බොරැල්ල වනාතමුල්ල හල්ගහකුඹුර ප්රදේශයේ ක්රියාත්මක මත්කුඩු ජාවාරමක් ගැන තොරතුරු සොයා බැලීම සඳහා ගිය යුද හමුදා බුද්ධි නිලධාරීන් දෙදෙනකු අනීතික ලෙස කටයුතු කිරීමට යෑම හේතුවෙන් කාන්තාවක වෙඩි වැදීමකට ලක්ව මිය ගිය බව මූලික විමර්ශනවලින් අනාවරණය වී තිබේ.
මේ බුද්ධි නිලධාරීන් කොළඹ දකුණ කොට්ඨාස දූෂණ මර්දන අංශයට මත්ද්රව්ය ජාවාරම් ගැන සාර්ථක තොරතුරු ලබාදී ඇති බව උසස් පොලිස් නිලධාරියෙක් සඳහන් කළේය.
එසේ තිබියදීත් මේ බුද්ධි නිලධාරීන් බුද්ධි රාජකාරිය අභිභවා කටයුතු කිරීමට යෑම කනගාටුවට කරුණක් බවද එම නිලධාරියා කීය. පුද්ගලයකු අල්ලාගෙන දෑතට මාංචු දමා ඒ පුද්ගලයාට පහර දෙමින් තොරතුරු විමසීමත් ගිනි අවි පෙන්වමින් හැසිරීමත් පිළිබිඹු කරනුයේ බුද්ධි රාජකාරියක් නොවන බවද එම නිලධාරියා සඳහන් කළේය.
මේ බුද්ධි නිලධාරීන් දෙදෙනා යුද හමුදා මූලස්ථානයට අනුයුක්තව සේවයේ නිරතව සිටින ලාන්ස් කෝප්රල්වරු දෙදෙනෙකි. අවුරුදු 28 සහ 29 වයස්වල පසුවන මේ බුද්ධි නිලධාරින්ගේ හැසිරීමට අනුව ප්රදේශවාසීන් සිතා ඇත්තේ ඔවුන් පොලිසියේ සිවිල් නිලධාරීන් පිරිසක් බවය.
මත්කුඩු ජාවාරම්කරුවකුගේ නිවෙසක් අසලදී මේ අය විසින් අල්ලා ගන්නා පුද්ගලයකුට පෙරේදා (13) රාත්රියේදී මාංචු දමා පහරදී ඔහුව රැගෙන යෑමට සූදානම් වන විට ඔහු ඊට විරෝධය දක්වන විට එක් බුද්ධි නිලධාරියකු ගිනි අවිය සක්රිය කර එම අවියේ බදෙන් මාංචු දමා සිටි පුද්ගලයාට පහරදෙන විට වෙඩිල්ල පත්තු වී අසල රැඳී සිටි 25 හැවිරිදි කාන්තාවකගේ පපුවට වැදී ඇති බව පොලිසිය කියයි. එම වෙඩිල්ලෙන් මියගොස් ඇත්තේ මෙලනි කාංචනා නමැති කාන්තාවකි.
ප්රදේශවාසීන් කලබල වන්නේ මේ සිදුවීමෙන් පසුව බව පොලිසිය කියයි. ඒ බව පැහැදිලිවම ආරක්ෂක කැමරාවල සටහන්ව ඇති බවත් එම දර්ශන පරීක්ෂා කිරීමේදී බුද්ධි නිලධාරීන් නීතිය අභිභවා ඔවුන්ට අදාළ නැති කටයුතු බොහොමයක් සිදු කරන බව පෙනී යන්නේ යැයිද පොලිසිය කියයි.
මේ බුද්ධි නිලධාරීන් ඒත් එක්කම එම ස්ථානයෙන් ඉවත්ව බොරැල්ල පොලිසියට භාර වීම නිසා ජනතාව අතර ඇති වන්නට ගිය නොසන්සුන් තත්ත්වයක්ද පාලනය වී තිබිණි.
ගයාන් කුමාර වීරසිංහ
