දෑ දැන සිටියද අමිතාබ් ඒ හමුවේ තවුස් දම් පිරුවේය.

කාලයත් සමඟ සියල්ල යටපත් විය. දරුවන් උස්මහත්වන විට අමිතාබ් ලෝකයේ හොඳම තාත්තාගේ චරිතය සිය පවුල තුළ සාර්ථකව රඟ දැක්වූයේය. එපමණක් නොව ඒ උදාරතර පිය උරුමය කීර්තිමත් සීයා කෙනකු දක්වාම විහිද ගියේය. අද 70 පැන්න වැඩිහිටියකු වුවද අමිතාබ් සිය ප්‍රතිරූපයට රේඛාගේ නාමය මුල්කොට ප්‍රසිද්ධියේ හානියක් වීමට මං සැලසුවේ නැත.

එහෙත්,
නොසිතූ ලෙස රේඛා ගනේෂන් සිය පීඩනය පුපුරවා හැරියාය. ඒ පසුගිය ඔක්තෝබර් 10 වැනි දිනට යෙදී තිබූ ඇගේ 65 වැනි උපන් දිනයදාය.
වසර ගණනක් තුළ අමිතාබ් ගැන කිසිවක් ප්‍රසිද්ධියේ නොකී රේඛා තම සිත නිදහස්කර ගැනීම සඳහා ඉතා විවෘතව තම හැඟීම් ප්‍රකාශ කිරීමට යොදාගෙන තිබුණේ ප්‍රවීණ මාධ්‍යවේදී “ආකන්ෂ්කා ගුප්තාවය.”
“මමත් අමිත් ජීත් අතර තිබූ සම්බන්ධය කෙතරම් හැඟීම්බර දැයි මට පසුව දන්නා එකම අය ඔහුම පමණය.”

රේඛා කී සියල්ල ප්‍රසිද්ධියේ පැවසීමට ආකන්ෂ්කා ගත් ආරම්භක වදන් පෙළ එය විය.
අමිත් මෙය ප්‍රසිද්ධියේ පිළිගැනීම ප්‍රතික්‍ෂේප කරන්නේ ඔහු තුළ වූ මහත්මාභාවය සහ ගෞරවය රැක ගැනීමටය. විශේෂයෙන්ම අමිත්ට තම පවුල ලොකුය.

ජයා සමඟ තිබෙන නීතිමය බැඳීම ලොකුය. ඒ සියල්ලට වඩා සත්‍ය වශයෙන් අමිත් ජී මට ආලය කළද නීතිමය ලෙස යම් න්‍යායකට අනුව ඔහුට ලැබුණු දේවල් අහිමිකර ගන්නට ඔහු අකැමැතිය.
ආලයේ නාමයෙන් මම අමිත්ට ඔවුන් සමඟ කල් ගෙවන්නට ඉඩ දෙමි. ඔහුගේ පවුල ගැන ඔහු හිතන, පතන සුන්දර විදියට මමද ආසා කරමි. අමිත් මට ආදරය කරන්නේද ඒනිසා වන්නට ඇත.
ලෝකය අප ගැන කුමක් හිතන්නේදැ’යි අපට අදාළ නොවේ.

“මම රේඛාට ආදරය කරන්නෙමි”යි අමිත් ප්‍රසිද්ධියේ පැවසීම මට අවැසි නැත.
මම අමිත්ට ආදරෙයි. අමිත් ජී ද මට ආදරේය. ඒ රහසිගත පෙම සොඳුරුය. ඒ සුන්දරත්වය මට ආශ්වාදනීය හැඟුමකි. ඒ හැඟීම මියෙන තුරු මට සතුටක් වන බව මම දනිමි. ඉතින් එතැනින් ඔබ්බට කිසිදු විනාශයක් වුවද මට කම්නැත.

රේඛාගේ වදනින් ඈ කී සියල්ල ආකන්ෂ්කා ප්‍රකාශයට පත්කළ පසු සුපිරි නළු අමිතාබ්ගේ ජංගම දුරකතනයටත්, නිවෙසේ දුරකතනයටත් ඉස්පාසුවක් නොවූ බවට විවිධ ආරංචි සමාජ ජාල වෙබ් අඩවිවල පළවිය.
70 – 80 දශකයේ සිට ඉන්දීය ඕපාදූපකරුවන් හොයමින් සිටි ප්‍රසිද්ධ රහසක් නිරාවරණ විය. එහෙත් එයට ලුණු ඇඹුල් දමා රස කරන අවධිය අමිතාබ් පසුකරමින් සිටින හෙයින් රේඛා “ටූ ලේට්” යැයි සමහරු පවසති.

නමුත් “අමිතාබ්ගේ ප්‍රතිරූපය පුපුරා යන්නට නම් තවත් ලුණු ඇඹුල් අවැසි නැත. බච්චන් නිවෙසේ කසුකුසු අසන්නට ඇත්නම් එය ඉතා අපූරු යැයි යනුවෙන්ද,
“අමිත් ජී උත්තර දෙන්න නැත්නම් රේඛා නම් ගිනිසිළුව කී සියල්ල සත්‍ය වනු ඇතැයි” යනුවෙන්ද විවිධ සමාජ ජාල වෙබ් අඩවිවල පළවන පුවත්වලද තවමත් නිමාවක් නැති තරම්ය.
ඉතින් අප බලා හිඳිමු..,
ඊළඟ මොහොත අවිනිශ්චිතය
මන්ද යත් ආලයට හෝ ප්‍රේමයට වයසක් හෝ තරාතිරමක් නැත.
රේඛාගේ උසිගැන්වීම මත සියල්ල පුපුරවා හැරිය ආකන්ෂ්කා සිය ට්විටර් ගිණුමෙහි එසේ සටහන්කර තිබිණි.

දමයන්ති රේණුකා ප්‍රනාන්දු