ජනාධිපතිවරයා විසින් කැඳවා ඇති සර්ව පාක්ෂික සමුළුවට සහභාගී නොවීමට ජනතා විමුක්ති පෙරමුණ තීරණය කොට ඇත.
ජනතා විමුක්ති පෙරමුණේ නායක අනුර කුමාර දිසානායක මහතා ප්රකාශ කළේ එය ආර්ථික අර්බුදය විසඳීමට නොව ආණ්ඩුව තුළ පවතින දේශපාලන අර්බුදය විසඳීමට කැදවා ඇති එකක් බවයි.
ප්රමුඛ පෙළේ අමාත්යවරුන් දෙදෙනෙකු ඉවත් කිරීමත් සමඟ ආණ්ඩුව තුළ පවතින දේශපාලන මතභේද සමනය කර ගැනීම සඳහා ජනාධිපතිවරයා සහ ශ්රී ලංකා නිදහස් පක්ෂය අතර පැවති සාකච්ඡාවේ ප්රතිඵලයක් ලෙස මෙම සර්ව පාක්ෂික සමුලුව කැඳවා ඇති බව ඔහු කියා සිටියේය.
සර්ව පාක්ෂික සමුළුව කැඳවීමේ යෝජනාවම වැරදි බව ඔහු පැවසීය.
කොවිඩ් ව්යාප්තිය පවතින සමයේදී ජනාධිපතිවරයා විසින් මෙවැනිම සර්ව පාක්ෂික සමුලුවක් කැඳවා තිබූ බව පැවසූ දිසානායක මහතා කෙසේ වෙතත්, ආණ්ඩුව පක්ෂ නායකයින්ගේ යෝජනා ගණන් නොගෙන තමන්ගේම න්යාය පත්රය දිගටම කරගෙන ගිය බව පැවසීය.
දිගින් දිගටම ඉල්ලීම් කළත් ආර්ථික අර්බුදයේ ගැඹුර සහ පළල රජය හෙළි නොකළ බවද ඔහු පැවසීය.
ඉහත කරුණු සලකා බලා සමුළුව වර්ජනය කිරීමට තීරණය කර ඇති බව ඔහු පැවසීය.
