අවංක ආදරයක් හොයන හිතුවක්කාරී

ජනප්‍රියතාවය එක ලෙස රඳා ගනිමින් එක රැයකින්
දෙස්-විදෙස් රසික රසිකාවියන්ගේ ආදරය, ගෞරවය ලබන්න ඇය පින්වන්තියක් විය. ඒ විතරක් නොව පුංචි තිරයේ, සිනමාවේ ඇරැයුම් පිට ඇරැයුම් ගලාගෙන ආවත් ඇය ඒ කිසිවකටත් සම්බන්ධ නොවී සහේලි වෙනුවෙන්ම ජීවිතය කැප කළා. ඇය එමාෂා සෙනෙවිරත්නයි. ඇගේ කලා දිවියේ අලුත් පිම්ම ගැන අප සමඟ කතා කළේ මේ විදියට.
සහේලි තවමත් ගෙදරට කොටුවෙලාද ඉතින්?
පසුගිය කාලේ ලෝකෙම පැතුරුණු ‘කොරෝනා’ නිසා සියලුම දේම කඩාවැටුණා. ඉතින් ලංකාවටත් එය බලපෑවා. ඉතින් අපිත් ගෙදරට කොටුවුණා. එහෙමයි කියලා හැමදාම ගෙදර ඉන්න බැහැ. එතකොට මම ‘සහේලි’ට කරන්නේ අසාධාරණයක්. ඉතින් ආරක්‍ෂාකාරීව සුපුරුදු පරිදි ‘දෙවැනි ඉණිම’ ටෙලිනාට්‍යයේ වැඩකටයුතු කරගෙන යනවා.
වසර දෙකක පමණ කාලයක සිට ඔබේ ජනප්‍රියත්වය එක ලෙස රඳවා තබාගැනීමේ විශේෂත්වය ගැන කතාකළොත්?
ඇත්තටම මම ටෙලිනාට්‍ය රංගන ශිල්පිනියක් වීමට අදහසක් නොතිබුණු කාලයක තමයි ‘දෙවැනි ඉණිම’ ටෙලිනාට්‍යයේ සහේලි වීමට වරම් ලැබුණේ. ප්‍රභාත් චතුරංග අයියා හරහා තමයි මගේ ගමනට තවත් එළියක් උදා වුණේ. ඒ විතරක් නෙවේ ‘දෙවැනි ඉණිම’ ටෙලිනාට්‍යයේ අධ්‍යක්‍ෂ සාරංග මෙන්ඩිස් අයියා ඇතුළු ටෙලිනාට්‍ය කණ්ඩායමේ සියලුමදෙනාගේ ලොකු සහායක් ලැබුණා. ඒ සියලුමදෙනාගෙන්ම ලැබුණු ශක්තිය නිසා තමයි. අදටත් දෙස්, විදෙස් සියලුමදෙනාගේ ආදරය, ගෞරවය මට හිමිවන්නේ. ඒ වගේම ‘දෙවැනි ඉණිම’ ටෙලිනාට්‍යයේ තිරරචක සමන් එදිරිමුනි අයියා හරිම ලස්සනට කතාව ලියාගෙන යනවා. ඒ නිසා ‘දෙවැනි ඉණිම’ ටෙලිනාට්‍ය ජනප්‍රිය ටෙලිනාට්‍ය අතර අදටත් විකාශය වීම සතුටක්. ඔය සියල්ල මගේ ගමනට විශේෂත්වයක් වුණා කිව්වොත් හරි.
එකම ටෙලිනාට්‍යයක එක දිගට වැඩ කිරීම එපාවීමක් වුණේ නැද්ද?
අපෝ කවදාවත් නැහැ. එකම පවුලක දරුවන් විදියට පුදුමාකාර සහෝදර බැඳීමකින් තමයි අපි අදටත් වැඩ කරන්නේ. හරිම සුන්දර අත්දැකීම් එක්ක සතුටින් වැඩකරගෙන යනවා.
ජනප්‍රිය නාට්‍ය වැඩිවීමත් එක්ක සමහරු වැලනොකැඩී වැඩ කරනවා. ඒත් සහේලි හෙමින් ගමනක් යන බව අපි දකිනවා?
එහෙම වැඩ ගොඩක හිරවෙලා වැඩ කරන්න මම කැමැති නැහැ. ගොඩාක් නිර්මාණවලින් මට ආරාධනා කළා. ඒත් මම ඒ කිසිවක් බාර ගත්තේ නැහැ. එහෙම දුවන්නම්වාලේ හති දාගෙන දුවන්න මම කැමැති නැහැ.
