අවුරුදු 35ක් නොගියත් නොවෙනස් අනුපම්ගේ ආදරය

ඉන්දියානු සිනමාවේ සුපිරි තරුවක වීමට කිසිදිනෙක සුන්දර පෙනුමක් අවැසි වූයේ නැති තරම්ය.
එලෙසම සුපිරි තරු ලෙස වැජඹුණු ඒ සුපිරි වීරයන් වයසට ගියද රසික උන්මාදය ඔවුන් වෙතින් ගිලිහී ගියේද නැත.
උතුරු ඉන්දීය නළුවන් වූ රාජ් කපූර්, අමිතාබ්, රිෂී, දිලිප් සේම දකුණු ඉන්දියාවේ කමලනාතන්, රැජිණි සහ එම්. ජී. ආර්. ද එයට හොඳ නිදසුන් වෙයි.අනුපම් කේර්ද එවැනිම වූ තවත් එක් සුපිරි තරුවකි. අභිමානවත් ඔහුගේ පිරිමි පෙනුම නිසාත් විවිධ චරිත රංගනයන් නිසාත් අනුපම් ඉන්දීය රසිකයන් අතර සුපිරි තරුවක සේම ජනප්‍රියය.
අනුපම් බොහෝ විට රංගනයෙහි යෙදුණේ පිය පදවිය සඳහාය. වරෙක නැහැවුණු කපටි වංචනිකයකු වූ අනුපම් තවත් විටෙක සංවේදී තාත්තා කෙනෙකි. අණක් ගුණක් නැති සමාගම් ප්‍රධානියකු ලෙස ඔහු රඟපෑ චරිත ගණන අසීමිතය.
ඒ සියල්ලටම වැඩියෙන් අනුපම් ප්‍රහර්ෂණය තුළ කරන මිරිහිමය රංගනයන් රසිකයන්ගේ ඉල ඇදෙන සිනාවට හේතු විය. කිතිකවා හිනැහෙන තියරියට පටහැනි අනුපම් ප්‍රේක්‍ෂකයන් හට සිනමාවේ රසය දුන්නේ ඔරිජිනල් පැටන් එකටමය.
ඉතින්, ඔය කී සියලු හේතුන් ගත්කල අනුපම් කේර්ද තාරුණ්‍යය නියෝජනය නොකළ සුපිරි තරුවක බවට පත්වූයේ ඉබේටමය.
එලෙසම අනුපම් සමාජජාලා හරහා තම සුහදත්වය මනාව ඔප්නංවාවූ සිනමා තරුවකි. සිය ඉන්ස්ටග්‍රෑම් සාමාජිකයන් හරහා තම තොරතුරු සහ සුන්දර සේයාරූ බෙදාහදා ගන්නට කැමැති අනුපම් පසුගිය දිනයක තම 35 වැනි විවාහ සැමරුමෙහි සතුටද රසිකයන් සමඟ බෙදාහදා ගත්තේය.
ඒ සඳහා ඔහු භාවිතයට ගෙන තිබුණේ අපූරු පින්තූර එකතුවකි. එහි විශේෂය වූයේ සියල්ල කළු – සුදු රූප වීමය. තමා සමඟ දුක, සතුටේදී මෙන්ම සුව සැපේදීද චකිතයකින් තොරව ළඟම ගැවසුණු තම යහපත් සුරූපී බිරිය ගැන ඔහුට පැවැසිය හැකි උපරිම වූ සෙනෙහස පිරි වදන් රාශියක් අනුපම් සටහන් කොට තිබිණි.
දයාවෙන් ලියමි, ආදරණීය කිරන්, වසර 45කට ආසන්න අපේ පෙම ගැන අලුත් කතා ඔබට මම කුමට ගොතන්නද? මගේ පෙම ඔබ හොඳින් හඳුනන්නීය. මා අසල මා අසනීප වූ මොහොතේ ඔබ රැඳී සිටීමට එයට හොඳ සාක්‍ෂියකි. දේශපාලනික වශයෙන් කොයිතරම් නම් රාජකාරි බහුල වුවද මම ඔබේ සැමියා බව ඔබ කිසිදිනෙක අමතක නොකළේය.
නමුත් කනගාටුවට කාරණය වන්නේ මම රංගන ජීවිතය තුළ කාර්යබහුල වන සමහර මොහොතක නම් මට ඔබට දුරකතන ඇමැතුමක් දෙන්නට නොහැකි විය.
‘ඇයි කෝල් එකක්වත් නුදුන්නේ. මිස් කෝල් මැසේජ්වත් දැක්කෙ නැද්ද, යී’
කියා ඔබ මගෙන් ඇසුවේ නැත. කවදාවකවත් එලෙස නෑසූ ඔබගෙන් මම නම්,
‘කෝල්ස් ආන්සර් කරන්නේ නැත්තෙ ඇයි කිරන්…’
අසන්නේ ඉඳහිටක සමහර දිනෙක ඔබට දෙන ඇමැතුමට ඔබ පිළිතුරු නොදුන්විටය.
අහන්න කිරන්, පිළිකා මාරකය මගේ ජීවිතය අද්දරට පැමිණ සියුම්ව දොරට ගසන විට මට බය නොදැනුණේ ඔබ නිසාමය. මම ලෙඩකු වීම ගැන දුක හිතුණේ මටම විතරය. ඔබට එය දුකක් නොවීය.
ලෙඩ හැදෙන්නේ මිනිසුනට නැතුව ගහකොළවලටද? ඔබට වඩා ඕනෑ තරම් දුක්විඳින රෝගීන් ඉන්නවා. සතුටු වෙන්න අපහසු නම් උපේක්‍ෂාවෙන් හෙට දවස දිහා බලන් ඉන්න.
මගේ රාත්‍රී බෙහෙත් පෙති ටික මා අතේ තබන ඔබ හෙට උදාවන හිරු පිළිවෙළට මා සිත තුළ බලාපොරොත්තු ඇතිකළේ එලෙසින්ය.
දයාබර කිරන්, මම ඔබ වෙනුවෙන්ම දැන් ජීවිතය ගෙවමි. හැම මොහොතකම ඔබ අසලම සිටිමි. ඔබ ශ්‍රේෂ්ඨ ගැහැනු දරුවෙකි. සැමදාමත් මම ඔයාට ආදරය වෙමි. ඒ ඔයා මට දෙන ආදරය නිසා ඒ හිලව්වට නොව. සැබැවින්ම මම ඔබට ආදරය නිසාමය.
ඒ රසවත් කෙටි සටහන සමඟ අනුපම් කේර් මුදාහැර තිබූ කළු – සුදු සේයාරූ පෙළ ඉතාම ප්‍රේමණීය විය.
වරෙක එය නර්ගීස් සහ රාජ් කපූර් හෝ දිලිප් සහ වෛජන්ති මාලා රඟන ප්‍රේමණීය ආදර කතාවක් තරමට රසික සිත අමන්දානන්දයට පත්කර තිබිණි. ඒ තරමටම අනුපම්ගේ ඉන්ස්ටග්‍රෑම් රසිකයන් ඔහුගේ ආදරණීය විවාහ සැමරුමට සෙනෙහස පිරි ප්‍රතිචාර දක්වා තිබිණි.
දමයන්ති රේණුකා ප්‍රනාන්දු