ගැබිනි මුව දෙනකට වෙඩි තබා ඝාතනය කළ බවට සැක කරන පොලිස් සැරයන්වරුන් දෙදෙනෙකු සහ තවත් සිවිල් පුද්ගලයෙකු ගල්කිරියාගම, හීනුග්ගල ප්රදේශයේ තරුණ පිරිසක් විසින් පසුගියදා අල්ලාගෙන ගස් බැඳ පොලිසියට භාරදුන් අතර ඒ හේතුවෙන් එම තරුණ පිරිස ඇතුලු ගම්වාසීන්ට පොලිසිය විසින් දැඩි හිංසනයකට ලක්කරමින් පළිගැනීම් සිදුකෙරෙන බවට චෝදනා එල්ලවෙයි.Sri Lanka Latest News
මේ සම්බන්ධව මාධ්යට අදහස් දක්වමින් එම ගම්වාසීන් පවසන්නේ මහමඟ යාමේ සිට තමන්ගේ වගා කටයුතු පවා නිදහසේ කරගෙන යාමට ඉඩ නොදෙමින් පොලිස් නිලධාරීන් විවිධ හිංසා පීඩා සිදුකරන බවත් එබැවින් මේ වන විට ගමේ ජීවත්වීමට පවා නොහැකි තත්ත්වයක් උද්ගතව තිබෙන බවයි.
එසේම මුව දඩයමේ පැමිණි පොලිස් සැරයන්වරු දෙදෙනාව සහ සිවිල් වැසියාව අල්ලා ගැනීමට මූලිකත්වය ගනුලැබූ තරුණයාගේ වගා බිමේ ගංජා වගාකර ඇති බව පවසමින් පසුගිය දිනක පොලිස් නිලධාරීන් පිරිසක් පැමිණ මහත් හිරිහැරයක් සිදුකළ බවටද චෝදනා කෙරේ.
කෙසේවෙතත් එහිදී ගම්වාසීන් එක්ව එහි පැමිණීම නිසා පොලිස් නිලධාරීන් පිරිස එම ස්ථානයෙන් ඉවත්ව ගොස් ඇති අතර එනිසාම අදාළ තරුණයාට සාවද්ය චෝදනාවක් කිරීමේ අවස්ථාව ඔවුන්ට අහිමි වූ බවද ගම් වාසින් පවසයි.
එසේම මඟතොටේ යතුරුපැදි වලින් යනෙන විට පවා පොලිසිය මේ තරුණයන්ව බලපත්ර පරීක්ෂා කිරීමට යැයි පවසා නවත්වමින්, රඳවාගෙන වෙහෙසට පත්කරන බවද පැවසේ.
ගම් වාසීන් ප්රශ්න කර සිටින්නේ ගැබ්බර බුව දෙනක නීති විරෝධි ලෙස දඩයම් කිරීමට පැමිණි පිරිස නීතියට අල්ලාදීම හේතුවෙන් තම ජීවිකා පමණක් නොව ජීවිතයද අනතුරේ වැටී ඇති බවයි.
ඔවුන් ජනාධිපතිවරයා , මහජන ආරක්ෂක අමාත්යවරයා, පරිසර අමාත්යවරයා සහ පොලිස්පති ඇතුළු බලධාරීන්ගෙන් ඉල්ලා සිටින්නේ තමන් පත්ව ඇති මෙම අසාධාරණ පළිගැනීම් නවත්වා දීමට මැදිහත්වන ලෙසයි.