හෙමින් හෙමින් ආපු ආගමනේදි ඔබ ‘හිතුවක්කාරී’ ළඟ නතර වීමේ විශේෂත්වය?
‘හිතුවක්කාරී’ ටෙලිනාට්‍යයේ අධ්‍යක්‍ෂ ජී. නන්දසේන මහතා මට ආරාධනා කළා. ඉතින් එය මෙගා ටෙලිනාට්‍යයක් නොවන නිසාත්, එය මගේ ආදරණීය ප්‍රේක්‍ෂකයන්ට වෙනස්ම අත්දැකීමක් වන නිසාත් මම ‘හිතුවක්කාරී’ ටෙලිනාට්‍යට සම්බන්ධ වුණා.
පසුගිය කාලවකවානුවේ ඔබට චිත්‍රපටයකින් ආරාධනා ලැබුණා. නැවැත එය මඟහැරීමට හිතුවේ ඇයි?
චිත්‍රපට ගොඩකින් මට ආරාධනා ලැබුණා. ඒ සියල්ලම ආරාධනා ලැබුණේ ‘සහේලි’ නිසා තමයි. නමුත් මම ඒ කිසිවක් බාර නොගත්තේ වෙන කිසිම හේතුවක් නිසා නෙවේ. මගේ අධ්‍යාපන කටයුතුවලට බාධාවක් කරගන්න බැරි නිසා. මේ සියල්ල අවසන් වූ පසු තෝරාබේරාගෙන හොඳ නිර්මාණවලට මම සම්බන්ධ වෙනවා.
ඔබේ ජනප්‍රියතාවත් එක්ක තවත් සමහරු ඔබට අකුල් හෙලනවා ඇති නේද?
එහෙම කියන්න මම දන්නේ නැහැ. ජනප්‍රියත්වයට, ලස්සනට, ප්‍රසිද්ධියට කවුරු හරි විශේෂ කෙනෙක් හිටියොත්, මට ප්‍රහාර, චෝදනා එල්ල වෙනවා. එය මට විතරක් නෙවේ ඔබටත් විය හැකියි. එහෙම බලාගෙන ඉන්න බැරි පිරිසක් තමයි ඔය දේවල් කරන්නේ. ඉතින් ඒ සියල්ල දැනගෙන තමන්ගේ පාඩුවේ සියල්ල තේරුම් අරගෙන කටයුතු කළොත් කිසිම ප්‍රශ්නයක් නැතුව වැඩ කරගෙන යන්න පුළුවන්.
ඔබ ආගම-දහම ගැන ලොකු විශ්වාසයකින්ද, අවබෝධයකින්ද කටයුතු කරන්නේ?
ආගම – දහම එක්ක හැදුණු පරිසරයක තමයි මම පොඩි කාලේ ඉඳලා ජීවත් වෙන්නේ. මගේ මවුපියන් ඒ සියල්ල අපට අවබෝධ කරදුන්නා. ඔවුන් පැවසුවේ පන්සිල් පද පහ එක්ක ජීවත් වෙන්න කියලා තමයි. මම අද වෙනකම් මදුරුවෙක්වත් මරලා නැහැ. ඉතින් මගේ ජීවිතයේ ආපස්සට හැරිලා බලනකොට මම සතුටු වෙනවා. අපට තීරණය කරන්න පුළුවන් අප කරන දේ හොඳද, නරකද කියලා.
එමාෂාටත් එකදිගට ආදර ඇරැයුම් ගලාගෙන එනවා කියන්නේ ඇත්තද?
ගැහැනු ළමයෙක් විදියට එවැනි ආදර ඇරැයුම් එන්නේ නැහැ කිව්වොත් එය බොරුවක්. නමුත් මම ඒ කිසිවක් ගැන හිතලා නැහැ. එය ගැන හිතන්න තරම්වත් මට තවම හිතක් නැහැ.
මොනවගේ කෙනෙක්ද ඔබ පතන්නේ?
ගුණ, යහපත්, අවංකව ආදරය කරන කෙනෙක්ට මම කැමැතියි. රූපය, සල්ලි, බලය කිසිවක් වැඩක් නැහැ. ගුණ, යහපත්කම නැතිනම්, සමහරු ඉන්නවා ආදරය නිසා දහදුක් විඳලා හදපු මවුපියන් පවා අමතක කරල ආදරය
හොයාගෙන යන අය.
වසන්ත විතාරණගේ