හෙට්ටිපොළ සෞඛ්ය වෛද්ය නිලධාරි කාර්යාලයෙන් මාස 4ක් වයසැති තම සිඟිති දියණියට එන්නතක් ලබාදීමෙන් පසු ඇය රෝගාතුරව මියගිය බව සඳහන් කරමින් එම සිඟිත්තියගේ පියා පසුගිය 16 වැනිදා කුලියාපිටිය මූලස්ථාන පොලීසියට පැමිණිල්ලක් කර තිබෙනවා. (Sri Lanka Latest News)
මෙසේ මියගොස් ඇත්තේ කුලියාපිටිය, ඉහළ ගොමුගොමුව ප්රදේශයේ පදිංචිව සිටි වික්රමආරච්චිලාගේ නිම්නාදි සේනානායක නමැති සිඟිත්තියකි.
හෙට්ටිපොළ සෞඛ්ය වෛද්ය නිලධාරි කාර්යාලයට ගොස් මාස හතරකින් ලබාදෙන එන්නත පසුගිය 15 වැනිදා තම දියණියට ලබාදීමෙන් පසු නිවෙසට පැමිණි බව පැමිණිලිකරු පවසන්නේ යැයි පොලීසිය සඳහන් කරයි.
දරුවා එදින කිසිම අපහසුතාවකින් තොරව සිටි බවත්, පසු දින එනම් 16 වැනිදා අලුයම 4.30ට පමණ ඇයගේ කටින් සෙම වැගිරීමට පටන්ගෙන, හුස්ම ගැනීමේ අපහසුතාවකින් පෙළුණු බවත්, ඇය ඒ මොහොතේම කුලියාපිටිය ශික්ෂණ රෝහලට රැගෙන ආ බවත් දැරියගේ පියා පොලීසියට කළ පැමිණිල්ලේ සඳහන් වන බව කියති.
කුලියාපිටිය ශික්ෂණ රෝහලේ ප්රාථමික සත්කාර ඒකකයට ඇතුළත් කිරීමෙන් පසු වෛද්යවරුන් පරීක්ෂා කර බලා සිඟිති දියණිය මියගොස් ඇති බව දැනුම් දුන්නේ යැයි පැමිණිලිකරු පොලීසියට පවසා ඇත.
මියගිය සිඟිති දැරියගේ සිරුර පශ්චාත් මරණ පරීක්ෂණයකට ලක්කිරීම සඳහා කුරුණෑගල ශික්ෂණ රෝහලට ගෙන ගොස් තිබේ.
හෙදියක විසින් එන්නත දෙනු ලැබීමෙන් පසු විනාඩි විස්සක් යනතුරු එම ස්ථානයේ ගතකරන ලෙස දැනුම් දුන් බවත්, රෝග ලක්ෂණයක් පෙන්නුම් නොකළ නිසා බිරිඳ දැරිය සමග නිවෙසට පැමිණි බවත් පියා සඳහන් කළේය.
සිඟිති දියණියගේ මරණය සම්බන්ධයෙන් විධිමත් පරීක්ෂණයක් පවත්වන ලෙස සෞඛ්ය බලධාරීන්ගෙන් ඔහු ඉල්ලීමක් කළේය.
මේ අතර, මියගිය මෙම මාස හතරක් වයසැති සිඟිත්තිය ඇතුළු දරුවන් දස දෙනකුට එකම එන්නත් කුප්පියකින් පසුගිය පහළොස් වැනිදා එන්නත් ලබා දුන් බවත් ඔවුනට කිසිදු සංකූලතාවක් හෝ රෝග ලක්ෂණයක් පහළ වී නොමැති බවත් හෙට්ටිපොළ සෞඛ්ය වෛද්ය නිලධාරි කාර්යාලයේ ප්රකාශකයෙක් පැවැසීය.
කුරුණෑගල ප්රාදේශීය සෞඛ්ය සේවා අධ්යක්ෂ වෛද්ය ප්රමිතා ශාන්තිලතා මහත්මියගෙන් කළ විමසීමකදී ඇය පවසා ඇත්තේ, අදාළ දිනයේ මෙම දරුවාට හෙට්ටිපොළ සෞඛ්ය වෛද්ය නිලධාරී කාර්යාලය මගින් එන්නතක් ලබාදුන් නමුත් දරුවාගේ මරණයට එම එන්නත හේතු වූ බව කිය නොහැකි බවයි.
මරණයට නිශ්චිත හේතුව සොයාගැනීම සඳහා කුරුණෑගල ශික්ෂණ රෝහලේදී විශේෂඥ අධිකරණ වෛද්ය නිලධාරිවරයා විසින් පශ්චාත් මරණ පරීක්ෂණයක් සිදුකරනු ලබන බවත්, පශ්චාත් මරණ පරීක්ෂණ කටයුතු නිම වීමෙන් පසු මරණයට නිශ්චිත හේතුවක් සොයා ගැනීමට හැකිවනු ඇති බවත් වෛද්යවරිය පවසා ඇත.
lankadeepa
